བཅའ་ཁྲིམས་སློབ་སྦྱོང་བྱས་ན་ཕན་ནུས་ག་འདྲ་ཡོད།

        བཅའ་ཁྲིམས་སློབ་སྦྱོང་བྱས་ཚེ་གཞི་ནས་རང་རྟོགས་ཀྱི་སྒོ་ནས་ཁྲིམས་ལ་བརྩི་སྲུང་བྱེད་ཐུབ། བཅའ་ཁྲིམས་ཀྱི་ཤེས་བྱ་སློབ་སྦྱོང་བྱེད་པ་ནི་སྤྱི་ཚོགས་རིང་ལུགས་རྒྱལ་ཁབ་ཀྱི་ཁྲིམས་སྲུང་སྤྱི་དམངས་ཤིག་བྱེད་པའི་དགོས་མཁོ་ཡིན་པས། ཁྲིམས་སྲུང་གི་སྤྱི་དམངས་ཤིག་བྱེད་པར་ངེས་པར་ཁྲིམས་སློབ་སྦྱོང་དང་། ཁྲིམས་ཤེས་པ། ཁྲིམས་སྲུང་བ། ཁྲིམས་ལྟར་ལས་སྒྲུབ་བཅས་བྱ་དགོས།  

        བཅའ་ཁྲིམས་སློབ་སྦྱོང་བྱས་ཚེ་གང་ཞིག་ཁྲིམས་འགལ་ཉེས་གསོག་ཡིན་པ་དང་། བཅའ་ཁྲིམས་ནང་བྱ་སྤྱོད་གང་དག་གཏན་འགོག་བྱེད་པ། བྱ་སྤྱོད་གང་དག་ལ་ཆད་པ་ཕོག་པ་བཅས་གཞི་ནས་ཤེས་རྟོགས་བྱུང་སླ་ལ། བཅའ་ཁྲིམས་ནང་གང་ཞིག་བྱས་ཆོག་པ་དང་། བཅའ་ཁྲིམས་ཀྱིས་བྱས་ཆོག་པའི་ཁྱབ་ཁོངས་ཁྲོད་ལས་ཀ་བྱེད་པ། གླེན་པའི་ལས་ཀ་མི་བྱེད་པ་བཅས་གཞི་ནས་ཤེས་ཐུབ་པས། བཅའ་ཁྲིམས་སློབ་སྦྱོང་བྱེད་པ་དེ་ནད་སེལ་དུ་སྨན་འཐུང་བ་དང་། ནད་མེད་ལ་འགོག་ཁབ་རྒྱག་པ་ལྟ་བུ་ཡིན།  

        བཅའ་ཁྲིམས་སློབ་སྦྱོང་བྱས་ཚེ་རང་ཉིད་ཀྱི་ལུགས་མཐུན་ཁེ་དབང་ལ་གཞི་ནས་སྲུང་སྐྱོབ་བྱེད་ཐུབ་པས། ང་ཚོས་ངེས་པར་བཅའ་ཁྲིམས་ཀྱི་ཤེས་བྱ་སློབ་སྦྱོང་བྱས་ནས་རང་ཉིད་ཀྱི་ཤེས་བྱའི་གྲུབ་ཆ་འཐུས་ཚང་དུ་གཏོང་བ་དང་། བཅའ་ཁྲིམས་ཀྱི་བྱེད་ཐབས་ལ་བརྟེན་ནས་དངོས་ཡོད་གནད་དོན་ཐག་གཅོད་བྱེད་ཤེས་པ་དང་། བཅའ་ཁྲིམས་མཚོན་ཆར་བརྩིས་ནས་རང་ཉིད་ཀྱི་ལུགས་མཐུན་ཁེ་དབང་ལ་སྲུང་སྐྱོང་བྱེད་ཤེས་དགོས།  

        བཅའ་ཁྲིམས་སློབ་སྦྱོང་བྱས་ཚེ་དེ་བས་ལེགས་པའི་སྒོ་ནས་ལས་ཀ་བསྒྲུབ་ཤེས་པ་དང་། འཚོ་བ་རོལ་ཤེས་པ། བཅའ་ཁྲིམས་ཀྱི་ལྟ་སྟངས་ལ་བརྟེན་ནས་གནད་དོན་ལ་ལྟ་ཞིབ་དང་དབྱེ་ཞིབ། ཐག་གཅོད་བཅས་བྱེད་ཤེས་པའི་ནུས་པ་ལྡན་ལ། ཁྲིམས་ལྟར་རང་ཉིད་ཀྱི་བྱ་སྤྱོད་ཚད་ལྡན་དུ་གཏོང་བའི་ནུས་པ་ལྡན་པར་མ་ཟད། རང་ཉིད་ཀྱི་ཁྲིམས་སྤྱོད་ནུས་པའང་ཆེ་རུ་བཏང་ནས་བཅའ་ཁྲིམས་ཀྱི་ཁྱབ་ཁོངས་ནང་འཚོ་བ་སྔར་བས་ཡག་པོར་སྐྱེལ་ཐུབ།