དམག་ཡོངས་ཀྱིས་ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་དྲན་གསོ་ཞུ་བའི་རིག་གཞུང་བགྲོ་གླེང་ཚོགས་འདུ་འཚོགས་པ།

ཀྲང་ཡིའུ་ཞ་ཚོགས་འདུར་ཞུགས་ནས་གསུང་བཤད་གནང་བ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་8ཚེས་26ཉིན་གློག་འཕྲིན་འབྱོར་གསལ། ཀྲུའུ་ཞི་ཞི་ཅིན་ཕིང་གི་ཆོག་མཆན་ཐོབ་པ་བརྒྱུད། ཚེས་26ཉིན། དམག་ཡོངས་ཀྱིས་ཀྲུང་གོ་མི་དམངས་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་དྲན་གསོ་ཞུ་བའི་རིག་གཞུང་བགྲོ་གླེང་ཚོགས་འདུ་འཚོགས་པ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་དམག་ཨུད་ཀྱི་ཀྲུའུ་ཞི་གཞོན་པ་ཀྲང་ཡིའུ་ཞ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་སྟེ། ཀྲུའུ་ཞི་ཞི་ཅིན་ཕིང་གི་མཛུབ་སྟོན་གལ་ཆེན་སློབ་སྦྱོང་ལག་བསྟར་གཏིང་ཟབ་དང་རི་འགོག་དམག་འཁྲུག་གི་སྙིང་སྟོབས་རླབས་པོ་ཆེ་དར་སྤེལ་བཏང་ནས། ལོ་རྒྱུས་དེ་དེང་གི་དཔྱད་གཞིར་འཛིན་ཏེ་སྟོབས་ཆེན་དོན་གཉེར་དང་རྣམ་པ་གསར་པ་གཏོད་པའི་བློ་སྟོབས་གཅིག་སྡུད་ཀྱིས་དམག་བཙུགས་ལོ་བརྒྱའི་འབད་འཐབ་དམིགས་ཚད་ནུས་ཤུགས་ཡོད་རྒུས་མངོན་འགྱུར་བྱེད་དགོས་ཞེས་ནན་བཤད་གནང་བ་རེད།

    ཀྲང་ཡིའུ་ཞ་ཡིས་བསྟན་དོན། ཀྲུང་གོ་གུང་ཁྲན་ཏང་གི་སྲོག་ཤིང་ཀ་རྟེན་གྱི་ནུས་པར་ངོས་འཛིན་གཏིང་ཟབ་དང་། ཏང་གིས་མེ་མདར་བཀོད་འདོམས་བྱེད་པའི་ལེགས་ཆ་གཙོ་བོ་སྲ་བརྟན་དུ་གཏོང་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དངོས་སུ་སྦྱོང་བ་དང་། དངོས་སུ་ཤེས་པ། དངོས་སུ་ཡིད་ཆེས་བཅས་བྱས་ནས། ཆབ་སྲིད་ལ་བརྟེན་ནས་དམག་དཔུང་འཛུགས་སྐྱོང་གཏིང་ཟབ་དང་ཏན་ཏིག་ཕྱོགས་སུ་སྐུལ་འདེད་བཏང་ནས་མི་དམངས་དམག་དཔུང་གིས་ནམ་ཡང་ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲང་བའི་འགན་ལེན་བྱེད་དགོས། མི་དམངས་དམག་འཁྲུག་གི་འཐབ་ཇུས་འཐབ་རྩལ་འཕེལ་རྒྱས་གཏོང་བ་དང་། དམག་སྦྱོང་དམག་གྲབས་ལ་ཕྱོཌ་ཡོངས་ནས་ཤུཌ་སྣོན་རྒྱག་པ། དམག་འཐབ་དང་སྦྱོང་བརྡར་བྱ་ཐབས་ཀྱི་མ་ལག་གསར་གཏོད་ལ་སྐུལ་འདེད་གཏོང་བ། གཞི་གཅིག་ཅན་གྱི་རྒྱལ་ཁབ་ཀྱི་འཐབ་ཇུས་མ་ལག་དང་ནུས་པ་སྲ་བརྟན་དང་མཐོ་རུ་གཏོང་བ་བཅས་བྱས་ནས་རྒྱལ་ཁབ་ཀྱི་བདག་དབང་དང་། བདེ་འཇཌ། འཕེལ་རྒྱས་བཅས་ཀྱི་ཁེ་ཕན་སྲུང་སྐྱོང་མཐའ་གཅིག་ཏུ་བྱེད་དགོས།

    ཀྲང་ཡིའུ་ཞ་ཡིས་ནན་བཤད་གནང་དོན། དམག་དཔུང་སྟོབས་དང་ལྡན་ན་གཞི་ནས་རྒྱལ་ཁབ་བདེ་ལ་འཁོད་ངེས་ཡིན་པ་ཐོག་མཐའ་བར་གསུམ་དུ་བློ་ལ་བརྟན་པོར་ངེས་དགོས་ཤིང་། རྒྱལ་སྲུང་དང་དམག་དཔུང་དེང་རབས་ཅན་ལ་སྐུལ་འདེད་མགྱོགས་པོ་བཏང་སྟེ་སྒྱུར་བཅོས་གཏིང་ཟབ་བྱེད་པར་སྒུལ་ནུས་ཆེན་པོ་འདོན་སྤེལ་བྱེད་དགོས་པ་དང་། ཚན་རྩལ་རང་དར་ཡོང་བར་འགྲན་ཟླ་བྲལ་བའི་སྟོབས་ཤུགས་ལྡན་པར་བྱེད་པ། དམག་དོན་བཅོས་སྐྱོང་བྱེད་པར་ཕྱོགས་སྒྱུར་མཆོང་སྐྱོད་ཡོང་བ་བཅས་བྱས་ནས་སྤུས་ཚད་མཐོ་བའི་འཕེལ་རྒྱས་མངོན་འགྱུར་ཡོང་བར་སྐུལ་འདེད་གཏོང་དགོས། དཔའ་བོའི་མི་དམངས་དམག་དཔུང་གི་ཁྲག་བཏོན་གྱི་གཟི་བརྗིད་ལེའུ་མུ་མཐུད་རྩོམ་དགོས་ཤིང་། རང་སྲོག་བློས་གཏོང་དང་ལེགས་སྐྱེས་འབུལ་བའི་སྙིང་སྟོབས་ཤུགས་ཆེར་གཏོང་བ་དང་། འབད་འཐབ་དང་དངོས་སྒྲུབ་ཀྱི་སྤྱོད་ཚུལ་དར་སྤེལ་གཏོང་བ། གསར་བརྗེའི་དམག་མིའི་བླ་ན་མེད་པའི་ཀུན་སྤྱོད་ནམ་ཡང་མི་ཉམས་པ་བཅས་བྱས་ནས། དུས་རབས་གསར་པར་རང་རེའི་ཏང་དང་དམག་དཔུང་གི་སྲོལ་རྒྱུན་བཟང་པོ་དར་རྒྱས་གོང་འཕེལ་གཏོང་དགོས། ཞི་བདེ་དང་དྲང་བདེན་གྱི་རྒྱལ་ཁ་ཐོབ་པའི་གྲུབ་འབྲས་སྲུང་སྐྱོང་བྱེད་དགོས་ཤིང་། འཛམ་གླིང་དམག་ཆེན་གཉིས་པའི་ལོ་རྒྱུས་ལྟ་བ་ཡང་དག་མཐའ་འཁྱོངས་དང་། དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་ལམ་སྲུང་སྐྱོང་། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་ཧུར་ཐག་གཏོང་བ་བཅས་བྱས་ནས་འཛམ་གླིང་ཞི་བདེ་སྲུང་སྐྱོང་བྱེད་པའི་སྟོབས་ཤུགས་བརྟན་པོ་ཞིག་ཐོག་མཐའ་བར་གསུམ་དུ་བྱེད་དགོས།