རྒྱལ་སྲིད་སྤྱི་ཁྱབ་ཁང་གིས།《“མི་ཐབས་རིག་ནུས་+”བྱ་སྤྱོད་ལག་བསྟར་གཏིང་ཟབ་བྱེད་པའི་སྐོར་གྱི་བསམ་འཆར》བཀྲམ་པ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་8ཚེས་26ཉིན་གློག་འཕྲིན་འབྱོར་གསལ། ཉེ་ཆར། རྒྱལ་སྲིད་སྤྱི་ཁྱབ་ཁང་གིས《“མི་ཐབས་རིག་ནུས་+”བྱ་སྤྱོད་ལག་བསྟར་གཏིང་ཟབ་བྱེད་པའི་སྐོར་གྱི་བསམ་འཆར》（གཤམ་དུ《བསམ་འཆར》ཞེས་བསྡུ་རྒྱུ）བཀྲམ་པ་རེད།

    《བསམ་འཆར》ནང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་དང་། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་ལེན་བསྟར་བ། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བཅས་བྱས་ཐོག་གྲངས་གཞིའི་ཐོན་ཁུངས་ཕུན་སུམ་ཚོགས་པ་དང་། ཐོན་ལས་མ་ལག་ཆ་ཚང་བ། བཀོལ་སྤྱོད་རྣམ་པ་རྒྱ་ཆེ་བ་སོགས་རང་རྒྱལ་གྱི་ལེགས་ཆ་འདོན་སྤེལ་གང་ལེགས་དང་། སྔོན་ཚུད་འཆར་འགོད་དང་། རིམ་ལྡན་བཀོད་སྒྲིག ལས་དབྱེ་ཇུས་འདོན། སྒོ་དབྱེ་མཉམ་སྤྱོད། བདེ་འཇགས་ཚོད་འཛིན་བཅས་ལ་ཤུགས་སྣོན་རྒྱག་པ། ཚན་རྩལ་དང་། ཐོན་ལས། འཛད་སྤྱོད། དམངས་འཚོ། བཅོས་སྐྱོང་། གོ་ལ་ཧྲིལ་པོའི་མཉམ་ལས་སོགས་ཀྱི་ཁྱབ་ཁོངས་གཙོ་གནད་དུ་བཟུང་ནས“མི་ཐབས་རིག་ནུས་+”བྱ་སྤྱོད་ལག་ལེན་གཏིང་ཟབ་བསྟར་ཏེ་རྨང་གཞིའི་སྒྲིག་བཀོད་གསར་པ་དང་། ལག་རྩལ་མ་ལག་གསར་པ། ཐོན་ལས་སྣང་ཚུལ་གསར་པ། ལས་ཞུགས་ལས་གནས་གསར་པ་སོགས་ཁག་གཅིག་ཐོན་པར་བྱེད་པ། ཐོན་སྐྱེད་ནུས་ཤུགས་གསར་མ་མགྱོགས་མྱུར་སྐྱེད་སྲིང་དང་འཕེལ་རྒྱས་བཏང་སྟེ། མི་དམངས་ཡོངས་ཀྱིས་མི་ཐབས་རིག་ནུས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པར་བྱས་ནས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་ལ་ཞབས་འདེགས་དེ་བས་ཡག་པོ་ཞུ་དགོས་ཞེས་བསྟན་ཡོད་པ་རེད།

    《བསམ་འཆར》ནང་། གཙོ་གནད་བྱ་སྤྱོད་ཆེན་པོ་6མགྱོགས་མྱུར་ལག་ལེན་བསྟར་དགོས་ཞེས་བཏོན་ཡོད། གཅིག་ནས“མི་ཐབས་རིག་ནུས་+”ཀྱི་ཚན་རིག་ལག་རྩལ་ཏེ། ཚན་རིག་གི་གསར་རྙེད་འཕེལ་རིམ་མགྱོགས་སུ་བཏང་ནས་ལག་རྩལ་ཞིབ་སྤེལ་བྱེད་སྟངས་གསར་གཏོད་དང་ཕན་ནུས་ཆེར་གཏོང་ལ་སྐུལ་འདེད་གཏོང་བ་དང་། མཚན་ཉིད་རིག་པ་དང་སྤྱི་ཚོགས་ཚན་རིག་གི་ཞིབ་འཇུག་བྱེད་ཐབས་གསར་གཏོད་བྱེད་དགོས། གཉིས་ནས“མི་ཐབས་རིག་ནུས་+”ཀྱི་ཐོན་ལས་འཕེལ་རྒྱས་གཏོང་བ་སྟེ། རིག་ནུས་ཀྱི་གདོད་མའི་རྣམ་པ་གསར་པ་དང་ལས་རྣམ་གསར་པ་སྐྱེད་སྲིང་བྱས་ཏེ། བཟོ་ལས་ཀྱི་གཙོ་རྒྱུ་ཀུན་འདུས་ཀྱི་རིག་ནུས་ཅན་འཕེལ་རྒྱས་ལ་སྐུལ་འདེད་དང་། ཞིང་ལས་ཀྱི་གྲངས་འཛིན་རིག་ནུས་ཅན་ཕྱོགས་སྒྱུར་རིམ་སྤོར་མགྱོགས་སུ་བཏང་སྟེ། ཞབས་ཞུའི་ལས་རིགས་འཕེལ་རྒྱས་ཀྱི་རྣམ་པ་གསར་པ་གཏོད་དགོས། གསུམ་ནས“མི་ཐབས་རིག་ནུས་+”ཀྱི་འཛད་སྤྱོད་སྤུས་ཚད་ལེགས་སུ་གཏོང་བ་སྟེ། ཞབས་ཞུའི་འཛད་སྤྱོད་ཀྱི་རྣམ་པ་གསར་པ་རྒྱ་སྐྱེད་བཏང་ནས་ཐོན་རྫས་འཛད་སྤྱོད་ཀྱི་ལས་རྣམ་གསར་པ་སྐྱེད་སྲིང་བྱེད་དགོས། བཞི་ནས“མི་ཐབས་རིག་ནུས་+”ཀྱི་དམངས་འཚོའི་བདེ་རྩ་སྟེ། དེ་བས་རིག་ནུས་ལྡན་པའི་ལས་ཀ་བྱེད་སྟངས་གསར་གཏོད་དང་། དེ་བས་ཕན་འབྲས་ལྡན་པའི་སློབ་སྦྱོང་བྱེད་སྟངས་ཁྱབ་གདལ་བཏང་ནས། སྤུས་ཚད་དེ་བས་ལེགས་ལ་མཛེས་སྡུག་ལྡན་པའི་འཚོ་བ་གཏོད་དགོས། ལྔ་ནས“མི་ཐབས་རིག་ནུས་+”ཀྱི་བཅོས་སྐྱོང་ནུས་པ་སྟེ། སྤྱི་ཚོགས་བཅོས་སྐྱོང་གི་མི་འཕྲུལ་མཉམ་གནས་ཀྱི་རྣམ་པ་གསར་པ་དང་བདེ་འཇགས་བཅོས་སྐྱོང་གི་སྣ་མང་མཉམ་བཅོས་ཀྱི་རྣམ་པ་གསར་པ་བཏོད་དེ། མཛེས་སྡུག་ལྡན་པའི་ཀྲུང་གོའི་སྐྱེ་ཁམས་བཅོས་སྐྱོང་གི་འཆར་གཞི་གསར་པ་མཉམ་དུ་འགོད་དགོས། དྲུག་ནས“མི་ཐབས་རིག་ནུས་+”ཀྱི་གོ་ལ་ཧྲིལ་པོའི་མཉམ་ལས་ཏེ། མི་ཐབས་རིག་ནུས་ཀུན་ཕན་མཉམ་སྤྱོད་ཐུབ་པར་སྐུལ་འདེད་བཏང་སྟེ། མི་ཐབས་རིག་ནུས་ཀྱི་གོ་ལ་ཧྲིལ་པོའི་བཅོས་སྐྱོང་མ་ལག་མཉམ་དུ་འཛུགས་དགོས།

    《བསམ་འཆར》ནང་། འདྲ་དཔེའི་རྨང་གཞིའི་ནུས་པ་ཆེ་རུ་གཏོང་བ་དང་། གྲངས་གཞི་མཁོ་སྤྲོད་གསར་གཏོད་ལ་ཤུགས་སྣོན་རྒྱག་པ། རིག་ནུས་ཀྱི་རྩིས་ནུས་སྤྱི་འདོམས་བྱེད་ཤུགས་ཆེ་རུ་གཏོང་བ། བཀོལ་སྤྱོད་འཕེལ་རྒྱས་ཀྱི་ཁོར་ཡུག་ལེགས་སུ་གཏོང་བ། འབབ་བཟོའི་སྐྱེ་ཁམས་དར་འཕེལ་ཡོང་བར་སྐུལ་འདེད་གཏོང་བ། ཤེས་ལྡན་པའི་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་པ། སྲིད་ཇུས་དང་ཁྲིམས་སྲོལ་གྱི་འགན་ལེན་བྱེད་ཤུགས་ཆེ་རུ་གཏོང་བ། བདེ་འཇགས་ཀྱི་ནུས་པ་དང་ཆུ་ཚད་མཐོ་རུ་གཏོང་བ་བཅས་རྨང་གཞིའི་འདེགས་སྐྱོར་ནུས་པ་ཁག་8ཆེ་རུ་གཏོང་དགོས་ཞེས་བཏོན་ཡོད་པ་རེད།