ཞི་ཅིན་ཕིང་གིས་ཨུ་རུ་སུའི་རྒྱལ་ཁབ་ཏུའུ་མའི་ཀྲུའུ་ཞི་ཝོ་ལུའོ་ཅིན་ལ་མཇལ་འཕྲད་གནང་བ།

རྩོམ་པ་པོ།     ཡིག་བསྒྱུར།       དུས་ཚོད།   2025-08-28   རྩོམ་ཁུངས།    མི་དམངས་ཉིན་རེའི་ཚགས་པར།

    ཟླ་8ཚེས་26ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེ་མོར་ཨུ་རུ་སུའི་རྒྱལ་ཁབ་ཏུའུ་མའི་ཀྲུའུ་ཞི་ཝོ་ལུའོ་ཅིན་ལ་མཇལ་འཕྲད་གནང་བ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་8ཚེས་26ཉིན་གློག་འཕྲིན་འབྱོར་གསལ། ཟླ་8ཚེས་26ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེ་མོར་ཨུ་རུ་སུའི་རྒྱལ་ཁབ་ཏུའུ་མའི་ཀྲུའུ་ཞི་ཝོ་ལུའོ་ཅིན་ལ་མཇལ་འཕྲད་གནང་བ་རེད།

    ཞི་ཅིན་ཕིང་གིས་གསུངས་དོན། ཀྲུང་གོ་དང་ཨུ་རུ་སུའི་འབྲེལ་བ་ནི་ཡོ་ལང་དང་འཕོ་འགྱུར་ཆེ་བའི་དེང་གི་འཛམ་གླིང་ཐོག་བརྟན་ཤོས་དང་། འཐུས་སྒོ་ཚང་ཤོས། འཐབ་ཇུས་ཀྱི་ནང་དོན་ཕུན་སུམ་ཚོགས་ཤོས་བཅས་ཀྱི་རྒྱལ་ཁབ་ཆེན་པོའི་འབྲེལ་བ་ཞིག་ཡིན། ཀྲུང་གོ་དང་ཨུ་རུ་སུའི་འབྲེལ་བ་ཆུ་ཚད་མཐོ་བའི་འཕེལ་རྒྱས་ལ་རྒྱུན་སྲིང་ལྷོད་མེད་ངང་སྐུལ་འདེད་གཏོང་བ་དེ་རྒྱལ་ཁབ་གཉིས་པོའི་མི་དམངས་ཀྱི་རྩ་བའི་ཁེ་ཕན་དང་མཐུན་ཡོད་ལ། འཛམ་གླིང་ཞི་བདེ་བརྟན་ལྷིང་གི་འབྱུང་རྩ་ཡང་ཡིན། ད་ལོའི་ཟླ་བ་ལྔ་པར། ངས་ཨུ་རུ་སུར་རྒྱལ་དོན་འཚམས་འདྲི་བྱས་པ་དང་འབྲེལ། སུའུ་ལེན་གྱི་རླབས་ཆེན་རྒྱལ་སྲུང་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་དྲན་གསོ་ཞུ་བའི་རྟེན་འབྲེལ་མཛད་སྒོར་ཡང་ཞུགས་པ་ཡིན། གཟའ་འཁོར་རྗེས་མར་ཀྲུང་གོ་ཕྱོགས་ཀྱིས་ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་དྲན་གསོ་ཞུ་བའི་བྱེད་སྒོ་གཟབ་རྒྱས་སྤེལ་རྒྱུ་ཡིན། འཛམ་གླིང་དམག་ཆེན་གཉིས་པའི་ཨེ་ཤེ་ཡ་དང་ཡོ་རོབ་ཀྱི་གཡུལ་ས་གཙོ་བོ་ཡིན་པའི་ཀྲུང་གོ་དང་སུའུ་ལེན་གྱིས་རི་པིན་དམག་རྒྱལ་རིང་ལུགས་དང་འཇར་མན་ཧྥ་ཤི་སིའི་བཙན་འཛུལ་ལ་འགོག་རྒོལ་བྱེད་པར་མི་རིགས་ཀྱི་བློས་གཏོང་ཆེན་པོ་བྱས་ཏེ། འཛམ་གླིང་དམག་ཆེན་གཉིས་པར་རྒྱལ་ཁ་ཐོབ་པར་ལེགས་སྐྱེས་གལ་ཆེན་ཕུལ་ཡོད། ཕྱོགས་གཉིས་པོས་སྲོལ་རྒྱུན་གྱི་མཛའ་གཅུགས་རྒྱུན་འཁྱོངས་དང་། འཐབ་ཇུས་ཀྱི་ཡིད་ཆེས་བྱེད་རེས་ཟབ་ཏུ་གཏོང་བ། ཁྱབ་ཁོངས་ཁག་གི་སྤེལ་རེས་མཉམ་ལས་ལ་ཤུགས་སྣོན་རྒྱག་པ། ལག་གདང་སྦྲེལ་ནས་རྒྱལ་ཁབ་གཉིས་པོའི་བདེ་འཇགས་དང་འཕེལ་རྒྱས་ཀྱི་ཁེ་ཕན་སྲུང་སྐྱོང་། གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་དང་མཐུན་སྒྲིལ། ཕྱོགས་མང་རིང་ལུགས་ངོ་མ་མཐའ་འཁྱོངས་བཅས་བྱས་ནས། རྒྱལ་སྤྱིའི་སྒྲིག་ལམ་དེ་བས་དྲང་གཞག་ལུགས་མཐུན་གྱི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་དགོས།

    ཞི་ཅིན་ཕིང་གིས་ནན་བཤད་གནང་དོན། ཁྲིམས་འཛུགས་སྒྲིག་གཞིའི་མཉམ་ལས་ནི་ཀྲུང་གོ་དང་ཨུ་རུ་སུའི་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་མེད་དུ་མི་རུང་བའི་གྲུབ་ཆ་ཞིག་ཡིན། ཕྱོགས་གཉིས་པོས་རྒྱལ་སྐྱོང་སྲིད་འཛིན་དང་ཁྲིམས་འཛུགས་ཉམས་མྱོང་སྤེལ་རེས་ཧུར་ཐག་བྱས་ནས། དུས་བབ་གསར་པའི་འོག་ཀྲུང་གོ་དང་ཨུ་རུ་སུའི་འཐབ་ཇུས་རོགས་ལས་དང་ཁྱབ་ཁོངས་ཁག་གི་མཉམ་ལས་ལ་ཁྲིམས་འཛུགས་ཀྱི་འགན་སྲུང་དེ་བས་བརྟན་པོ་བྱེད་པའི་རེ་བ་ཡོད།

    ཝོ་ལུའོ་ཅིན་གྱིས་ཙུང་ཐུང་ཕུའུ་ཅིང་ནས་ཀྲུའུ་ཞི་ཞི་ཅིན་ཕིང་ལ་མཛའ་བརྩེའི་འཚམས་འདྲི་དང་སྨོན་འདུན་བཟང་པོ་ཞུ་ལུགས་བརྒྱུད་ཞུ་གནང་ཞིང་། ཁོང་གིས་རྒྱལ་ཁབ་གཉིས་པོའི་གཙོ་བདག་གི་འཐབ་ཇུས་སྣེ་ཁྲིད་འོག་ཨུ་རུ་སུ་དང་ཀྲུང་གོའི་འབྲེལ་བར་འཕེལ་རྒྱས་གཏིང་ཟབ་ཕྱིན་ནས་གྲུབ་འབྲས་གཟེངས་སུ་ཐོན་པ་ཐོབ་ཡོད། ཨུ་རུ་སུའི་རྒྱལ་ཁབ་ཏུའུ་མ་ཡིས་རྒྱལ་ཁབ་གཉིས་པོའི་གཙོ་བདག་གི་ཐུན་མོང་གི་ངོས་འཛིན་གལ་ཆེན་དོན་འཁྱོལ་བྱས་ནས། ཨུ་རུ་སུ་དང་ཀྲུང་གོའི་ཁྲིམས་འཛུགས་སྒྲིག་གཞིའི་སྤེལ་རེས་མཉམ་ལས་ལ་ཤུགས་སྣོན་བརྒྱབ་སྟེ། རྒྱལ་ཁབ་གཉིས་པོའི་འབྲེལ་བར་གྲུབ་འབྲས་དེ་བས་མང་བ་ཐོབ་པར་ནུས་ཤུགས་ཡོད་རྒུས་སྐུལ་འདེད་གཏོང་བཞིན་ཡོད། ལོ་ངོ་80ཡི་གོང་། སུའུ་ལེན་དང་ཀྲུང་གོ་མི་དམངས་ཀྱིས་ཧྥ་ཤི་སི་ལས་རྣམ་པར་རྒྱལ་བར་ལེགས་སྐྱེས་གལ་ཆེན་ཕུལ་ཡོད། ཨུ་རུ་སུ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་ཐོབ་པར་དཀའ་བའི་རྒྱལ་ཁ་དེར་རྟེན་འབྲེལ་ཞུ་བ་དང་། སྔོན་གཤེགས་དཔའ་བོར་རྗེས་དྲན་ཞུས་ཏེ། ལག་གདང་སྦྲེལ་ནས་མཛེས་སྡུག་ལྡན་པའི་འབྱུང་འགྱུར་གཏོད་འདོད་ཡོད་ཅེས་གསུངས་པ་རེད།

    ཝང་དབྱི་དང་ཕེང་ཆིང་ཧྭ་མཇལ་འཕྲད་ལ་ཞུགས་པ་རེད།