མིག་སྐྱག་མང་པོ་འཁོར་ན་མིག་ནད་འདི་དག་ཕོག་ཉེན་ཆེ།

    རྒྱུན་དུ་འཚོ་བའི་ནང་མི་མི་ཉུང་བ་ཞིག་ཞོགས་པ་མལ་ལས་ལངས་དུས་མིག་ཟུང་ལ་མིག་སྐྱག་མང་པོ་འཁོར་གྱི་ཡོད།   དེ་དང་ལུས་པོའི་བདེ་ཐང་དབར་འབྲེལ་བ་དམ་ཟབ་ཡོད་དེ། ཁ་དོག་མི་འདྲ་བའི་མིག་སྐྱག་གིས་ནད་རིགས་ཀྱི་ཉེན་བརྡ་རེ་རེ་གཏོང་བཞིན་ཡོད།

    ཞོགས་པ་མལ་ལས་ལངས་དུས་མིག་སྐྱག་དཀར་པོའམ་སེར་སྐྱ་རིལ་བུའི་དབྱིབས་སམ་འབྱར་གཤིས་རྡོག་དབྱིབས་ཉུང་ཙམ་འཁོར་ན། དེ་ནི་མིག་ཟུང་གི་རྒྱུན་ལྡན་གྱི་རྙིང་ཚབ་གསར་བརྗེའི་ཐོན་དངོས་ཤིག་ཡིན་ལ།  མིག་ཆུ་རླངས་པར་གྱུར་རྗེས་ཀྱི་སྤྲི་དཀར་རྫས་དང་ལྷུང་བའི་ཕྲ་ཕུང་སོགས་མཉམ་བསྲེས་བྱས་ནས་གྲུབ་པ་ཡིན་པས། ནད་ཀྱི་ཉེན་ཁ་མེད་ལ་སེམས་ཁྲལ་ཡང་བྱེད་མི་དགོས་ཤིང་། ཁ་བཀྲུ་ལག་བཀྲུ་བྱེད་ཞོར་བཀྲུ་ཙམ་བྱས་ན་འགྲིག  འོན་ཀྱང་གལ་ཏེ་མིག་སྐྱག་གློ་བུར་དུ་མང་དུ་ཕྱིན་པ་མ་ཟད། ཁ་དོག་རྒྱུན་ལྡན་མིན་པ་བྱུང་ན་མིག་ནད་ཕོག་ཡོད་མིན་ལ་དོགས་ཟོན་བྱ་དགོས། 

    གཅིག མིག་སྐྱིའི་གཉན་ཚད།

    མིག་སྐྱིའི་གཉན་ཚད་ནི་ཆེས་རྒྱུན་མཐོང་གི་མིག་སྐྱག་འཁོར་མང་བའི་མིག་གི་ཕྱི་ངོས་ནད་ཅིག་ཡིན། དེར་འགོས་ནད་རང་བཞིན་གྱི་མིག་སྐྱིའི་གཉན་ཚད་དང་འགོས་ནད་རང་བཞིན་མིན་པའི་མིག་སྐྱིའི་གཉན་ཚད་ཁག་གཉིས་ཡོད།  མིག་སྐྱིའི་གཉན་ཚད་དེ་གཉིས་ལས་བྱུང་བའི་མིག་སྐྱག་ལ་ཁྱད་པར་ཡོད་པས། ཁ་དོག་དང་གཟུགས་དབྱིབས་ལ་གཞིགས་ནས་ནད་རིགས་དེ་གཉིས་གང་ཡིན་པ་ངོས་བཟུང་དགོས།

    འགོས་ནད་རང་བཞིན་གྱི་མིག་སྐྱིའི་གཉན་ཚད་ནི་རྒྱུན་པར་འབུ་ཕྲའི་རང་བཞིན་གྱི་ མིག་སྐྱིའི་གཉན་ཚད་དང་ནད་དུག་རང་བཞིན་གྱི་མིག་སྐྱིའི་གཉན་ཚད་ལ་ཟེར་གྱི་ཡོད།

    1 འབུ་ཕྲའི་རང་བཞིན་གྱི་མིག་སྐྱིའི་གཉན་ཚད། 

ཞོགས་པ་མལ་ལས་ལངས་དུས་མིག་སྐྱག་འབོར་ཆེན་འཁོར་ནས་མིག་གདངས་དཀའ་བར་གྱུར་བ་དང་། མི་མང་པོ་ཞིག་གིས་ལག་པས་ཨ་ན་ཨུ་ཚུགས་ཀྱིས་མིག་ལྕིབ་ཕྱེ་ན་མ་གཏོགས་མིག་བལྟ་མི་ཐུབ་པར་བརྗོད། མིག་སྐྱག་གི་ཁ་དོག་ནི་སེར་པོའམ་ལྗང་ཁུ་ཡིན། 

     2 ནད་དུག་རང་བཞིན་གྱི་མིག་སྐྱིའི་གཉན་ཚད།

    མིག་ནད་འདི་ནི་རྒྱུན་པར་གཤེར་རྨེན་ནད་དུག་འགོས་པ་ལས་བྱུང་བ་དང་དྭངས་ཁྲག་རིགས་མང་པོ་དང་འབྲེལ་བ་ཡོད་པ་མ་ཟད། ནད་པ་དང་ནད་པའི་མིག་སྐྱག་འགོས་པའི་ཅ་དངོས་བརྒྱུད་མི་གཞན་ལ་འགོས་ཀྱི་ཡོད་ཅིང་ཁ་དོག་ནི་ཆུའམ་སྐྱོ་མ་དང་འདྲ་པོ་ཡོད། 

     3 ཚོར་སྐྱེན་རང་བཞིན་གྱི་མིག་སྐྱིའི་གཉན་ཚད།

    ནད་དུག་རང་བཞིན་གྱི་མིག་སྐྱིའི་གཉན་ཚད་ཕུད། རྒྱུན་དུ་མཐོང་མང་བ་ནི་ཚོར་སྐྱེན་རང་བཞིན་གྱི་མིག་སྐྱིའི་གཉན་ཚད་ཡིན། མིག་སྐྱག་གི་ཁ་དོག་ནི་དཀར་པོ་འབྱར་རྩི་ལྟ་བུ་ཞིག་དང་དབྱིབས་ནི་དར་སྐུད་ཕྲ་མོ་ལྟ་བུ་ཞིག་ཡིན།

    གཉིས། མཆི་མའི་སྣོད་ཀྱི་གཉན་ཚད། 

    མཆི་མའི་སྣོད་ནི་མཆི་ལམ་མ་ལག་གི་གྲུབ་ཆ་གལ་ཆེན་ཞིག་ཡིན་ཞིང་། སྣ་རྩ་དང་མིག་འབྲས་ཟུར་གྱི་བར་དུ་གནས་ཡོད། མཆི་མའི་སྣོད་ཀྱི་གཉན་ཚད་ཕོག་ན་རྒྱུན་དུ་མཆི་མའི་སྣོད་ཀྱི་མཐའ་འཁོར་ལ་ན་ཟུག་གཏོང་བ་དང་། དམར་པོ་ཆགས་པ། སྐྲངས་སྦོས་ཐེབས་པ་བཅས་ཀྱི་ནད་རྟགས་ཐོན་སྲིད།  མཆི་མའི་སྣོད་ཁུལ་བཙིར་གནོན་བྱས་ན་འབྱར་ཁུའི་རང་བཞིན་གྱི་མིག་སྐྱག་སེར་པོ་ཐོན་གྱི་ཡོད།   གཤམ་གྱི་འགྱུར་ལྡོག་ཁག་བཞི་འབྱུང་སྐབས་ཁྱེད་ཀྱི་མིག་ལ་མིག་ནད་ཕོག་ཡོད་མིན་ལ་དོགས་ཟོན་བྱ་དགོས། 

    1 མིག་སྐྱག་སེར་པོ་མང་དུ་ཐོན་པ་མ་ཟད། མིག་འབྲས་དཀར་པོར་ཁྲག་ཐིག་དམར་པོ་མངོན་གསལ་གྱིས་ཇེ་མང་དུ་འགྲོ་བ། 

    2  མིག་སྐྱག་མང་དུ་ཕྱིན་པ་མ་ཟད། མིག་ཤེད་ཇེ་ཞན་ནས་ཇེ་ཞན་དུ་འགྲོ་བ། 

    3  མིག་སྐྱག་མང་དུ་ཕྱིན་པ་དང་དུས་མཚུངས་སུ་ཡང་ཡང་མིག་ལ་ཟ་འཕྲུག་ལངས་པ་དང་། མིག་ན་བ། མཐོང་སྣང་མི་བདེ་བ་སོགས་ཀྱི་ནད་རྟགས་ཐོན་པ།

    4  མིག་སྐྱག་མང་དུ་ཕྱིན་པ་མ་ཟད། མིག་ཟུར་དམར་པོ་ཆགས་ཤིང་སྐྲངས་པ། ན་ཟུག་སྐྱེད་པ་བཅས་བྱུང་བ། 

    གལ་ཏེ་གོང་གསལ་གྱི་ནད་རྟགས་དེ་དག་ཐོན་ཚེ། ངེས་པར་དུ་དུས་ཐོག་ཏུ་སྨན་ཁང་དུ་བསྐྱོད་དེ་མིག་ནད་ཚན་ཁག་གི་སྨན་པས་མིག་ནད་རིགས་གང་ཞིག་ཡིན་པ་བརྡར་ཤ་གཅོད་དུ་འཇུག་དགོས་པ་མ་ཟད། སྨན་བཅོས་ཡང་དག་བྱེད་དགོས་ལ། མིག་ནད་གང་ཞིག་ཡིན་པ་ངོ་ཐག་མ་ཆོད་པའི་སྔོན་ལ་མིག་སྨན་གང་བྱུང་དུ་བེད་སྤྱོད་བྱ་རྒྱུ་མེད། 

    གསུམ། མིག་སྐྱག་འཁོར་མང་བ་སྔོན་འགོག་བྱ་ཐབས།

    1 འཕྲོད་བསྟེན་གྱི་གོམས་གཤིས་བཟང་པོ་འཇགས་པ་བྱས་ཏེ་ལག་པ་བཙོག་པོས་མིག་ཕུར་ཕུར་གཏོང་མི་རུང་ཞིང་། ལག་པས་མིག་ལ་རེག་པའི་སྔ་རྗེས་སུ་ལག་པ་གཙང་མར་འཁྲུ་དགོས།

    2 མཚན་འཁྱོངས་གཏོང་བ་སོགས་མིག་ལ་གནོད་པའི་འཚོ་བའི་གོམས་གཤིས་ངན་པ་སྤོང་དགོས།

    3 ཡིབ་གཟུགས་མིག་ཤེལ་གྱོན་པའི་དུས་ཚོད་དང་མིག་འབྲས་མཛེས་བཟོའི་དུས་ཚོད་ཉུང་དུ་གཏོང་དགོས་པ་དང་། མིག་འབྲེལ་ཡོ་ཆས་དང་ལག་པའི་གཙང་སྦྲ་ཡག་པོ་བྱེད་དགོས།