《བོད་བཙན་པོའི་དུས་ཀྱི་མིང་བརྡ་ཞིབ་འཇུག》ཅེས་པ་པར་སྐྲུན་བྱས་པ།

རྩོམ་པ་པོ།     ཡིག་བསྒྱུར།       དུས་ཚོད།   2025-06-12   རྩོམ་ཁུངས།    མཚོ་སྔོན་བོད་ཡིག་ཚགས་པར།

    

    དེབ་འདི་ནི་དེང་གི་དུས་སུ་རིག་ཚན་ཡན་གར་དུ་བྱེད་པའི་ལུགས་དང་མཐུན་པར་མིང་བརྡ་རིག་པའི་གཞུང་ལུགས་སྤྱད་དེ། བོད་བཙན་པོའི་དུས་ཀྱི་བརྐོས་ཡིག་ཁག་གཞིར་བཟུང་སྟེ་བཙན་པོའི་དུས་སྐབས་ཀྱི་མིང་བརྡའི་གྲུབ་ཚུལ་དང་། མིང་བརྡའི་རྣམ་པ། མིང་བརྡའི་དབྱེ་བ། མིང་བརྡའི་སྒྲིག་གཞི། མིང་བརྡའི་འཕེལ་འགྱུར། མིང་བརྡར་ཤན་སྦྱོར་སྟངས་བཅས་ལ་གོ་རིམ་ཡོད་པའི་སྒོ་ནས་དཔྱད་ཞིབ་བགྱིས་ཏེ་ཞིབ་འཇུག་བྱས་ཡོད་ཅིང་། འདིས་བོད་སྐད་ཀྱི་བརྡ་སྤྲོད་རིག་པའི་མ་ལག་ཕྱོགས་ཡོངས་ནས་ཆ་ཚང་བར་འགྱུར་བ་ལ་ཕྱ་ར་གྲུ་འདེགས་ཀྱི་ཚུལ་དུ་ཕན་ནུས་ཙམ་ཐོན་ཨེ་ཐུབ་སྙམ་པའི་བློ་དང་བཅས་བརྩམས་པ་ལགས་སོ། །

    ཆེད་རྩོམ་འདི་ཉིད་སྤྱི་ལོ2018ལོར་རྒྱལ་ཁབ་སློབ་གསོ་པུའུ་ཡི་མི་གཞུང་སྤྱི་ཚོགས་ཚན་རིག་གི་ལས་གཞིའི་འབྲས་རྟགས་སུ་ཕུལ་ཅིང་། ད་ནི་དངོས་སུ་ཀློག་མཁན་ཀུན་གྱི་སྤྱན་ལམ་དུ་བསྟར་ཐུབ་བྱུང་ངོ་། །

    ཨ་བསེ་རིན་ཆེན་བཀྲ་ཤིས།  མཚོ་སྔོན་ཁྲི་ཀའི་སྒོ་མེ་ཡུལ་དུ་སྐྱེས།  མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེ་མོ་གཞོན་པ་དང་། རབ་འབྱམས་ཞིབ་འཇུག་སློབ་མའི་མཛུབ་སྟོན་དགེ་རྒན།སྐད་བརྡ་རིག་པའི་འབུམ་རམས་པ་བཅས་ཡིན། གཙོ་བོ་བོད་ཀྱི་བརྡ་སྤྲོད་དང་དེང་རབས་སྐད་བརྡ་རིག་པའི་སྐོར་ཀྱི་སློབ་ཁྲིད་དང་ཞིབ་འཇུག་གི་ལས་ཀ་སྒྲུབ་ཀྱིན་ཡོད། སྔ་ཕྱིར་མཚོ་སྔོན་མི་རིགས་དགེ་འོས་མཐོ་རིམ་ཆེད་སྦྱོང་སློབ་གྲྭ（ད་ལྟའི་མཚོ་སྔོན་དགེ་ཐོན་སློབ་ཆེན་མི་རིགས་དགེ་ཐོན་སློབ་གླིང）དང་།  མཚོ་སྔོན་མི་རིགས་སློབ་གྲྭ་ཆེན་མོ། ནུབ་བྱང་མི་རིགས་སློབ་ཆེན་སོགས་རིམ་པར་འགྲིམས་ཏེ་སློབ་གཉེར་བྱས། སློབ་གསོ་སློབ་ཁྲིད་ཀྱི་ཞོར་དུ་སྔ་རྗེས་སུ་བོད་རྒྱ་ཡིག་རིགས་གཉིས་ཀྱི་ལམ་ནས《བོད་ལྗོངས་ཞིབ་འཇུག》དང་།《བོད་ལྗོངས་སློབ་ཆེན་གྱི་རིག་དེབ》སོགས་སུ་རིག་གཞུང་དཔྱད་རྩོམ་བཞི་བཅུ་ལྷག་སྤེལ་བ་དང་། ཆེད་དེབ་ལ《བོད་ཀྱི་དག་ཡིག་རིག་པའི་རྣམ་གཞག་མདོར་བསྡུས་རིག་པའི་གོ་རྫོང》དང་《བོད་བཙན་པོའི་དུས་ཀྱི་མིང་བརྡ་ཞིབ་འཇུག》གཉིས་དང་། འགྱུར་དེབ་ལ《བཅའ་ཁྲིམས་ཀྱི་རྨང་གཞིའི་ཤེས་བྱ》མཉམ་བསྒྲུབ་ཀྱི་ཆེད་དེབ་ལ་《མཚོ་བོད་མཐོ་སྒང་གི་རི་ཆུ་རིག་གནས་ལས་མཚོ་ཤར་ཁུལ་གྱི་གླེགས་བམ》《མཚོ་སྔོན་གནས་རི་གྲགས་ཅན་གྱི་ལོ་རྒྱུས（རྒྱ་ཡིག）》གཉིས་བཅས་པར་དུ་བསྐྲུན། རྒྱལ་ཁབ་རིམ་པའི་ལས་གཞི་བཅུ་ལྷག་ལ་ཞུགས་པ་མ་ཟད། རྒྱལ་ཁབ་རིམ་པའི་ལས་གཞི་གཉིས་མགོ་འཛིན་གྱིས་མཇུག་བསྡུས་ཤིང་། ད་ལྟ་རྒྱལ་ཁབ་སློབ་གསོ་པུའུ་ཡི་ལས་གཞི་གཅིག་གཉེར་མུས་སུ་མཆིས། སྔ་གཞུག་ཏུ་མཚོ་སྔོན་ཞིང་ཆེན་གྱི་དཔེ་སྟོན་མི་སྒེར་དང་མཚོ་སྔོན་ཁུ་ནུའི་འཇོན་མིའི་གྲས་སུ་བདམས་ཐོན་བྱུང་།


分享到：QQ空间新浪微博腾讯微博人人网微信