སོན་རྩེ་ལས་བཞད་པའི་སྒྱུ་རྩལ་གྱི་མེ་ཏོག—ལྷ་བཟོ་ཆོས་མཚོ་དང་མོའི་ཐང་ག་སྒྱུ་རྩལ་ལ་སྙེག་པའི་ལོ་ཟླ།

        ལྷ་བཟོ་ཆོས་མཚོ་ནི་སེམས་ཀྱི་ཉི་ཟླ་གྲོང་ཁྱེར་རྒྱལ་ཐང་གྲོང་རྡལ་ནས་ཡིན་པ་རེད། ཆུང་དུས་ནས་རི་མོ་འབྲི་རྒྱུར་ཤིན་ཏུ་དགའ། སྐལ་བ་ཞིག་གིས་མོ་རང་ཆུང་དུས་སུ་མཚོ་སྔོན་དུ་སོང་ནས་ལོ་ལྔ་དྲུག་ཙམ་ལ་ཐང་ག་འབྲི་སྦྱང་བྱས་པ་རེད། སློབ་དཔོན་གྱི་མདུན་ནས་དཀའ་སྤྱད་འབད་བརྩོན་གྱིས་ཐང་གའི་རས་གཞི་བརྡར་སྟངས་དང་། ཐིག་རྩ་འབྲི་སྟངས། རྡུལ་ཚོན་བཏུལ་སྟངས། ཚོན་རྒྱག་སྟངས་སོགས་སྦྱངས་ནས་ཕྱིར་རང་གི་ཕ་ཡུལ་དུ་ལོག ལོ་གང་མང་རིང་ལས་གཏོད་ཀྱི་ལམ་ལ་འབད། ཟ་ཁང་དང་མགྲོན་ཁང་སོགས་ཕྱེས་ནས་ཁྱིང་ཚང་གི་ཡོང་འབབ་བཙལ། འོན་ཀྱང་རང་གི་ཐོག་མའི་བསམ་འདུན་དེ་ལྷ་བཟོ་ཞིག་བྱེད་རྒྱུ་དེ་མ་དོར་བར། རང་ལ་ཁོམ་ལོང་ཡོད་དུས་སུ་མུ་མཐུད་དུ་ཐང་ག་འབྲི་བ་དང་། པུར་སྨྱུག་དང་ཚོན་སོགས་ཉོས་ནས་ཕུགས་བསམ་མངོན་འགྱུར་བྱུང་བར་འབད་འབུངས་གང་མང་བྱས། 2022ལོར་མོ་རང་རྡོ་མཁར་རྗོང་དུ་ཐང་ག་སྒྱུ་རྩལ་ཁང་ཕྱེས་པ་དང་། 2023ལོར་ཁུལ་རིམ་པའི་ཐང་གའི་མངོན་མིན་རིག་གནས་ཤུལ་བཞག་མཁན་གྱི་རྒྱུན་འཛིན་པར་བསྐོས་པ་མ་ཟད། མོ་ནི་བདེ་ཆེན་ཁུལ་གྱི་ཐང་གའི་རྒྱུན་འཛིན་པ་བུད་མེད་གཅིག་པུ་ཡིན་པ་རེད། མོས་བཞེངས་པའི་བརྩམས་ཆོས་《བདེ་ཆེན་ཕོ་བྲང་》སོགས་ལ་ཀྲུང་གོའི་ཐང་གའི་སྒྱུ་རྩལ་དུས་ཆེན་སྟེང་བྱ་དགའ་གང་མང་ཐོབ་ལ། ཡུན་ནན་ཞིང་ཆེན་ཡོངས་ཀྱི་མངོན་མིན་རིག་གནས་ཤུལ་བཞག་འགྲེམ་སྐོར་དང་རིག་གནས་དང་རང་བྱུང་ཤུལ་བཞག་ཉིན་གྱི་དྲིལ་བསྒྲགས་བྱེད་སྒོ་སོགས་སུ་ཞུགས་ནས་ཡུན་ནན་ཞིང་ཆེན་རིག་གནས་དང་ཡུལ་སྐོར་ཐིང་དང་ཡུན་ནན་ཞིང་ཆེན་མངོན་མིན་རིག་གནས་ཤུལ་བཞག་སྲུང་སྐྱོང་ལྟེ་གནས་ཀྱིས་ཀྱང་བྱ་དགའ་གང་མང་གནང་བ་རེད།

        གནའ་དེང་ཟུང་འབྲེལ་གྱིས་རིག་གནས་རྒྱུན་འཛིན་གྱི་ལས་ལ་འབད།

        ཆོས་མཚོས་ཐང་ག་ནི་མཆོད་རྫས་གལ་ཆེན་ཞིག་ཡིན་པ་མ་ཟད། བོད་ཀྱི་རིག་གནས་དང་མཛེས་དཔྱོད་རིག་པའི་སྒྱུ་རྩལ་གྱི་གཅེས་ནོར་ཞིག་ཀྱང་ཡིན། གནའ་བོའི་སྒྱུ་རྩལ་དེ“གསོན་པོ”དང་མི་དེ་བས་མང་བ་རྒྱུས་ལོན་བྱ་ཆེད།  མོས་རང་ཉིད་ཀྱི་ཐང་གའི་ཉམས་ལེན་ཁང་སྟེ་ཐང་ག་སྒྱུ་རྩལ་ཁང་འདི་ཕྱེ་བ་ཡིན། མོས་སྲོལ་རྒྱུན་གྱི་ལག་རྩལ་དེ་གསོན་ཉམས་ལྡན་ཞིང་སྤྲོ་སྣང་ལྡན་པའི་སློབ་ཚན་ཞིག་ཏུ་བསྒྱུར་བ་དང་། སྒོ་དབྱེ་མཉམ་སྤྱོད་ཀྱི་བྱེད་སྟངས་དེ་རིགས་ཀྱིས་ཐང་གའི་ཤེས་བྱ་ཁྱབ་གདལ་བཏང་བ་མ་ཟད། མི་དེ་བས་མང་བ་སྒྱུ་རྩལ་དེར་དགའ་པོ་བྱེད་མཁན་དང་ཁྱབ་སྤེལ་གཏོང་མཁན་ཞིག་ཏུའང་གྱུར་ཡོད། རང་མི་རིགས་ཀྱི་རིག་གནས་ཀྱང་རང་གི་ནུས་ཚོད་ཀྱིས་དྲིལ་བསྒྲགས་བྱས་པ་ཡིན་ཅེས་བཤད་བྱུང་།

        ཀྲེ་ཅང་ནས་ཡོང་བའི་ཡུལ་སྐོར་བ་ལྕམ་མོ་ཡུས་ཀྱིས་བློ་སེམས་གཅིག་སྒྲིམ་གྱིས་དུང་དཀར་ལ་ཚོན་གཏོང་བཞིན་འདུག མོས་ཐེངས་དང་པོ་སེམས་ཀྱི་ཉི་ཟླར་ཡུལ་སྐོར་དུ་འོང་བ་ཡིན།  དྲ་ངོས་སུ་སེམས་ཀྱི་ཉི་ཟླར་ཐོན་ནས་ངེས་པར་དུ་ཐང་ག་སྒྱུ་རྩལ་ཁང་དུ་སོང་ནས་ཐང་ག་འབྲི་རྒྱུ་ཉམས་ལེན་བྱེད་དགོས་ཞེས་ངོ་སྤྲོད་མང་པོ་རྒྱབ་ཡོད།    དེ་རིང་ངས་ཆེད་དུ་གནས་འདི་རུ་ཡོང་བ་ཡིན།  མོ་ལ་མཚོན་ན་ཐོག་དང་པོ་བོད་ཀྱི་རིག་གནས་ལ་རྒྱུས་ལོན་བྱས་པ་མ་ཟད།   ཐང་ག་ཡང་ཐེངས་དང་པོ་བྲིས་པ་ཡིན། ངས་དུས་ཚོད་ཐུང་ཐུང་གི་ནང་དུ་ཐང་ག་ནི་ཇི་ལྟ་བུ་ཞིག་ཡིན་པ་དང་རིས་གཞི་ནི་ཅི་ཡིན་པ། པུར་སྨྱུག་ལ་བརྟེན་ནས་ཚོན་ཅི་ལྟར་གཏོང་བ་སོགས་ལ་རྒྱུས་ལོན་བྱས་པ་མ་ཟད། རང་ཉིད་ཀྱིས་བྲིས་པའི་ཐང་ག་ཞིག་ཡང་ཡོད་པས་དངོས་ནས་དོན་སྙིང་ལྡན།  སེམས་ལ་ཡང་ཧ་ཅང་སྐྱིད་སོང་ཞེས་བཤད་བ་། 

        ཧྲང་ཧའེ་ནས་ཡོང་བའི་ཡུལ་སྐོར་བ་བཟའ་ཟླ་ཀྲང་ཡང་བཀྲ་ཤིས་རྟགས་བརྒྱད་ལས་དུང་དཀར་ལ་ཚོན་གཏོང་བཞིན་འདུག ཁོང་བཟའ་ཟླ་གཉིས་ཀྱིས་དུས་ཚོད་3ཙམ་རིང་སྒྱུ་རྩལ་ཁང་དུ་ཐང་ག་ཉམས་ལེན་ལ་ཞུགས་པ་རེད། སྐུ་ཞབས་ཡུས་ཀྱིས་ཁོས་ཐེངས་དང་པོར་ཐང་ག་བྲིས་པ་ཡིན། ཉམས་ལེན་གྱི་ཚོར་བ་ཤིན་ཏུ་བཟང་། དུས་ཚོད་ཐུང་ཐུང་ནང་དུ་ཐང་ག་ལ་རྒྱུས་ལོན་བྱེད་ཐུབ་སོང་། རྗེས་ཕྱོགས་ད་དུང་ཐང་ག་འབྲི་རྒྱུར་ཉམས་ལེན་བྱེད་ན་འདོད་ཅེས་བཤད་བྱུང་།

        ལོ་འདི་དག་ག་ས་གང་དུ་ཞིབ་འཇུག་སློབ་སྦྱོང་གི་ཚ་རླབས་འཕྱུར་འདུག ཐང་ག་སྒྱུ་རྩལ་ཁང་དུའང་ཞིབ་འཇུག་སློབ་སྦྱོང་དུ་ཡོང་མཁན་གྱི་སློབ་མ་ཤིན་ཏུ་མང་། འོ་ཡ་ཡ། སློབ་མ་དུ་ཡོད། སློབ་མ་80སྐོར་ཁག་གཉིས་བགོས་ནས་ཐང་ག་འབྲི་དགོས། སང་ཉིན་འདིར་ཡོང་ན་ཆོག་ཅེས་ཆོས་མཚོས་ཁ་པར་ནང་ནས་མགྲོན་པོ་ཞིག་ལ་སྐད་བརྡ་འཇོག་བཞིན་ཡོད། ཆོས་མཚོས་སྒྱུ་རྩལ་ཁང་དུ་ཤང་ཀང་སློབ་ཆེན་དང་ཡུན་ནན་སློབ་ཆེན་སོགས་ཀྱི་སློབ་མས་གནས་འདིར་ཞིབ་འཇུག་སློབ་སྦྱོང་དུ་འོང་ཡོད། ཁོང་ཚོ་བོད་ཀྱི་རིག་གནས་ལ་དགའ་ཞེན་ཆེ། སང་ཉིན་ཡང་ས་དམ་ནས་སློབ་མ་80ཙམ་གནས་འདིར་ཡོང་རྒྱུ་རེད། ངས་གྲ་སྒྲིག་ལེགས་པོ་བྱེད་དགོས། རང་གི་སྒྱུ་རྩལ་ཁང་ཆུང་ཆུང་འདི་རྒྱང་རིང་གི་སྐུ་མགྲོན་ཚོས་སེམས་ཀྱི་ཉི་ཟླའི་དམངས་སྲོལ་རིག་གནས་དང་བོད་ཀྱི་ཐུན་མོང་མ་ཡིན་པའི་རིག་གནས་ལ་རྒྱུས་ལོན་བྱེད་སའི་སྐར་ཁུང་ལྟ་བུ་ཞིག་ཏུ་གྱུར་པར་འབད་བརྩོན་བྱེད་ཀྱི་ཡོད་ཅེས་བཤད་བྱུང་།

        སྒྱུ་རྩལ་གྱི་རིན་ཐང་གིས་མི་ཡུལ་ལ་བྱམས་བརྩེའི་འོད་སྣང་བསྩལ།