བདེ་ཆེན་གྱིས་བོད་ལུགས་གསོ་རིག་བྱ་གཞག་འཕེལ་རྒྱས་ལ་སྐུལ་འདེད་བཏང་།

    ཐོག་མཐའ་བར་གསུམ་དུ། བདེ་ཆེན་ཁུལ་ཨུ་དང་ཁུལ་སྲིད་གཞུང་གིས་《ཀྲུང་བོད་སྨན་བཅོས་བྱ་གཞག་གི་འཕེལ་རྒྱས་ལ་ཚད་མཐོའི་མཐོང་ཆེན་བྱས་ཏེ་སྔ་རྗེས་སུ་ཀྲུང་བོད་སྨན་རྫས་བྱ་གཞག་འཕེལ་རྒྱས་ལ་རོགས་སྐྱོར་དང་སྐུལ་འདེད་གཏོང་རྒྱུའི་སྐོར་གྱི་ལག་བསྟར་བསམ་འཆར།》《ཀྲུང་བོད་སྨན་བཅོས་རྒྱུན་འཛིན་གསར་གཏོད་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་ལག་བསྟར་བསམ་འཆར།》སོགས་འབྲེལ་ཡོད་རོགས་སྐྱོར་སྲིད་ཇུས་དང་འཕེལ་རྒྱས་བྱ་ཐབས་བཟོས་ནས་བཏོན་པ་དང་། ཀྲུང་བོད་སྨན་བཅོས་ཀྱི་ཁྱད་ལྡན་ཞབས་ཞུ་དང་།གཞུང་འཛུགས་ཀྲུང་བོད་སྨན་ཁང་གི་རྨང་གཞིའི་སྒྲིག་བཀོད་འཛུགས་སྐྲུན། གཙོ་གནད་རིག་ཚན་དང་གཙོ་གནད་ཆེད་སྦྱོང་ཚན་ཁག་འཛུགས་སྐྲུན། ཀྲུང་བོད་སྨན་བཅོས་ཀྱི་ཤེས་ལྡན་མི་སྣ་གསོ་སྐྱོང་དང་སྨན་ཁང་ནང་གི་སྨན་རྫས་ཞིབ་འཇུག་གསར་སྤེལ་བཅས་བྱེད་པར་གཙོ་གནད་དུ་རྒྱབ་སྐྱོར་བྱས་ཏེ། བདེ་ཆེན་གྱི་དོན་དངོས་དང་མཐུན་པའི་ཀྲུང་བོད་སྨན་བཅོས་འཕེལ་རྒྱས་ཀྱི་འགྲོ་ལམ་ཞིག་བཏོད་པ་རེད།

    ད་ལོར། རང་ཁུལ་གྱིས་ད་དུང་《བདེ་ཆེན་ཁུལ་གྱིས་ཀྲུང་བོད་སྨན་བཅོས་དར་རྒྱས་གོང་འཕེལ་ལ་སྐུལ་འདེད་གཏོང་བའི་འདུ་འགོད་གལ་ཆེན་གྱི་ལག་བསྟར་ཇུས་གཞི་》བཏོན་ནས་ཀྲུང་བོད་སྨན་བཅོས་ཀྱི་ཚན་ཞིབ་གསར་གཏོད་ལ་སྐུལ་འདེད་གཏོང་བ། ཀྲུང་བོད་སྨན་བཅོས་ཀྱི་སྤུས་ཚད་མཐོ་རུ་དང་དེ་བཞིན་ཐོན་ལས་འཕེལ་རྒྱས་ལ་སྐུལ་འདེད་གཏོང་བ། “ཀྲུང་བོད་སྨན་བཅོས་+བདེ་ཐང་ཡུལ་སྐོར་”མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ་སོགས་ཕྱོགས་7གྱི་ལས་འགན་གཙོ་གནད་ཐོག་བཀོད་སྒྲིག་བྱས་ཏེ་སླད་ཕྱིན་དུས་སྐབས་ཤིག་རིང་གི་བོད་ལུགས་སྨན་བཅོས་སྤུས་ཚད་མཐོ་བའི་འཕེལ་རྒྱས་ལ་ཁ་ཕྱོགས་བཏོན་པ།

    ཉེ་བའི་ལོ་ཤས་རིང་། བདེ་ཆེན་ཁུལ་ཀྲུང་བོད་སྨན་བཅོས་ཀྱི་ཞབས་ཞུའི་ནུས་པ་རྒྱུན་མཐུད་ངང་མཐོ་རུ་ཕྱིན་པ་དང་གོང་འོག་མཉམ་འགུལ། ལེགས་ཆ་གསབ་རེས། ཐོན་ཁུངས་མཉམ་སྤྱོད། ཐུན་མོང་ཐོག་འཕེལ་རྒྱས་གཏོང་བའི་བདེ་ཆེན་གྱི་ཀྲུང་བོད་སྨན་བཅོས་འཁོར་སྐྱོད་ལམ་སྲོལ་རིམ་བཞིན་བཙུགས་པ་དང་བདེ་ཆེན་ཁུལ་ཀྲུང་བོད་སྨན་བཅོས་མཉམ་འབྲེལ་ཁང་གིས་གཞི་རིམ་གྱི་ཀྲུང་བོད་སྨན་བཅོས་གྱི་ཞབས་ཞུའི་ནུས་པ་མཐོ་རུ་གཏོང་བའི་འདུ་འགོད་ལ་སྐུལ་འདེད་གཏོང་རྒྱུ་གོ་སྐབས་སུ་བྱས་ཏེ་ཀྲུང་བོད་སྨན་བཅོས་ཀྱི་འཕྲོད་བསྟེན་ལག་རྩལ་ཁྱབ་གདལ་བེད་སྤྱོད་བྱེད། མིག་སྔར། བདེ་ཆེན་ཁུལ་གྱི་ཤང་གྲོང་འཕྲོད་བསྟེན་ཁང་དང་སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་100%་ཡིས་རིགས་6་དང་རྣམ་གྲངས་10་ཡན་གྱི་ཀྲུང་བོད་སྨན་བཅོས་འཕྲོད་བསྟེན་ལག་རྩལ་མཁོ་འདོན་བྱེད་ཐུབ་པ། སྡེ་ཁུལ་འཕྲོད་བསྟེན་ཞབས་ཞུའི་ས་ཚིགས་100%དང་གྲོང་ཚོའི་འཕྲོད་བསྟེན་ཁང་87.8%ཀྱིས་རིགས་4དང་རྣམ་གྲངས་6ཡན་གྱི་ཀྲུང་བོད་སྨན་བཅོས་འཕྲོད་བསྟེན་ལག་རྩལ་མཁོ་འདོན་བྱེད་ཐུབ་པ།

    མིག་སྔར། མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་གིས་བདེ་ཆེན་ཁུལ་ལ་བོད་ལུགས་གསོ་རིག་གི་ཆེད་ལས་ཤེས་ལྡན་མི་སྣ་200་ལྷག་ཙམ་གསོ་སྐྱོང་བྱས་པ། བོད་ལྗོངས་བོད་ལུགས་གསོ་རིག་སློབ་ཆེན་གྱིས་བདེ་ཆེན་ཁུལ་ལ་བོད་ལུགས་གསོ་རིག་གི་ཤེས་ལྡན་མི་སྣ་80་ལྷག་ཙམ་གསོ་སྐྱོང་བྱས་པས་བདེ་ཆེན་ཁུལ་བོད་ལུགས་སྨན་བཅོས་ཀྱི་ཤེས་ལྡན་མི་སྣ་དཀོན་པའི་གནད་དོན་ཞི་ལྷོད་དུ་གཏོང་བ། མིག་སྔར་ཁུལ་ཡོངས་ཀྱིས་རིམ་རྩིས་བྱས་ན་ཀྲུང་ལུགས་གསོ་རིག་རིགས་ཀྱི་སྨན་སློབ་མ་52རིན་མི་དགོས་པའི་གསོ་སྐྱོང་བྱས་ཡོད། རྒྱལ་ཡོངས་ཀྱི་ཀྲུང་ལུགས་གསོ་རིག་(གྲངས་ཉུང་མི་རིགས་ཀྱི་གསོ་རིག་) གི་ཕུལ་བྱུང་ཤེས་ལྡན་མི་སྣ་2གསོ་སྐྱོང་བྱས་པ། ཞིང་ཆེན་ཡོངས་ཀྱི་དགེ་རྒན་གྱིས་དགེ་ཕྲུག་ཁྲིད་དེ་ཀྲུང་ལུགས་གསོ་རིག་རྒྱུན་འཛིན་བྱེད་པའི་ཤེས་ལྡན་མི་སྣ་13ཡོད།