རྣམ་འཇོམས་ཀྱིས་འོས་སྦྱོར་བྱས་པའི་དཔེ་དེབ་ས་སྐྱ་ལེགས་བཤད།

 འཛམ་གླིང་དཔེ་ཀློག་ཉིན་མོ་སླེབས་ལ་ཉེ་བའི་སྐབས་སུ་ངས་ཚང་མར་ངོ་སྤྲོད་བྱེད་འདོད་པའི་དཔེ་ཆ་ནི་ས་སྐྱ་གོང་མ་རྣམ་ལྔ་ཞེས་ཡོངས་སུ་གྲགས་པའི་ཡ་གྱལ་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོས་མཛད་པའི་ལེགས་པར་བཤད་པའི་རིན་པོ་ཆེའི་གཏེར་རམ་ས་སྐྱ་ལེགས་བཤད་ཡིན།

     ས་སྐྱ་པཎྜི་ཏ་ཀུན་དགའ་རྒྱལ་མཚན་ནི་བོད་རབ་བྱུང་གསུམ་པའི་ཆུ་སྟག་ལོ་སྟེ་སྤྱི་ལོ1182ལོར་གདན་ས་ཆེན་པོ་དཔལ་ལྡན་ས་སྐྱར་སྐུ་བལྟམས་པ་དང་། དགུང་གྲངས་བདུན་ཅུ་པ་རང་བྱུང་བཞི་པའི་ལྕགས་ཕག་ལོ་སྟེ་སྤྱི་ལོ་1251ལོར་རྒྱ་ནག་ལང་ཇུ་སྡེ་བཞིར་གྲགས་པ་དེང་གི་ཀན་སུའུ་ཝུའུ་ཝེ་གྲོང་ཁྱེར་དུ་དགོངས་པ་ཆོས་དབྱིངས་སུ་ཐིམ། ས་སྐྱ་ལེགས་བཤད་ནི་བོད་རང་གི་མཚན་ཉིད་རིག་པའི་ལེགས་བཤད་བསླབ་བྱ་ཕྱོགས་བསྒྲིགས་བྱས་པ་ཐོག་དང་པོ་ཡིན་པ་དང་། ཁོང་གིས་ལེགས་བཤད་སྙན་ངག་གི་རྣམ་པའི་ཐོག་ནས་སྤྱི་ཚོགས་ཀྱི་སྣང་ཚུལ་སྣ་ཚོགས་ལ་ལྟ་ཞིབ་དང་དཔྱད་གཏམ་བརྗོད་པ་མ་ཟད། འཇིག་རྟེན་པའི་འགྲོ་ལུགས་དང་། སློབ་གཉེར་བྱེད་སྟངས། མི་ལ་ངོས་འཛིན། བྱ་དངོས་ལ་བརྟག་དཔྱད། མཁས་པ་བརྟག་པ་སོགས་ཀྱི་རབ་ཏུ་བྱེད་པ་དགུར་དབྱེ་བའི་སྒོ་ནས་གསལ་བར་བསྟན་པའི་བསྟན་བཅོས་ཕུལ་དུ་བྱུང་བ་ཞིག་ཡིན་ལ། དེའི་ནང་ལེགས་བཤད་457ཚུད་ཡོད་པས། བོད་ཀྱི་སྐུ་དྲག་ཚོས་མི་རབས་ནས་མི་རབས་བར་ཀློག་འདོན་བྱེད་པའི་བློ་གྲོས་ཀྱི་གཅེས་ནོར་ཞིག་ཏུ་བརྩི་བཞིན་ཡོད། 

    ས་སྐྱ་ལེགས་བཤད་ནི་བོད་རིགས་རྩོམ་རིག་གི་བརྩམས་ཆོས་གལ་ཆེན་ཞིག་ཡིན་པ་མ་ཟད། བོད་རིགས་ཀྱི་ལོ་རྒྱུས་དང་རིག་གནས་ལ་ཞིབ་འཇུག་བྱེད་པའི་རྩ་ཆེའི་དཔྱད་གཞི་ཞིག་ཀྱང་ཡིན། དེའི་ཐུན་མོང་མ་ཡིན་པའི་རྩོམ་རིག་གི་རིན་ཐང་དང་གཏིང་ཟབ་པའི་བསམ་བློའི་ནང་དོན་གྱིས་རྗེས་རབས་པར་ཤུགས་རྐྱེན་ཟབ་མོ་ཐེབས་ཡོད།

     དཔེ་ཆའི་ཁྲོད་ཀྱི་ལེགས་བཤད་རེ་རེ་ནི་དེ་འདྲའི་སྟབས་བདེ་ཞིང་གོ་སླ་བ་ཞིག་ཡིན་པ་མ་ཟད། དོན་སྙིང་ཧ་ཅང་ཆེན་པོ་ལྡན། ཁོང་གི་བློ་གྲོས་དང་བློ་ཁོག་གིས་བོད་ཀྱི་རིག་གནས་ལ་ཤུགས་རྐྱེན་ཟབ་མོ་ཐེབས་པ་མ་ཟད། དེ་ལས་ཀྱང་རྒྱ་ཆེ་བའི་མི་རྣམས་ལའང་ཤུགས་རྐྱེན་ཟབ་མོ་ཐེབས་ཡོད། ས་སྐྱ་ལེགས་བཤད་ཀློག་པ་ནི་དེ་བས་ཀྱང་མི་ཚེ་དང་མཚན་ཉིད་རིག་པར་བསམ་གཞིགས་བྱས་པ་ཞིག་རེད། བོད་རིགས་མཁས་དབང་ཡིན་ནའང་འདྲ། ཡང་ན་སྤྱིར་བཏང་གི་ཀློག་པ་པོ་ཡིན་ནའང་འདྲ། ཚང་མས་དེའི་ཁྲོད་ནས་སངས་རྒྱས་ཆོས་ལུགས་ཀྱི་མཚན་ཉིད་རིག་པ་དང་འཇིག་རྟེན་གནས་ལུགས་ཀྱི་བདེན་ལུགས་ཤེས་རྟོགས་གཏིང་ཟབ་བྱེད་ཐུབ། རྩོམ་རིག་གི་གཅེས་ནོར་འདི་ཀློག་པར་བྱེད་ན། ང་ཚོས་སྐབས་དེའི་སྤྱི་ཚོགས་ཀྱི་བསམ་པའི་རླབས་རྒྱུན་དང་། ཀུན་སྤྱོད་ཀྱི་ཚད་གཞི། ཆོས་ལུགས་ཀྱི་འདུ་ཤེས། ཡུལ་སྲོལ་གོམས་གཤིས་བཅས་ཤེས་རྟོགས་བྱེད་ཐུབ། འདི་ཡང་ཐེངས་མང་པོར་ཀློག་རིན་ཡོད་པའི་མི་ཆོས་གསུང་རབ་ཅིག་ཡིན། དེ་བས་མདོར་དེད་ན། འཛམ་གླིང་དཔེ་ཀློག་ཉིན་མོ་དང་བསྟུན་ནས་ང་ཚོས་ག་དུས་ཡིན་ཡང་། གང་དུ་གནས་ཀྱང་། དཔེ་ཀློག་ལ་གོམས་པར་བྱའོ། །