བོད་ལྗོངས་ཀྱི་ལྗོངས་རིམ་པའི་མཛེས་རྩལ་ཁང་ཐོག་མ་སྒོ་འབྱེད་པ།

འདི་ནི་ཟླ11པའི་ཚེས15ཉིན་པར་བླངས་པའི་བོད་ལྗོངས་མཛེས་རྩལ་ཁང་གི་ཟུར་ཞིག་ཡིན།

     ཟླ11པའི་ཚེས15སྔ་དྲོར། “མཐོ་སྒང་གི་ཡིད་སྣང་སྟེ་བོད་ལྗོངས་མཛེས་རྩལ་ཁང་སྒོ་འབྱེད་འགྲེམ་སྟོན”གྱི་མཛད་སྒོ་ལྷ་ས་གྲོང་ཁྱེར་ནས་སྤེལ་བ་རེད། ཐེངས་འདིའི་སྒོ་འབྱེད་འགྲེམ་སྟོན་ནང“བོད་ལྗོངས་བརྗོད་བྱའི་དེང་རབས་མཛེས་རྩལ་གྲུབ་འབྲས་འགྲེམ་སྟོན”དང“ཐང་ག་རྩེ་གྲ་འགྲེམ་སྟོན་རྒྱུད་འཛིན་དང་གསར་སྤེལ”སོགས་ཀྱི་འགྲེམ་ཁང་འདུས་པས། ཝུའུ་ཙུའོ་རེན་དང་ལི་ཁུ་རན། ཨ་མདོ་བྱམས་པ་སོགས་ཀྱི་སྒྱུ་རྩལ་པ་མིང་གྲགས་ཀྱི་བརྩམས་ཆོས300འགྲེམ་སྟོན་བྱས།

འདི་ནི་ཟླ11པའི་ཚེས15ཉིན་ལྟད་མོ་པས་བོད་ལྗོངས་མཛེས་རྩལ་ཁང་གི་བརྩམས་ཆོས་ལ་གཟིགས་བཞིན་པའི་ཚུལ་རེད།

    ངོ་སྤྲོད་ལྟར་ན། བོད་ལྗོངས་མཛེས་རྩལ་ཁང་ནི་བོད་རང་སྐྱོང་ལྗོངས་ཀྱི་རིག་གནས་རྣམ་གྲངས་གཙོ་བོ་ཡིན་པ་མ་ཟད། བོད་ལྗོངས་ཡོངས་ཀྱི་ལྗོངས་རིམ་པའི་མཛེས་རྩལ་ཁང་ཐོག་མ་ཡིན། 2020ལོའི་ཟླ3པར་བོད་ལྗོངས་མཛེས་རྩལ་ཁང་སྐྲུན་མགོ་ཚུགས་པ་དང་། 2023ལོའི་ཟླ11པར་བོད་ལྗོངས་མཛེས་རྩལ་ཁང་འཛུགས་སྐྲུན་མཇུག་སྒྲིལ་ནས་རྩིས་ལེན་བྱས།

འདི་ནི་ཟླ11པའི་ཚེས15ཉིན་ལྟད་མོ་པས་བོད་ལྗོངས་མཛེས་རྩལ་ཁང་ནང་གི་རྡོ་བརྐོས་བརྩམས་ཆོས་ཞིག་ལ་ལྟ་བཞིན་པའི་ཚུལ་རེད།

    བོད་ལྗོངས་མཛེས་རྩལ་ཁང་ལ་ལྟེ་གནས་ཁུལ་དང་སྒྱུ་རྩལ་རོལ་མྱོང་ཁུལ། སྒྱུ་རྩལ་པའི་བཅའ་སྡོད་གསར་སྤེལ་རྟེན་གཞི་དང་སྒྱུ་རྩལ་ཁྲོམ་ར་སོགས་ཀྱི་བྱེད་ནུས་ཁུལ་བཞི་འདུས་ཤིང་། ས་བཟུང་ཚད་སྤྱི་ཆིང4.7ཟིན་ཞིང་སྤྱིའི་འཛུགས་སྐྲུན་རྒྱ་ཁྱོན་སྨི་གྲུ་བཞི་མ32825ཟིན་ཡོད། 

    རྒྱུས་ལོན་ལྟར་ན། ཐེངས་འདིའི་སྒོ་འབྱེད་འགྲེམ་སྟོན་ཟླ11པའི་ཚེས17བར་རྒྱུན་བསྐྱང་རྒྱུ་རེད། །