བདེ་ཆེན་གྱིས་སྣོད་བཅུད་སྲུང་སྐྱོང་ལ་སྐུལ་འདེད་བཏང་།

    ཡུན་ནན་ནུབ་བྱང་རྒྱུད་དུ་གནས་པའི་བདེ་ཆེན་བོད་རིགས་རང་སྐྱོང་ཁུལ་ནི་འབྲི་ཆུའི་སྟོད་རྒྱུད་ཀྱི་སྣོད་བཅུད་སྲུང་ཡོལ་གལ་ཆེན་ཞིག་རེད། ཉེ་བའི་ལོ་ཤས་རིང་ས་གནས་དེ་གས་སྣོད་བཅུད་སྲུང་སྐྱོང་དང་བེད་སྤྱོད་ལ་སྐུལ་འདེད་བཏང་ནས་འབྲི་ཆུའི་སྔོ་ཞིང་དྭངས་བའི་ཆུ་མོ་སྲུང་སྐྱོང་བྱས་ཡོད།

    ཆར་པ་སིམ་སིམ་བབས་རྗེས་ལིའོ་ཁྲུན་ཧྭ་རང་ཁྱིམ་གྱི་སྡོང་ཕྲུག་ར་བའི་རྟེན་གཞིར་ཡོང་ནས་སྡོང་ཕྲུག་ཁ་ཤས་བརྐོས་ཏེ་རི་མགོར་འདེབས་པར་འགྲོ་རྩིས་བྱས། ད་ལོ་ལོ་71ལ་སླེབས་པའི་ལིའོ་ཁྲུན་ཧྭ་ནི་སེམས་ཀྱི་ཉི་ཟླ་གྲོང་ཁྱེར་ཡང་ཐང་གྲོང་རྡལ་མཉམ་འབྲེལ་གྲོང་ཚོའི་གྲོང་མི་ཡིན་པ། ལོ་20ལྷག་ཙམ་རིང་ཁོང་གིས་གྲོང་མིའི་སྣེ་ཁྲིད་དེ་ལྗོན་ཤིང་རྐང་ཁྲི་300ལྷག་ཙམ་བཙུགས་པ་དང་དེ་སྔའི་རི་རྒོད་རེ་རེ་བཞིན་སྔོ་ལྗང་ལྗོན་ཤིང་གིས་ཁེངས་ཡོད།

    1998ལོའི་གོང་དུ་བདེ་ཆེན་ཁུལ་གྱི་མང་ཚོགས་ཁ་ཤས་ཀྱིས་ཤིང་གཅོད་པ་དང་ཤིང་ཆ་བཙོངས་པར་བརྟེན་ནས་འཚོ་བ་སྐྱེལ་གྱི་ཡོད་ལ་ཤིང་ཆ་ཡང་ས་གནས་དེ་གའི་ནོར་སྲིད་ཀྱི་ཡོང་ཁུངས་གལ་ཆེན་ཞིག་ཡིན། རི་ལྡེབས་ཁ་ཤས་སུ་ཤིང་གཅོད་པ་དང་ལྐོག་གཅོད་བྱས་རྗེས་ལྗང་མདོག་མཐོང་དཀའ། ལིའོ་ཁྲུན་ཧྭ་ཡིས་མིག་གིས་མཐོང་བ་དང་། སེམས་ནང་བྲེལ་བ། “གལ་ཏེ་དེ་ལྟར་རྒྱུན་མཐུད་བྱས་ཚེ་སྐྱེ་ཁམས་ལ་གཏོར་བཤིག་ཚབས་ཆེན་ཕོག་སྲིད་”ཅེས་བཤད།

    ལོ་དེར་ལིའོ་ཁྲུན་ཧྭ་ཡིས་མི་གཞན་དག་གིས་འཕྱ་སྨོད་བྱེད་པ་དེ་སྣང་མེད་དུ་བཞག་ནས་གདན་ཞུ་བྱས་པའི་བཟོ་པ་ཆུང་ཆུང་ཁྲིད་དེ་སྡོང་ཕྲུག་དང་ཤིང་འཛུགས་ཡོ་བྱད། སྟབས་བདེའི་འཚོ་བའི་ཡོ་བྱད་ཁུར་ནས་ནགས་ཁུལ་དུ་བསྐྱོད་པ་རེད། ཁོ་མོས་སྐབས་དེ་དུས་འགྲིམ་འགྲུལ་ཧ་ཅང་ཞན་པས་ཚང་མ་མི་དང་རྟ་ལ་བརྟེན་ནས་དབོར་དགོས་པ་དང་རི་མགོར་འགོས་ན་ཉིན་གཅིག་ལ་བཀོལ་དགོས་པ་མ་ཟད། དབྱར་དུས་དྲག་ཆར་འབབ་པའི་གནམ་གཤིས་ཡང་ཡང་ཐོན་གྱི་ཡོད་པས་ཆར་རླུང་ཁྲོད་ཤིང་འཛུགས་རྒྱུ་ནི་རྒྱུན་གཏན་གྱི་རྣམ་པ་ཞིག་རེད་ཅེས་བཤད།

    སྲིད་གཞུང་སྡེ་ཚན་གྱི་རྒྱབ་སྐྱོར་འོག་ལོ་མང་རིང་ལིའོ་ཁྲུན་ཧྭ་ཡིས་གྲོང་མིའི་སྣེ་ཁྲིད་དེ་རི་རྒོད་མུའུ་ཁྲི་2.7སྔོ་འགྱུར་བྱས་པ་དང་གངས་གསོམ་སྡོང་རྐང་ཁྲི་300ལྷག་ཙམ་བཙུགས་པ་རེད། ད་ཆ་ལིའོ་ཁྲུན་ཧྭ་ཡི་རྐང་པར་རུས་འཛེར་སྐྱེས་བའི་ནད་ཕོག་ནས་ཤེད་ཤུགས་ཀྱང་སྔོན་ཆད་དང་མི་འདྲ་ཡང་ཁོང་གིས་“ཤེད་ཤུགས་ཡོད་ཚེ་ངས་མུ་མཐུད་འདེབས་རྒྱུ་ཡིན་པས་སྡོང་རྐང་གཅིག་མང་དུ་འཛུགས་ནའང་འགྲིག་”ཅེས་བཤད།

    “སྔོ་ཞིང་དྭངས་བའི་རི་ཆུ་སྲུང་སྐྱོང་བྱེད་པ་ནི་ང་ཚོའི་ཁྱིམ་གཞིས་སྲུང་སྐྱོང་ཡག་པོ་བྱེད་པ་ཞིག་ཡིན།” བདེ་ཆེན་ཁུལ་ནགས་ཚལ་དང་རྩྭ་ཐང་ཅུས་ཀྱི་འབྲེལ་ཡོད་འགན་འཁུར་བས་1998ལོར་ཁུལ་ཡོངས་ཀྱིས་རང་བྱུང་ནགས་ཚལ་ཚོང་ཟོག་རང་བཞིན་གྱི་གཅོད་འབྲེག་བྱེད་མཚམས་བཞག་རྗེས་བདེ་ཆེན་ཁུལ་གྱིས་རང་བྱུང་ནགས་ཚལ་ཐོན་ཁུངས་ཚང་མ་རང་བྱུང་ནགས་ཚལ་སྲུང་སྐྱོང་ལས་གྲྭའི་ཁྱབ་ཁོངས་ནང་བཅུག་པས་མང་ཚོགས་ཀྱིས་རང་འགུལ་ངང་སྐྱེ་ཁམས་སྲུང་སྐྱོང་བྱེད་པའི་འདུ་ཤེས་ཀྱང་རྒྱུན་ཆད་མེད་པར་ཆེ་རུ་འགྲོ་བཞིན་ཡོད། མིག་སྔར་ཁུལ་ཡོངས་ཀྱི་ནགས་ཚལ་ཁེབས་ཚད་77.63%་ཟིན་ཡོད་ཅེས་བཤད་པ་རེད།

    དབྱར་དུས་ཀྱི་ཞོ་རྡོ་མཚོ་ཆུ་དྭངས་ཤིང་རྩྭ་ལྗང་དང་མཐའ་འཁོར་གྱི་རི་ཚོགས་སྔོ་ཐིང་ཐིང་ཡིན། སེམས་ཀྱི་ཉི་ཟླ་གྲོང་ཁྱེར་གྱི་ཅུང་ཆེ་བའི་མཚེའུ་ཡི་གྲས་ཤིག་ཡིན་པའི་ངོས་ནས་ཞོ་རྡོ་མཚོས་ཐུན་མོང་མ་ཡིན་པའི་ས་མཐོའི་མཛེས་ལྗོངས་ལ་བརྟེན་ནས་ས་གནས་ཁག་གི་ཡུལ་སྐོར་བ་ལྟ་བར་ཡོང་རྒྱུའི་ཡིད་དབང་བཀུག་ཡོད། འོན་ཀྱང་དེ་སྔ་མཐའ་འཁོར་གྱི་གྲོང་མིས་རང་འགུལ་ངང་“རྟ་འཁྲིད་ཡུལ་སྐོར་”རྣམ་གྲངས་སྒྲིག་འཛུགས་བྱས་ཏེ་མཚེའུ་འགྲམ་གྱི་རྩྭ་ཐང་དུ་ཚོང་ཟོག་འཚོང་བ་དང་བསྲེགས་ཟས་བཟོས་པས་མཚེའུ་ཡི་ཆུའི་སྤུས་ཚད་དང་མཚེའུ་འགྲམ་གྱི་སྐྱེ་ཁམས། མཛེས་ལྗོངས་སོགས་ལ་ཤུགས་རྐྱེན་ངན་པ་བཟོས་ཡོད།

    ཞོ་རྡོ་མཚོ་སྲུང་སྐྱོང་ཡག་པོ་བྱ་ཆེད་ས་གནས་དེ་གས་ཁེ་ཕན་མཉམ་སྤྱོད་དང་འགན་འཁྲི་མཉམ་འཁུར་གྱི་ལམ་སྲོལ་བཙུགས་ཏེ་གྲོང་མི་ཚོས་རྟ་འཁྲིད་པ་དང་བསྲེགས་ཟས་སོགས་ཀྱི་རྣམ་གྲངས་གཅིག་རྗེས་གཉིས་མཐུད་ངང་ཕྱིར་འཐེན་བྱས་པ་དང་མཛེས་ལྗོངས་ཁུལ་གྱིས་ཡུལ་སྐོར་སྐྱོང་ལན་འཇལ་བ་དང་སྐྱེ་ཁམས་ནགས་སྲུང་བ། གཙང་སྦྲ་བ་གདན་ཞུ་བྱེད་པ་སོགས་ཀྱི་བྱ་ཐབས་བརྒྱུད་གྲོང་མི་ཚོས་རང་འགུལ་ངང་མཚེའུ་སྲུང་སྐྱོང་དང་ནགས་ཚལ་དོ་དམ་སྲུང་སྐྱོང་ནང་ཞུགས་ཐུབ་པ་བྱས་པ་རེད། ད་ཆ་མཛེས་ལྗོངས་ལ་སྲུང་སྐྱོང་ཐུབ་པ་དང་གྲོང་མིའི་ཡོང་འབབ་ཀྱང་མང་དུ་ཕྱིན་ཡོད།   

    སྐྱེ་ཁམས་ཁོར་ཡུག་སྲུང་སྐྱོང་ཡག་པོ་བྱ་ཆེད་བདེ་ཆེན་ཁུལ་གྱིས་རང་འགུལ་ངང་ཐོན་ལས་གྲུབ་ཆ་ལེགས་སྒྲིག་བྱས་པས་སྐྱེ་ཁམས་རིག་གནས་ཡུལ་སྐོར་ལས་རིགས་དང་སྐྱེ་དངོས་ཐོན་ལས་དེ་རིམ་བཞིན་ཀ་རྟེན་ཐོན་ལས་གལ་ཆེན་ཞིག་ཏུ་གྱུར་ཡོད།

    འཇོལ་རྫོངཀོང་རྩེད་ར་གྲོང་རྡལ་ཡུལ་བརྒྱད་གྲོང་ཚོས་ཉེ་བའི་ལོ་ཤས་རིང་སྐྱེ་ཁམས་ཐོན་ཁུངས་ཀྱི་ལེགས་ཆར་བརྟེན་ནས་གསར་སྤེལ་བྱས་པའི་སྐྱེ་ཁམས་རྐང་ཐང་ལམ་ཐིག་དང་ཞིབ་འཇུག་སློབ་སྦྱོང་རྣམ་གྲངས་དེ་ཡུལ་སྐོར་གྱི་མིང་བྱང་ཞིག་ཏུ་གྱུར་ཡོད། གྲོང་ཚོའི་ཏང་སྤྱི་ཁྱབ་ཀྲི་པུའི་ཧྲུའུ་ཅི་བློ་བཟང་ཆོས་འཕེལ་གྱིས་གྲོང་ཚོའི་ནང་གི་ཏང་ཡོན་དང་ནགས་སྲུང་བས་སྐྱེ་ཁམས་སྲུང་སྐྱོང་སྐོར་སྲུང་རུ་ཁག་བཙུགས་ནས་ནགས་ཚལ་མེ་ཟོན་བྱེད་པ་མ་ཟད་ད་དུང་རི་མགོར་བེ་ཤ་འཐུ་བར་འགྲོ་མཁན་མང་ཚོགས་ལ་གད་སྙིགས་གང་བྱུང་དུ་མི་དབྱུགས་པའི་ཁ་ཏ་བསླབ་བྱ་བྱས་ཏེ་སྣེ་ཁྲིད་དེ་ཐན་འགོག་ནགས་ཤིང་འདེབས་འཛུགས་བྱེད་ཀྱི་ཡོད།

    དེ་ཙམ་གྱིས་མ་ཚད་གྲོང་ཚོའི་ནང་ད་དུང་སྒྲོག་འགྲེལ་རུ་ཁག་བཙུགས་ནས་ཏང་ཡོན་རྒན་གྲས་ཚོར་སྐྱེ་ཁམས་སྲིད་ཇུས་དང་གྲོང་ཚོའི་འཕོ་འགྱུར་གླེང་དུ་བཅུག་སྟེ་ཚང་མས་སྐྱེ་ཁམས་ཁོར་ཡུག་སྲུང་སྐྱོང་ཡག་པོ་བྱ་རྒྱུར་སྐུལ་འདེད་བཏང་ཡོད། “ཀོང་རྩེད་ར་གྲོང་རྡལ་གྱི་ཆུ་ཁུངས་གྲོང་ཚོའི་ནང་ཡོད་པས་ཤིང་བཅད་རྗེས་ཆུ་ཁུངས་ལ་གཏོར་སྐྱོན་ཕོག་གི་རེད་”ཅེས་བཤད་པ་རེད། གྲོང་མི་ཆིང་ལགས་ཀྱིས་དེ་སྔོན་གྲོང་མི་ཚོས་ཤིང་བཅད་ནས་ཁང་པ་བརྒྱབ་པ་དང་ཉེ་བའི་ལོ་ཤས་རིང་ཚང་མས་ཤིང་མ་བཅད་པར་ལོ་ལྟར་འོས་འགན་ཤིང་འཛུགས་བྱེད་ཀྱི་ཡོད་ཅེས་བཤད། སྐྱེ་ཁམས་ཁོར་ཡུག་ལེགས་སུ་ཕྱིན་པ་དང་གྲོང་ཚོའི་ནང་གི་རི་སྐྱེས་བཟའ་བྱའི་ཤ་མོའི་གྲངས་འབོར་དང་སྤུས་ཚད་དེ་བས་བརྟན་དུ་ཕྱིན་ནས་གྲོང་མིའི་ཡོང་འབབ་ཡོང་ཁུངས་གལ་ཆེན་ཞིག་ཏུ་གྱུར་ཡོད།

    འབྲི་ཆུར་ལོ་བཅུའི་རིང་ཉ་འཛིན་མི་ཆོག་པ་ནས་བཟུང་བདེ་ཆེན་ཁུལ་ཞིང་ལས་གྲོང་གསེབ་ཅུས་དང་ཀྲུང་གོ་ལྕགས་ཀྱི་མཆོད་རྟེན་མ་རྐང་ཚད་ཡོད་ཀུང་སིས་འབྲི་ཆུའི་འཛིན་བཟུང་མི་ཆོག་པའི་ཆུ་ཁོངས་སུ་ཁྲིམས་འཛིན་ལྟ་སྐུལ་དོ་དམ་དང་ཉ་ལས་ལྟ་སྐུལ་དོ་དམ་སོགས་ཀྱི་ཐད་མཉམ་ལས་ཧུར་ཐག་བྱས་པ་རེད། མིག་སྔར་བདེ་ཆེན་ཁུལ་མངའ་ཁོངས་ཀྱི་འབྲི་ཆུའི་འབབ་རྒྱུད་དུ་“འཛིན་རྙབ་ཉ་གྲུ་མེད་པ་དང་། འཛིན་རྙབ་དྲ་ཆས་མེད་པ། འཛིན་རྙབ་ཉ་པ་མེད་པ། འཛིན་རྙབ་ཐོན་སྐྱེད་མེད་པ”་བཅས་ཀྱི་དམིགས་ཚད་གཞི་རྩའི་ཆ་ནས་མངོན་འགྱུར་བྱུང་ནས་འབྲི་ཆུའི་ཉ་རིགས་ཐོན་ཁུངས་མངོན་གསལ་དོད་པོས་སླར་གསོ་བྱུང་ཡོད། 

    ཤེས་རྟོགས་བྱུང་བར་གཞིགས་ན་བདེ་ཆེན་ཁུལ་གྱིས་སྐྱེ་ཁམས་ཏེ་ཁུལ་འཛུགས་པའི་རྩ་བར་བརྩིས་ནས་མཛེས་སྡུག་ལྡན་པའི་བདེ་ཆེན་འཛུགས་སྐྲུན་བྱ་རྒྱུ་གཙོ་རྐང་དུ་བྱས་ཏེ་ས་མཐོའི་སྐྱེ་ཁམས་ནགས་ཚལ་གྲོང་ཁྱེར་འཛུགས་སྐྲུན་བྱ་རྒྱུ་གཞི་རྟེན་དུ་བྱས་པའི་“སྔོ་ལྗང་མཛེས་སྡུག་ལྡན་པའི་བདེ་ཆེན”འཛུགས་སྐྲུན་ལ་སྐུལ་འདེད་བཏང་ནས་འབྲི་ཆུའི་སྐྱེ་ཁམས་ཁོར་ཡུག་སྲུང་སྐྱོང་ཡག་པོ་བྱ་ཆེད་འདེགས་སྐྱོར་གལ་ཆེན་མཁོ་འདོན་བྱས་ཡོད།