2022ལོའི་ལོ་མཇུག་ཏུ།སྟག་མཆོང་གྲོག་རོང་ནས་སེམས་ཀྱི་ཉི་ཟླ་བར་གྱི་རིམ་པ་གཉིས་པའི་གཞུང་ལམ་བསྐྲུན་ནས་རླངས་འཁོར་ཤར་གཏོང་ཐུབ་པ་དང་། སྟག་མཆོང་གྲོག་རོང་ནས་སེམས་ཀྱི་ཉི་ཟླ་བར་གྱི་གཞུང་ལམ་གྱི་གཙོ་ལམ་དེ་སེམས་ཀྱི་ཉི་ཟླ་གྲོང་ཁྱེར་སྟག་མཆོང་གྲོག་རོང་གྲོང་རྡལ་དང་། སན་པ་ཤང་། ལུའུ་ཅི་ཤང་། རྒྱལ་ཐང་གྲོང་རྡལ། པོ་ཏ་མཚོ་མཛེས་ལྗོངས་ཁུལ་བཅས་ལ་བརྒྱུད་ཡོད་པས་ཡུལ་སྐོར་བས་གཞུང་ལམ་བརྒྱུད་ནས་སྟག་མཆོང་གྲོག་རོང་དང་། ཧ་པ་རི་བོའི་བརྗིད་ཉམས་མཐོང་ཐུབ་པ་དང་། ལམ་རྒྱུད་ཀྱི་མི་སེར་རང་ཁྱིམ་དུ་ལོག་པའི་ལམ་བུ་དང་གྲོང་ཁྱེར་དུ་སྐྱོད་པའི་ལམ་བུ་རྒྱ་ཆེ་རུ་ཕྱིན་ནས་མིང་དོན་མཚུངས་པའི་ཐོན་ལས་ལམ་དང་ཕྱུག་འགྱུར་ལམ་བུར་གྱུར་ཡོད།
གཞན་ཡང་།སེམས་ཀྱི་ཉི་ཟླའི་ཤར་གྱི་མཐའ་བསྐོར་གྱི་དུས་ཐེངས་དང་པོའི་ལས་གྲྭ་དང་། འཇོལ་རྫོང་ནས་ཏེ་ཀུང་བར་གྱི་གཞུང་ལམ། རྨ་བྱ་རི་བོའི་ཕུག་ལམ་བཅས་སྔ་རྗེས་སུ་བསྐྲུན་ནས་རླངས་འཁོར་ཤར་གཏོང་ཐུབ་ཡོད་པ་རེད། འབྲི་ཆུའི་རིམ་པ་གཉིས་པའི་གཞུང་ལམ་དང་། འབའ་ལུང་རྫོང་ཕན་ཐེན་ཀོ་སོགས་དཔལ་འབྱོར་གྱི་མ་ལམ་གལ་ཆེན་6འཛུགས་སྐྲུན་བྱེད་འགོ་བརྩམས་པ་དང་། རྒྱལ་ཁབ་རིམ་པའི་གཞུང་ལམ་1དང་ཞིང་ཆེན་རིམ་པའི་གཞུང་ལམ་2དང་། དཔལ་འབྱོར་གྱི་མ་ལམ་གལ་ཆེན་2མཐུད་འཛུགས་བྱས་ཡོད། ཏན་བོད་ལྕགས་ལམ་སེམས་ཀྱི་ཉི་ཟླ་ནས་བོད་ལྗོངས་པོ་སྤོ་བོའི་བར་གྱི་རྣམ་གྲངས་ལ་རྩད་ཞིབ་ཇུས་འགོད་འོས་སྐུལ་གྱི་ལས་དོན་ལེགས་གྲུབ་ཟིན་པ་དང་བདེ་ཆེན་སེམས་ཀྱི་ཉི་ཟླའི་གནམ་ཐང་གི་འགག་སྒོའི་གནམ་ཐང་དུས་བཀག་ལྟར་བསྐྲུན་ཟིན་ནས་ཞིང་ཆེན་ནང་ཁུལ་གྱི་ཁུན་མིང་དང་། ས་དམ།ཤིས་ཧྲོང་པན་ན། མང་ཧྲི་གྲོང་ཁྱེར་བཅས་རྗེས་ཀྱི་འགག་སྒོའི་གནམ་ཐང་ལྔ་པར་གྱུར་ཡོད།
ལོ་གཅིག་ནང་ཁྱོན་འགྲིམ་འགྲུལ་གཏན་འཇགས་རྒྱུ་ནོར་ལ་མ་དངུལ་སྒོར་དུང་ཕྱུར་96.13བཏང་བ་དང་། རིམ་རྩིས་བྱས་ན་གཏན་འཇགས་རྒྱུ་ནོར་ལ་མ་དངུལ་སྒོར་དུང་ཕྱུར་207བཏང་བ་དེས་བདེ་ཆེན་ཁུལ་དུས་མཚུངས་ཀྱི་གཏན་འཇགས་རྒྱུ་ནོར་ལ་མ་འཇོག་བྱེད་ཚད་བཅུ་ཆ་གསུམ་ཡན་ཟིན་ཡོད་པ་རེད།
ད་ལོར་བདེ་ཆེན་ཁུལ་གྱིས་ས་དམ་ནས་སེམས་ཀྱི་ཉི་ཟླ་བར་གྱི་ལྕགས་ལམ་འཛུགས་སྐྲུན་གྱི་གོམ་སྟབས་མགྱོགས་སུ་བཏང་ནས་ལོ་ནང་རླངས་འཁོར་ཤར་གཏོང་ཐུབ་པའི་འགན་ལེན་བྱ་རྒྱུ་ཡིན་ཞེས་བདེ་ཆེན་ཁུལ་འགྲིམ་འགྲུལ་སྐྱེལ་འདྲེན་ཅུས་ཀྱི་ཅུས་ཀྲང་ཏུང་ཕིན་ཧན་གྱིས་འདི་འདྲ་བཤད་བྱུང་།
2023ལོར།བདེ་ཆེན་ཁུལ་འགྲིམ་འགྲུལ་སྡེ་ཚན་གྱིས་དུས་འགོའི་འཆར་འགོད་སྤྱི་འདོམས་དང་རྣམ་གྲངས་འཛུགས་སྐྲུན་ལྟེ་བར་བྱ་རྒྱུ་མཐའ་འཁྱོངས་ཀྱིས་འགྲིམ་འགྲུལ་གྱི་རྣམ་གྲངས་གལ་ཆེན་འཛུགས་སྐྲུན་ལ་ནུས་ཤུགས་ཡོད་རྒུས་སྐུལ་འདེད་གཏོང་བ་དང་དེང་རབས་ཀྱི་ཕྱོགས་བསྡུས་འགྲིམ་འགྲུལ་སྐྱེལ་འདྲེན་མ་ལག་མགྱོགས་མྱུར་ངང་འཐུས་ཚང་དུ་བཏང་ནས་བདེ་ཆེན་ཁུལ་གྱིས་ཕྱོགས་ཡོངས་ནས་སྤྱི་ཚོགས་རིང་ལུགས་ཀྱི་དེང་རབས་ཅན་སྒོ་ཀུན་ནས་བསྐྲུན་རྒྱུར་འགོ་ཡག་པོ་འཛུགས་པ་དང་གོམ་སྟབས་བརྟན་པོ་སྤོ་རྒྱུར་ཞབས་ཞུའི་འགན་ལེན་ནུས་ལྡན་བཏོན་པ་རེད།
