བདེ་ཆེན་ཁུལ་གྱིས་པར་དབང་སྲུང་སྐྱོང་སྐོར་གྱི་བྱེད་སྒོ་ཞིག་སྤེལ།

    ཉེ་སྔོན།  བདེ་ཆེན་ཁུལ་ཨུའི་དྲིལ་བསྒྲགས་པུའུ་ཡིས་གཙོ་སྒྲུབ་བྱེད་པ་དང་།  བདེ་ཆེན་ཁུལ་སློབ་གསོ་དང་ལུས་རྩལ་ཅུས་དང་གུང་གཞོན་ཚོགས་པ་བདེ་ཆེན་ཁུལ་ཨུ་ཡིས་རོགས་སྒྲུབ་བྱེད་པ།  བདེ་ཆེན་ཁུལ་བོད་ཡིག་སློབ་འབྲིང་དང་བདེ་ཆེན་ཤིན་ཧྭ་དཔེ་ཁང་གཉིས་ཀྱིས་སྒྲུབ་འགན་འཁུར་བའི་པར་དབང་སྲུང་སྐྱོང་དང་པར་གཞི་རྐུ་སྐྱོད་འགོག་པའི་བྱེད་སྒོ་སྟེ་བདེ་ཆེན་ཁུལ་བོད་ཡིག་སློབ་འབྲིང་གི་སློབ་རའི་དཔེ་ཁང་གི་སྒོ་བྱང་ཕྱེ་བའི་མཛད་སྒོ་བདེ་ཆེན་ཁུལ་བོད་ཡིག་སློབ་འབྲིང་དུ་སྤེལ་བ་རེད།

    ཤེས་གསལ་བྱུང་དོན། བདེ་ཆེན་ཁུལ་བོད་ཡིག་སློབ་འབྲིང་གི་སློབ་རའི་དཔེ་ཁང་འཛུགས་སྐྲུན་རྣམ་གྲངས་ལ་ཁྱོན་མ་དངུལ་སྒོར་ཁྲི་65བཏང་ཡོད་པ་དང་།  2022ལོའི་ཟླ་7པའི་ཚེས་28ཉིན་ནས་ལས་འགོ་ཚུགས་པ་དང་ཟླ་9པའི་ཚེས་30ཉིན་ལེགས་གྲུབ་བྱུང་།  དཔེ་ཁང་གི་རྒྱ་ཁྱོན་ལ་སྨི་གྲུ་བཞི་མ་198ཡོད་པ་རེད།

    བདེ་ཆེན་ཤིན་ཧྭ་དཔེ་ཁང་ཚད་ཡོད་ཀུང་སིའི་འགན་འཁུར་མི་སྣ་ཧོ་ཐན་ཧྭ་ཡིས་གོམ་སྟབས་རྗེས་མར་ང་ཚོས་དཔེ་ཆ་དང་རིག་གནས་མཁོ་ཆས། ལུས་རྩལ་མཁོ་ཆས་དེ་བཞིན་གསོ་སྦྱོང་སྤེལ་རེས། སློབ་དཔྱོད་བྱེད་སྒོ།  ཤེས་བྱའི་འཆད་ཁྲིད་སོགས་སྣ་མང་ཅན་གྱི་གཉེར་སྐྱོང་རྣམ་པས་རྒྱ་ཆེའི་དགེ་སློབ་ཚོ་ལ་ཞབས་འདེབས་ཞུ་རྒྱུ་ཡིན་པ་དང་།   སློབ་རའི་དཔེ་ཁང་འདི་ཉིད་གཞོན་ནུ་ལོ་ཆུང་ཚོས་ཤེས་བྱ་འཕེལ་བ་དང་མཐོང་རྒྱ་ཆེར་བསྐྱེད།  དཔེ་ཀློག་ལ་བརྩི་མཐོང་བྱེད་པའི་སྟེགས་བུ་གལ་ཆེན་ཞིག་ཏུ་འགྱུར་བར་བརྩོན་ལེན་བྱ་རྒྱུ་ཡིན་ཞེས་ཟེར།