བརྗིད་ཆགས་མཛེས་སྡུག་ལྡན་པའི་བརྒྱད་ཟིལ་རྫོང་།

        བརྒྱད་ཟིལ་རྫོང་ནི་སི་ཁྲོན་ཞིང་ཆེན་གྱི་ནུབ་རྒྱུད་དང་དཀར་མཛེས་ཁུལ་གྱི་ཤར་ལྷོའི་མཚམས་སུ་ཆགས་ཡོད་ཅིང་། སྤྱིའི་རྒྱ་ཁྱོན་སྤྱི་ལེ་གྲུ་བཞི་མ6770དང་རྫོང་སྲིད་གཞུང་ནི་མཚོ་འཕགས་སྨི2925ཡོད་པའི་ཐང་འགོ་ཡུལ་ཤོག་ཏུ་ཡོད་པ་རེད། བོད་རིགས་དང་དབྱིས་རིགས། རྒྱ་རིགས་ཀྱིས་གཙོས་པའི་རྒྱུན་སྡོད་མི་གྲངས་ཁྲི་དྲུག་སྟོང་བདུན་ལྷག་ཡོད་པའི་རྫོང་ཞིག་རེད།  བརྒྱད་ཟིལ་གྱི་གཡེར་མ་དང་གནག་ཕྱུགས་ཡུལ་གྲུ་ཀུན་ཏུ་སྙན་གྲགས་ཁྱབ་ལ། སྤུས་ཀ་ལེགས་པའི་ཟངས་རིགས་ལ་སོགས་པའི་གཏེར་ཁ་འབེལ་པོ་ཡོད་པ་རེད།

        བརྒྱད་ཟིལ་རྫོང་ལ་དུས་ཡུན་རིང་པོའི་ནང་མི་རིགས་སོ་སོས་ཕན་ཚུན་མཉམ་འབྲེལ་བྱས་པ་དང་ཐུན་མོང་དུ་འཕེལ་རྒྱས་བཏང་ནས་དམིགས་བསལ་གྱི་ཁྱད་ཆོས་ཡོད་པའི་མི་རིགས་གོམས་སྲོལ་གྱི་རིག་གནས་གྲུབ་ཅིང་། བོད་རིགས་ལ་དམིགས་བསལ་གྱི་རིག་གནས་གོམས་སྲོལ་ཡོད་ལ། དབྱིས་རིགས་ས་ཁུལ་ལའང་གདོད་མའི་འགྲོ་སྡོད་བཟའ་གསུམ་གྱི་གོམས་སྲོལ་རིག་གནས་ཀྱང་ཉམས་སུ་མྱོང་རྒྱུ་ཡོད་པ་རེད། མཛེས་ལྗོངས་འོད་སྐྱིད་མཚོའམ་དབུས་གཤོམ་མཚོ་ནི་བརྒྱད་ཟིལ་རྫོང་གི་བྱང་རྒྱུད་དུ་ཡོད་ཅིང་། རྫོང་གི་གྲོང་ཁུལ་དང་སྤྱི་ལེ25ཙམ་རྒྱང་བ་རེད། མཛེས་ལྗོངས་ཀྱི་རྒྱ་ཁྱོན་སྤྱི་ལེ་གྲུ་བཞི་མ400ཡོད་ཅིང་། མཛེས་ལྗོངས་འདི་ནི་ཅུ་ཁྲོད་ལུང་པ་དང་འོད་སྐྱིད་ལུང་པ། རི་ལུང་ཁུག།རྩྭ་ཐང་སྟེང་བཅས་ལས་གྲུབ་པའི་རི་ཐོག་གི་མཚེའུ་དང་གདོད་མའི་ནགས་ཚལ།  རྩྭ་ཐང་། གངས་རི། རྦབ་ཆུ། ཚྭ་ཆུ་དང་བོད་རིགས་ཀྱི་ཡུལ་སྲོལ་གོམས་གཤིས་གཅིག་འདུས་ཀྱི་རང་བྱུང་མཛེས་ལྗོངས་ཤིག་ཡིན་པ་རེད། དེས་མ་ཚད་ད་དུང་ཡིད་དབང་འཕྲོག་པའི་ཤར་ཁའི་མཛེས་ལྗོངས་ཁུལ་དང་མི་ཡུལ་གྱི་ཞིང་ཁམས་ལྷ་མོ་མཚོའི་མཛེས་ལྗོངས་སུ་བོད་རིགས་དང་དབྱིས་རིགས་རྒྱ་རིགས་ལ་སོགས་པའི་མི་རིགས་སོ་སོའི་གོམས་སྲོལ་རིག་གནས་འཆམ་མཐུན་ངང་མཉམ་དུ་གནས་ཡོད་པ་རེད།།