ནད་རིགས་མི་འདྲ་བར་བྱུག་པ་རྒྱག་སྟངས་ཀྱང་འདྲ་གི་མེད།

རྩོམ་པ་པོ།     ཡིག་བསྒྱུར།       དུས་ཚོད།   2021-12-08   རྩོམ་ཁུངས།    གངས་ལྗོངས་ཉི་གཞོན།

     བྱུག་པ་ནི་མར་རྙིང་དང་། ཏིལ་སྣུམ། སྲོག་ཆགས་ཀྱི་ཚིལ་ལུ། ཡང་ན་སྨན་རྫས་རིགས་བཅས་ཀྱིས་བྱུག་པ་བརྒྱབ་ནས་འཕུར་མཉེད་བཏང་སྟེ་ནད་གཞི་ཁག་གཅིག་བཅོས་ཐབས་བྱེད་པ་ཞིག་རེད།

    སྣུམ་གྱི་བྱུག་པ་ནི་སྨྱོ་བ་དང་། འབོག་པ། དྲན་མེད་དུ་བརྒྱལ་བ་སོགས་རླུང་ནད་རིགས་ལ་མར་རྙིང་པས་ཚིགས་པ་དང་པོ(མཇིང་ཚིགས་བདུན་པ་ནས་ཚད་འཛིན་དགོས)དང་། དྲུག་པ། བདུན་པ། མདུན་གྱི་བྲང་གཞུང་དཀར་ནག་མཚམས་བཅས་ལ་བྱུག་པ་བརྒྱབ་ནས་འཕུར་མཉེད་བཏང་རྗེས་རྩམ་པས་ཕྱིད་དགོས(བྱུག་པ་ཚང་མར་དེ་ལྟར་བྱེད་དགོས) 

    ཆུ་སེར་ཟ་འཕྲུག་གི་ནད་ལ་རྟ་དང་། རྐྱང་། བོང་བུ་བཅས་ཀྱི་ཚིལ་ལུས་བྱུག་པ་རྒྱག་དགོས། 

    མཁལ་མའི་ནུས་པ་ཉམས་པ་དང་། ཁུ་བ་འཛག་པའི་ནད་ལ་སྲམ་གྱི་ཚིལ་ལུ་དང་འཕྱི་བའི་ཚིལ་ལུས་སྐེད་ཚིགས་ལ་བྱུག་པ་རྒྱག་དགོས། 

    ཁྱིས་རྨུགས་པའི་རྨ་རྙིང་ལ་ཁྱིའི་ཚིལ་ལུས་བྱུག་པ་རྒྱག་དགོས། 

    གདོང་གི་འབྲུམ་ཤུལ་མེད་པ་བཟོ་བར་རའི་ཚིལ་ལུ་དང་འབྲི་མོག་གཉིས་སྦྱར་ནས་བྱུག་པ་རྒྱག་དགོས། 

    སྐྱ་འགྲིབ་ནད་ལ་འབྲི་མར་དང་གོ་སྙོད་སྦྱར་ནས་རྐང་མཐིལ་ལ་བྱུག་པ་རྒྱག་དགོས། 

    བྱུག་པ་རྒྱག་མི་རུང་བའི་ནད་གཞི་ནི། ཁ་ཟས་མ་ཞུ་བའི་ནད་དང་། རླུང་ནད་བརླ་རེངས། ཡི་ག་འཆུས་པ། དབྱིག་དུག་ཕོག་པ། དམུ་ཆུའི་ནད། བད་ཀན་དང་ཕོ་བ་སྨུག་པོའི་ནད་སོགས་ལ་བྱུག་པ་རྒྱག་མི་རུང་།