【རིག་གནས】ཡས་བཟེད་ཀྱི་རྟེན་འབྲེལ་མཚོན་དོན་ཅི་ཡིན།

    བོད་ས་མཐོའི་མི་རིགས་ཀྱི་རིག་གནས་ཧ་ཅང་གཏིང་ཟབ་པ་ཞིག་ཡིན་པས་བཀྲ་ཤིས་རྟེན་འབྲེལ་སྤྱི་དང་ཡང་སྒོས་སུ་དུས་ཆེན་ཀུན་གྱི་རྒྱལ་པོ་ལྟ་བུའི་ལོ་གསར་གྱི་རྟེན་འབྲེལ་མཛད་སྒོ་ནི་གྲ་རྒྱས་ཤོས་ཤིག་ཡིན་པས། ཁང་པའི་ཕྱི་ནང་ཀུན་ལ་གད་བདར་གཙང་སྦྲ་བྱེད་པ་དང་། སྒོ་ཡོལ་དང་ཤམ་བུ་བརྗེ་བ། དར་ལྕོག་འཛུགས་པ། སྡེར་ཁ་སྒྲིག་པ་སོགས་རྟེན་འབྲེལ་གྱི་མཛད་སྒོའི་རྣམ་གྲངས་ཧ་ཅང་ཕུན་སུམ་ཚོགས་པོ་ཡོད།

    མཛད་སྒོ་དེ་དག་གི་ཕྱི་ནང་བར་གསུམ་དུ་མེད་ཐབས་མེད་པའི་རྟེན་འབྲེལ་གྱི་མཚོན་རྟགས་དང་ཁྱབ་རྒྱ་ཆེ་ཤོས་ཀྱི་མཛེས་རྒྱན་ཞིག་ཡོད་པ་ནི་ལོ་གསར་གྱི་རྟེན་འབྲེལ་དངོས་པོ་ཚང་མའི་ཐོག་ཁྲ་ཆེམ་མེར་གནས་པའི་ཡས་བཟེད་ཁྲ་ཆུང་དེ་དག་ཡིན།

    ཡས་བཟེད་ནི་ལོ་གསར་གྱི་རྟེན་འབྲེལ་དངོས་པོ་ཆེ་ཆུང་ཚང་མ་དང་མཛད་སྒོ་རྒྱས་བསྡུས་སྤྱི་དང་ཁ་འབྲལ་ཐབས་མེད་པ་ཞིག་ཡིན་ཞིང་། དང་ཐོག་ལོ་གསར་གནམ་གང་ཉིན་ཐབ་ཚང་གི་ཀ་གདུང་ལ་ཡས་བཟེད་རྒྱག་པ་མ་ཟད། ཕྱེ་མར་འབོ་དང་། སྡེར་ཁ། སྡེར་རྫས་ཚང་མར་ཡས་བཟེད་ཀྱིས་རྒྱན་སྤྲོས་བྱེད་པ་དང་བཀོལ་ཆས་དང་ལྟོ་སྣོད་གནད་ཆེ་བ་དཔེར་ན། ཐབ་དང་། ཇ་མདོང་། ཆུ་ར་མ། ཆང་སྣོད་སོགས་ཚང་མར་ཡས་བཟེད་རྒྱག་དགོས།

    ཡས་བཟེད་རྒྱག་རྒྱུ་ནི་ལོ་གསར་གྱི་རྟེན་འབྲེལ་རྣམ་པ་གལ་ཆེན་ཞིག་ཡིན་པས་ལོ་གསར་ཚེས་གཅིག་ཉིན་གྱི་ཞོགས་པ་ཆུ་ཕུད་ལེན་སྐབས་ཆུ་བན་ལ་ཡས་བཟེད་རྒྱག་དགོས་པ་མ་ཟད། ཆུ་ལེན་སར་ཡང་ཡས་བཟེད་རྒྱག་དགོས་པས་རྒྱུག་ཆུ་ཡིན་ན་ཆུ་འགྲམ་གྱི་རྡོ་དང་། ཀ་ལ་ཡིན་ན་ཐད་ཀར་ཀ་ལར་ཡས་བཟེད་གསུམ་རྒྱག་གི་ཡོད། ལྷག་དོན་དུ་ལོ་གསར་གྱི་མགྲོན་སྐོར་བྱེད་སྐབས་ཀྱང་ཡས་བཟེད་ཀྱིས་བརྒྱན་པའི་ཆང་ཕོར་བཏེགས་ནས་གསུམ་སྒྲོན་མཉེས་དག་ཞུ་བ་དང་མགྲོན་པོ་ལོག་སྐབས་གོམས་སྲོལ་མི་འདྲ་བ་ལྟར་སྤྱི་གཙུག་གམ་ཕོ་མོའི་ཕྲག་པ་གཡས་གཡོན་དུ་ཡས་བཟེད་ཀྱིས་བརྒྱན་ནས་ལོག་གི་ཡོད།

     ཡས་བཟེད་ཀྱི་རྒྱུ་ནི་མར་ཡིན་ལ་ཡས་བཟེད་རྒྱག་སྐབས་རྟེན་འབྲེལ་གྱི་རྒྱས་བསྡུས་དང་རྒྱག་ཡུལ་ཆེ་ཆུང་ལ་གཞིགས་ནས་དཀོན་མཆོག་གསུམ་མཚོན་པའི་གྲངས་གསུམ་མམ་ཡང་ན་གཅིག་ཁོ་ན་རྒྱག་སྲོལ་ཡོད། དེ་ཡང་ཆང་བན་དང་ཆང་རྐྱན་སོགས་ལ་ཡས་བཟེད་ཁག་གསུམ་ཙམ་རྒྱག་པ་དང་ཆང་ཕོར་སོགས་ལ་གཅིག་གིས་འཐུས་པ་བྱེད་ཀྱི་ཡོད། རྣམ་ཀུན་ཡས་བཟེད་རྒྱག་སྐབས་མར་མཛུབ་མོ་དང་མཐེ་བོང་གིས་བླངས་ནས་རྒྱག་པ་དང་ཡས་བཟེད་རྒྱས་པོ་རྒྱག་སྐབས་མར་གྱིས་དཀྱིལ་མཐོ་ཙམ་དང་མཐའ་གཉིས་དམའ་ཙམ་བྱས་པའི་ཡས་བཟེད་གསུམ་སྒྲོམ་ཅན་ཡང་རྒྱག་སྲོལ་ཡོད།

    ཡས་བཟེད་ནི་ལོ་གསར་གྱི་རྟེན་འབྲེལ་མཛད་སྒོ་ཙམ་མ་ཟད། གཉེན་སྒྲིག་རྟེན་འབྲེལ་དང་། འགྲུལ་པ་ཕྱོགས་ཐོན། མགྲོན་པོར་སྣེ་ལེན་ཞུ་བ་སོགས་ལེགས་བྱས་ཀུན་གྱི་སྣ་འདྲེན་ཡིན་ལ། ཡས་བཟེད་ཀྱིས་བོད་མི་རིགས་ཀྱི་ལྷད་མེད་སྨོན་འདུན་མཚོན་ལ་རྟེན་འབྲེལ་གྱི་དོན་སྙིང་དེ་བས་ཟབ་ཏུ་གཏོང་བས་ཡིད་དུ་འོང་བའི་ཡས་བཟེད་ཆུང་ངུ་དེར་ཡང་རྩེའི་སྟེང་གི་ཡས་སྒྲོན་དུ་གསོལ་བ་ནི་དངོས་འབྲེལ་དོན་ལ་གནས་པའི་གཏན་ཚིགས་ཤིག་རང་རེད།