བདེ་ཆེན་གྱི་འགྲིམ་འགྲུལ་ལ་མཆོང་བརྒལ་འཕེལ་རྒྱས་བྱུང་ཡོད།

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།བཅིངས་འགྲོལ་བཏང་བ་ནས་བཟུང་བདེ་ཆེན་ཁུལ་གྱི་འགྲིམ་འགྲུལ་རྨང་གཞིའི་སྒྲིག་བཀོད་འཛུགས་སྐྲུན་ཐད་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡོད་དེ། “ལོ་ལྔ་ཚན་བཅུ་གསུམ་པའི”རིང་བདེ་ཆེན་ཁུལ་གྱིས“རྫོང་བར་གྱི་གཞུང་ལམ་མཐོ་རིམ་ཅན་དང་།ཤང་བར་གྱི་གཞུང་ལམ་སྣུམ་ནག་ཅན།གྲོང་ཚོར་ཤར་གཏོང་ཐུབ་པའི་གཞུང་ལམ་ཁྱོན་ཡོངས་ནས་ཨར་འདམ་ཅན་བཅས་སུ་མངོན་འགྱུར་བྱུང་ཡོད།

    ཏང་གི་འགོ་ཁྲིད་དང་ཐུགས་ཁུར་འོག་1952ལོའི་ཟླ་བརྒྱད་པར་བདེ་ཆེན་ཁུལ་གྱིས་ལོ་རྒྱུས་ཐོག་གི་གཞུང་ལམ་དང་པོ་སྟེ་ཅུས་ཏན་ནས་འབའ་ལུང་བར་གྱི་གཞུང་ལམ་བཟོས་ནས་བདེ་ཆེན་ཁུལ་གྱི་འགྲིམ་འགྲུལ་རྨང་གཞིའི་འཛུགས་སྐྲུན་བྱེད་འགོ་ཚུགས། སྒྱུར་བཅོས་སྒོ་དབྱེ་བྱས་ཚུན་བདེ་ཆེན་ཁུལ་གྱིས་རང་ངོས་ཀྱི་ས་བབ་ལེགས་ཆ་ལ་བརྟེན་ནས་དཀའ་ངལ་ལ་མི་འཛེམ་པར་མདུན་དུ་སྐྱོད་པ་དང་། མ་དངུལ་གཏོང་ཤུགས་ཆེ་རུ་བཏང་བས་འགྲིམ་འགྲུལ་སྐྱེལ་འདྲེན་འཛུགས་སྐྲུན་གྱི་མཐོ་རླབས་གསར་པ་ཞིག་འཕྱུར་ཡོད། 1999ལོར་འགྲིམ་འགྲུལ་གྱི་རྨང་གཞིའི་སྒྲིག་བཀོད་གཙོ་གནད་འཛུགས་སྐྲུན་རྣམ་གྲངས་ཏེ་བདེ་ཆེན་སེམས་ཀྱི་ཉི་ཟླའི་གནམ་ཐང་བསྐྲུན་ནས་གནམ་གྲུ་ཤར་གཏོང་བྱས།2005ལོར་བདེ་ཆེན་གྱི་རིམ་མཐོའི་གཞུང་ལམ་དང་པོ་སྟེ་སེམས་ཀྱི་ཉི་ཟླ་ནས་སུང་ཡོན་ཟམ་པ་བར་གྱི་རིམ་པ་གཉིས་པའི་གཞུང་ལམ་བསྐྲུན་ནས་རླངས་འཁོར་ཤར་གཏོང་བྱས། 2012ལོའི་ལོ་མཇུག་བར་ཁུལ་ཡོངས་སུ་རླངས་འཁོར་ཤར་གཏོང་ཐུབ་པའི་ལམ་ཐག་ལེ་དབར་ཁྲི་ཡི་འགག་སྒོ་ཆེན་པོ་ལས་ཐོག་མར་བརྒལ་བ་དང་། ཁུལ་ཡོངས་ཀྱི་སྒྲིག་གཞི་ཚང་བའི་གྲོང་ཚོར་གཞུང་ལམ་100%ཤར་གཏོང་ཐུབ་ནས་འགྲིམ་འགྲུལ་གྱི་རྨང་གཞིའི་སྒྲིག་བཀོད་ཧ་ཅང་རྗེས་ལུས་ཐེབས་པའི་རྣམ་པ་མཇུག་འགྲིལ་བ་རེད། 

    ཚོགས་ཆེན་བཅོ་བརྒྱད་པ་འཚོགས་ཚུན་བདེ་ཆེན་ཁུལ་གྱི་འགྲིམ་འགྲུལ་རྨང་གཞིའི་སྒྲིག་བཀོད་འཛུགས་སྐྲུན་ཐད་མ་དངུལ་གཏོང་ཤུགས་རྒྱུན་ཆད་མེད་པར་ཆེ་རུ་བཏང་བས་མི་རིགས་ཁག་གི་མང་ཚོགས་ཀྱི་འགྲིམ་འགྲུལ་འགྲོ་སྐྱོད་ཀྱི་ཆ་རྐྱེན་མུ་མཐུད་ལེགས་སུ་ཕྱིན་ཡོད། བདེ་ཆེན་ཁུལ་གྱི་ལོ་རྒྱུས་ཐོག་གི་མྱུར་བགྲོད་གཞུང་ལམ་དང་པོ་སྟེ།སེམས་ཀྱི་ཉི་ཟླ་ནས་ས་དམ་བར་གྱི་མྱུར་བགྲོད་གཞུང་ལམ་དང་ལྕགས་ལམ་དང་པོ་སྟེ་ས་དམ་ནས་སེམས་ཀྱི་ཉི་ཟླ་བར་གྱི་ལྕགས་ལམ་སྔ་རྗེས་སུ་སྐྲུན་འགོ་ཚུགས་པ་དང་། སེམས་ཀྱི་ཉི་ཟླ་ནས་འཇོལ་རྫོང་བར་དང་དེ་བཞིན་འབའ་ལུང་ནས་འཇོལ་རྫོང་བར་གྱི་རིམ་པ་གཉིས་པའི་གཞུང་ལམ་གཉིས་ཀྱི་གཞི་རྩའི་འཛུགས་སྐྲུན་ལེགས་གྲུབ་ཟིན་ཡོད།