རྩོམ་པ་པོ།   རིན་ཆེན་ཚེ་རིང་།  ཡིག་བསྒྱུར།       དུས་ཚོད།   2020-10-13   རྩོམ་ཁུངས།    སེམས་ཀྱི་ཉི་ཟླའི་བོད་ཡིག་དྲ་བ།
རྫ་སྟོད་གངས་ཀྱིས་བཟུང་དུས།།
རི་དྭགས་རྫ་ནས་ཐོན་བྱུང་།།
རྫ་འདབས་ནོར་གྱིས་བཟུང་དུས།།
འབྲི་མར་སེར་པོ་བླངས་སོང་།།
སྟོད་ཕྱོགས་ཤྭ་ཁ་རི་བོར།།
ཁ་བའི་འདབ་མ་ལྷུང་དུས།།
སྨད་ཕྱོགས་པོ་ཏ་མཚོ་ཁར།།
གསེར་མདོག་སྡོང་ལོ་ལྷུང་བྱུང་།།
ཚོན་ལྡན་རེ་ལྕག་མེ་ཏོག།
ཡང་ཐང་སྤང་ནས་བཞད་དུས།།
ཆུང་འདྲིས་ཡང་ཐང་བུ་མོས།།
བརྩེ་འཕྲིན་ཆུ་ལ་བསྐུར་སོང་།།
རྒྱང་རིང་སྙིང་གི་བྱམས་པར།།
འཕྲིན་པ་འབྱོར་ཐབས་མེད་རུང་།།
རེ་ལྕག་མེ་ཏོག་བཞད་དུས།།
ཕ་ཡུལ་ཕྱོགས་ལ་བལྟས་ཡོང་།།
མེ་ཏོག་རི་ནས་འཐོར་དུས།།
རྩྭ་ལ་རྩྭ་རྐང་རྒྱས་ཡོང་།།
ནགས་ཕག་མཚོ་མཐའི་ནོར་ལ།།
སྟོན་གྱི་ཤ་ཤེད་རྒྱས་སོང་།།
མཚོ་བྱ་བྱང་ནས་ཐོན་དུས།།
མཚོ་ལ་མཚོ་ཆུ་རྒྱས་སོང་།།
གསེར་མིག་ཉ་ཡི་ཁྱུ་ཚོགས།།
འཁྱུག་རྩལ་མཚོ་ནས་ངོམས་སོང་།།
གསེར་ལྡན་གཟིག་རིའི་འདབས་ནས།།
ལུག་ཁྱུ་སྤང་ལ་འཁོར་དུས།།
སྒེག་ལྡན་ལུག་རྫི་བུ་མོས།།
རྫི་གླུ་བླངས་ནས་ཐོན་བྱུང་།།
ཕར་ཁའི་སྟག་རའི་མགོ་ནས།།
དཀར་ནག་རྟ་ཁྱུ་མཐོང་དུས།།
ཆུང་དུས་སྟོན་གྱི་རུ་མཚེས།།
ཡ་ཆུང་ཁོག་ནས་དྲན་བྱུང་།།
ཟླ་ལ་སྟོན་ཟླ་སླེབས་དུས།།
ཞིང་ལ་ལོ་ལེགས་བྱུང་སོང་།།
སྐྱེ་ཡག་སྟོན་བསྡུའི་བུ་མོ།།
ནས་ཞིང་ཁ་ནས་འཛུམ་སོང་།།
བསིལ་འཇམ་སྟོན་རླུང་ལྡང་དུས།།
ཁུར་ལྗིད་སྙེ་མ་ལྡེམ་སོང་།།
གསེར་མདོག་རླབས་ཀྱི་འཕྲེང་བ།།
ནས་ཞིང་ཁ་ནས་གཡོ་སོང་།།
འབྲུ་རྡོག་སྔོན་མོ་འཐོར་དུས།།
འབྲུ་མཛོད་གསེར་གྱིས་བལྟམས་སོང་།།
རྩམ་པའི་བཅུད་ལ་རོལ་དུས།།
ནས་ཞིང་གྲུ་བཞི་དྲན་བྱུང་།།
རྒྱལ་ཐང་འོ་མ་མཚོ་ལ།།
མཚོ་ལ་མཚོ་རླུང་འཁོར་དུས།།
བལ་འཇམ་ཁུར་མོང་མེ་ཏོག།
མཚོ་མོའི་མཁའ་ལ་བཀྱགས་སོང་།།
སྡེ་མཐའི་རྩི་ཏོག་སྐམ་དུས།།
རི་ལུང་འཁྱག་པས་བདམས་སོང་།།
རྒྱལ་ཐང་སྟོན་གྱི་དུས་སྟོན།།
རྗོགས་པའི་དུས་ལ་བབས་སོང་།།