བདེ་ཆེན་གྱིས་ཏང་གི་འཁྲུངས་སྐར་འདི་ལྟར་བསུ།

        སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ་7པའི་ཚེས་1ཉིན་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་99འཁོར་བའི་ཉིན་མོ་ཡིན་ལ།  ཏང་གི་ལོ་99པའི་འཁྲུངས་སྐར་བསུ་བའི་ཆེད་བདེ་ཆེན་གྱི་ལས་རིགས་སོ་སོའི་ཏང་རྩ་འཛུགས་དང་ཏང་ཡོན་ལས་བྱེད་པ་རྣམས་ཀྱིས་བྱེད་སྒོ་སྣ་ཚོགས་སྤེལ་ནས་རྟེན་འབྲེལ་ཞུས་བ་རེད།

        ཟླ་6པའི་ཚེས་28ཉིན་ནས་ཟླ་7པའི་ཚེས་5ཉིན་གྱི་བར་སེམས་ཀྱི་ཉི་ཟླ་གྲོང་ཁྱེར་གྱིས་འབྲེལ་གཏུག་གཉིས་དང་མཉམ་སྐྲུན་གཅིག  སྐུལ་འདེད་གཉིས་ཞེས་པ་རྟེན་གཞིར་བྱས་ནས་གྲོང་ཁྱེར་ཡོངས་ཀྱི་གཞི་རིམ་ཏང་རྩ་འཛུགས་སུ་ཏང་འཛུགས་སྐྱོང་གིས་དབུལ་སྒྲོལ་འགག་སྒྲོལ་གྱི་རྒྱལ་ཁ་ཕུ་ཐག་གཅོད་རྒྱུར་སྣེ་ཁྲིད་བྱས་པ་དང་སེམས་ཤུགས་གཅིག་སྒྲིལ་གྱིས་ཆ་སྒྲིག་འཚམས་འདྲི་དང་རོགས་སྐྱོར་བྱས་ཞེས་པའི་བདུན་གཅིག་གི་བྱེད་སྒོ་རབ་དང་རིམ་པ་སྤེལ་བ་རེད།

        འབའ་ལུང་རྫོང་གི་སྡེ་ཚན་ཁག་དང་ཏང་རྩ་འཛུགས་ཁག་གིས་ཏང་གི་ལོ་99པའི་འཁྲུངས་སྐར་ལ་རྟེན་འབྲེལ་ཞུ་བའི་ཆེད་རིམས་ནད་སྔོན་འགོག་ཚོད་འཛིན་དང་ཚན་རིག་ཁྱབ་སྤེལ་ཤེས་བྱ་དྲིལ་བསྒྲགས་བྱེད་སྒོ་དང་ཁོར་ཡུག་དུག་སེལ།  གླུ་ལེན་འགྲན་ཚོགས་སོགས་ཀྱི་བྱེད་སྒོ་སྤེལ་བ་རེད།

        འཇོལ་རྫོང་གི་སྡེ་ཚན་ཁག་གིས་ཏང་ནང་ཞུགས་པའི་དམ་ཚིག་བསྐྱར་དྲན་དང་། རྒྱལ་དར་སྒྲེང་བ། ཏང་གི་སློབ་ཚན་ཁྲིད་པ། དམར་གླུ་ལེན་པ། ཏང་གི་བཀའ་དྲིན་དྲན་པའི་སེམས་པ་བརྗེ་རེས་བྱས་པ་སོགས་ཀྱི་བྱེད་སྒོ་སྤེལ་ནས་ཏང་གི་འཁྲུངས་སྐར་ལ་རྟེན་འབྲེལ་ཞུ།