དབང་པོ་ལྔ་ལ་གཅེས་པའི་གླུ་ཆུང་།

        མིག་གི་དབང་པོ།

        དབང་པོ་ལྔ་ལས་རབ་གཅེས་པའི།།

        མཐོང་བྱེད་མིག་གི་དབང་པོ་ཡིས།།

        ཕྱི་རོལ་མཛེས་པ་ལོངས་སྤྱོད་བྱེད། །

        མིག་མེད་པས་ན་སྐལ་བ་མེད།།

        ཐལ་རྡུལ་མི་གཙང་ཁོར་ཡུག་དང་། །

        ཁ་པར་གློག་ཀླད་གློག་ཆས་ཀྱི།།

        ཚད་ལས་ཐལ་བའི་འོད་ཟེར་སོགས།།

        རན་པར་མ་བསྟེན་ཉེན་ཁ་ཆེ།།

        མཐོང་བྱེད་ནུས་པ་ཉམས་གྱུར་ན།།

        སྨན་དཔྱད་ནུས་པ་ཧ་ཅང་ཕྲ། །

        མིག་མེད་ལོང་བའི་འཇིག་རྟེན་དེ། །

        མྱ་ངན་མུན་པའི་ཐང་ཞིག་ཡིན། །

        རྣ་བའི་དབང་པོ།

        མུར་གོང་སྐྲ་མཚམས་གཡས་གཡོན་ན། །

        སྒྲ་འཛིན་རྣ་བའི་དབང་པོ་ཡོད།།

        སྙན་མོའི་གླུ་དང་ཡིད་འོང་གཏམ།།

        ཉན་བྱེད་དབང་པོའི་ཁོ་ན་མཆོག།

        དེ་ལ་ཚུལ་མིན་སྒྲ་ཆེན་དང་།།

        ཉན་བཟོད་དཀའ་བའི་འཛེར་སྒྲ་སོགས།།

        ཡུན་རིང་ཉན་དང་བག་མེད་སྤྱོད།།

        ཚུལ་མིན་རྣ་སྤགས་བསྔོག་པ་སོགས། །

        འོས་འཚམས་མིན་པའི་སྤྱོད་ལམ་དག།

        རིང་དུ་དོར་བར་བསླབ་བྱ་ཡིན། །

        ཉན་བྱེད་ནུས་པ་ཤོར་སོང་བ་ན།།

        སྨན་གྱི་ནུས་པས་སྐྱོབ་ཐབས་དཀའ།།

        སྙན་པ་ལོངས་སྤྱོད་མི་ལྡན་པའི།།

        འོན་པའི་འཇིག་རྟེན་སྡུག་བསྔལ་ཆེ།།

        སྣ་ཡི་དབང་པོ།

        ཞལ་རས་དབུས་ཀྱི་གཤོང་ས་ན།།

        དྲི་འཛིན་སྣ་ཡི་དབང་པོ་ཡོད།།

        གཙང་མའི་དྲི་བཟང་ལོངས་སྤྱོད་ལ།།

        སྣ་ཡི་དབང་པོ་ཁོ་ན་མཆོག།

        རྫས་འགྱུར་འབག་པའི་དྲི་ངན་དང་། །

        ཐལ་རླུང་དུ་སྨུག་བཙོག་དྲིས་གོས།།

        སྣ་ཐ་འཐེན་དང་སྣ་སྤུ་བཏོག།

        དེ་སོགས་མ་ཤེས་སྤྱོད་པ་དག།

        རིང་དུ་དོར་བ་བསླབ་བྱ་ཡིན།།

        འཕྲོད་པར་མ་བསྟེན་ཉེས་པ་ཡིས།།

        དེ་ཡི་བྱེད་ལས་ཉམས་གྱུར་ནས།།

        ཟས་ཀྱི་དྲི་མ་མི་ཚོར་བས།།

        ལོངས་སྤྱོད་མ་ཚངས་ལྷད་ཅན་འགྱུར།།

        ལྕེ་ཡི་དབང་པོ།

        རབས་དཀར་ཚེམས་ཀྱིས་སྐོར་བའི་དབུས།།

        རོ་འཛིན་ལྕར་ཡི་དབང་པོ་ཡོད།།

        རོ་དྲུག་དབྱེ་འབྱེད་བྱེད་པ་དང་། །

        འཚོ་བའི་ཟས་ཀྱི་བཅུད་ཀྱང་ལེན།།

        རྣོ་དབལ་ཚད་ལས་འདས་པ་དང་།།

        མི་གཙང་རུལ་སུངས་ཅན་དང་ནི། །

        ཚ་འཁྱག་རྩུབ་པ་ཐལ་ཆེ་དང་།།

        དྲགས་རྩུབ་འཁྲུད་སོགས་སྤྱོད་ལོག་གིས།།

        མི་ཟད་ལྕེ་ནད་བཟོ་བས་གཟབ།།

        ལྕེ་དང་ལྕེ་དབང་རྨས་གྱུར་ན།།

        སྨན་གྱི་བཅོས་ཐབས་སླ་བ་མིན།།

        རོ་ཚོར་ཉམས་པའི་བཟའ་བཏུང་དེ།།

        ལྗན་ཟས་ལྗན་ཆུ་བཏུང་བ་འདྲ།།

        ལུས་ཀྱི་དབང་པོ།

        ལུས་ཅན་ཀུན་གྱི་ལྤགས་པ་དང་།།

        ལྷན་གཅིག་གནས་པ་དྭངས་བའི་གཟུགས།།

        ལུས་ཀྱི་དབང་པོས་རེག་བྱ་ཡི།།

        ཚོར་བ་བདེ་སྡུག་མྱོང་བར་བྱེད།།

        ཚད་བརྒལ་དྲོ་གྲང་འཕྲད་པ་དང་།།

        འགོ་ནད་ཅན་ལ་རེག་པ་དང་།།

        དུག་ཅན་བྱུག་དང་དུག་ཅན་གོན།།

        དུག་སྦྲང་འབུ་ཡིས་ཕུག་པ་སོགས།།

        ལུས་ལ་གནོད་པའི་ཟས་སྤྱོད་ཀྱིས།།

        ལུས་ཀྱི་ལྤགས་པའི་ནད་རྣམས་སྐྱེད།།

        བླང་དོར་བསླབས་ནས་གཟབ་པར་བྱ།།

        གལ་ཏེ་ཉེས་ན་གཟུགས་ངན་འགྱུར།།

        བདེ་ཞིང་སྐྱིད་པའི་རེག་བྱ་ཀུན།།

        མྱོང་བའི་བསམ་པ་རྨི་ལམ་འདྲ།།