མི་རིགས་རང་སྐྱོང་ས་གནས་ཁོངས་ཀྱི་མི་རིགས་བར་གྱི་འབྲེལ་བའི་སྐོར།

དོན་ཚན་དང་པོ། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གའི་མི་རིགས་ཁག་གིས་འདྲ་མཉམ་གྱི་ཁེ་དབང་ལོངས་སུ་སྤྱོད་ཐུབ་པར་འགན་སྲུང་བྱ་རྒྱུ།མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་མི་རིགས་ཁག་གི་ལས་བྱེད་པ་དང་མང་ཚོགས་དང་མཐུན་སྒྲིལ་བྱས་ཏེ་ཁོང་ཚོའི་བརྩོན་སེམས་སྐུལ་སློང་གང་ཐུབ་ཀྱིས་ཐུན་མོང་ནས་མི་རིགས་རང་སྐྱོང་གི་ས་གནས་འཛུགས་སྐྲུན་བྱ་རྒྱུ།

དོན་ཚན་གཉིས་པ། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་མི་རིགས་ཁག་གི་ལས་བྱེད་པ་རྣམས་ལ་ཕན་ཚུན་སྐད་ཡིག་སློབ་སྦྱོང་བྱེད་རེས་བྱ་རྒྱུའི་སློབ་གསོ་གཏོང་རྒྱུ་དང་བསྔགས་བསྐུལ་བྱ་རྒྱུ།རྒྱ་རིགས་ལས་བྱེད་པས་ས་གནས་དེ་གའི་གྲངས་ཉུང་མི་རིགས་ཀྱི་སྐད་ཡིག་སྦྱང་དགོས་ལ།གྲངས་ཉུང་མི་རིགས་ཀྱི་ལས་བྱེད་པས་རང་ཉིད་མི་རིགས་ཀྱི་སྐད་ཡིག་སྦྱང་བ་དང་བེད་སྤྱོད་དགོས་པ་དང་འབྲེལ་རྒྱལ་ཡོངས་སུ་སྤྱི་ཁྱབ་ཏུ་སྤྱོད་པའི་རྒྱ་སྐད་དང་རྒྱ་ཡིག་ཚད་ལྡན་ཅན་ཡང་སྦྱང་དགོས།མི་རིགས་རང་སྐྱོང་ས་གནས་ཀྱི་རྒྱལ་ཁབ་གཞུང་གི་ལས་བྱེད་པའི་གྲས་ནས་ས་གནས་དེ་གར་སྤྱི་ཁྱབ་ཏུ་སྤྱོད་པའི་སྐད་ཡིག་གཉིས་ཡན་བེད་སྤྱོད་ཐོགས་མེད་བྱེད་ཐུབ་མཁན་ལ་བྱ་དགའ་སྤྲོད་རྒྱུ།

དོན་ཚན་གསུམ་པ། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གར་འདུས་སྡོད་བྱེད་པའི་གྲངས་ཉུང་མི་རིགས་གཞན་པར་སོ་སོའི་གནས་ཚུལ་དང་འཚམ་པའི་རང་སྐྱོང་ས་གནས་སམ་མི་རིགས་ཞང་འཛུགས་རོགས་བྱ་རྒྱུ།མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གའི་མི་རིགས་ཁག་གིས་དཔལ་འབྱོར་དང་།སློབ་གསོ།ཚན་རིག་ལག་རྩལ།རིག་གནས།འཕྲོད་བསྟེན།ལུས་རྩལ་བཅས་ཀྱི་བྱ་གཞག་གོང་དུ་སྤེལ་བར་རོགས་རམ་བྱ་རྒྱུ།མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གར་ཐར་ཐོར་དུ་གནས་བཅའ་བའི་མི་རིགས་རྣམས་ཀྱི་ཁྱད་ཆོས་དང་དགོས་མཁོར་ལྟ་རྟོག་བྱ་རྒྱུ།

དོན་ཚན་བཞི་བ། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གའི་མི་རིགས་ཁག་ལ་དམིགས་བསལ་གྱི་གནད་དོན་བྱུང་རིགས་ཐག་གཅོད་བྱེད་སྐབས་ངེས་པར་དུ་དེ་ཚོའི་འཐུས་ཚབ་དང་གྲོས་མོལ་གཟབ་ལེགས་བྱ་དགོས་ལ་ཁོང་ཚོའི་བསམ་འཆར་ལ་བརྩི་འཇོག་ཀྱང་བྱ་དགོས།

དོན་ཚན་ལྔ་བ། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གའི་མི་རིགས་ཁག་གི་སྤྱི་དམངས་ཚང་མར་རྩ་ཁྲིམས་ནང་གཏན་ལ་བབ་པའི་སྤྱི་དམངས་ཀྱི་ཁེ་དབང་ལོངས་སུ་སྤྱོད་ཐུབ་པའི་འགན་སྲུང་བྱ་རྒྱུ་མ་ཟད།ཁོང་ཚོར་སྤྱི་དམངས་ཀྱིས་འགན་འཁྲི་བསྒྲུབ་དགོས་པའི་འོས་འགན་རྣམས་བསྒྲུབ་རྒྱུའི་སློབ་གསོ་ཡང་གཏོང་རྒྱུ།

དོན་ཚན་དྲུག་པ། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་མེས་རྒྱལ་ལ་དགའ་བ་དང་།མི་རིགས་ལ་དགའ་བ།ངལ་རྩོལ་ལ་དགའ་བ།ཚན་རིག་ལ་དགའ་བ།སྤྱི་ཚོགས་རིང་ལུགས་ལ་དགའ་བ་བཅས་ཀྱི་སྤྱིའི་སྤྱོད་བཟང་དར་སྤེལ་གཏོང་རྒྱུ་དང་།ས་གནས་དེ་གའི་མི་རིགས་ཁག་གི་སྤྱི་དམངས་རྣམས་ལ་རྒྱལ་གཅེས་རིང་ལུགས་དང་།གུང་ཁྲན་རིང་ལུགས།མི་རིགས་སྲིད་ཇུས་བཅས་ཐད་ཀྱི་སློབ་གསོ་གཏོང་རྒྱུ།མི་རིགས་ཁག་གི་ལས་བྱེད་པ་དང་མང་ཚོགས་ལ་ཕན་ཚུན་ཡིད་ཆེས་དང་།ཕན་ཚུན་སློབ་སྦྱོང་།ཕན་ཚུན་རོགས་རམ།ཕན་ཚུན་སོ་སོའི་སྐད་ཡིག་དང་།ཡུལ་སྲོལ་གོམས་གཤིས།ཆོས་དད་བཅས་ལ་བརྩི་འཇོག་ཞུས་ཏེ་ཐུན་མོང་ནས་རྒྱལ་ཁབ་ཀྱི་གཅིག་གྱུར་དང་མི་རིགས་ཁག་གི་མཐུན་སྒྲིལ་སྲུང་སྐྱོང་བྱེད་པའི་སློབ་གསོ་གཏོང་རྒྱུ།།