བོད་ལུགས་གསོ་རིག་ལས་སྡོད་རྩའི་མཚན་ཉིད།

        སྡོད་རྩའི་མཚན་ཉིད་ནི། རླུང་ཁྱབ་བྱེད་ཀྱིས་བྱེད་ལས་ཚུལ་བཞིན་བྱེད་མ་ཐུབ་པར་རྩའི་འཕར་འཕྲོ་བཅད་ནས་སྐབས་སྐབས་སུ་མི་འཕར་བར་སྡོད་པ་ཅན་ལ་བྱ་སྟེ།  གནད་ཀྱི་ལྡེ་མིག་ལས།  སྡོད་ནི།  ནད་དང་གདོན་གྱིས་ཁྱབ་བྱེད་རླུང་གི་བྱེད་ལས་ཉམས་པར་གྱུར་ནས་རླུང་ཁྲག་གི་རྒྱུ་བ་མི་སྙོམས་པར་རྩ་སྐབས་སྐབས་སུ་མི་འཕར་བར་སྡོད་པ་ཅན་ནོ།  ཞེས་དང་།  གསང་ཏིག་སྒྲོན་མེ་ལས།  རེས་ཡོད་རེས་མེད་སྡོད་ཅེས་བྱ།  གྲང་ལ་འཕར་བ་ལྷག་ཅེས་བྱ།  །གྲང་ལྷག་སོད་པ་འཆི་སྡོད་ཡིན། གྲང་མེད་སྡོད་པ་ན་སྡོད་ཡིན།  དྲག་ཞན་སྡོད་པ་འདྲེ་སྡོད་ཡིན།  ཞེས་གསུངས་པ་ལྟར་དང་།   སྡོད་ལའང་དབྱེ་ན་གསུམ་སྟེ།  ན་སྡོད་དང་།   འདྲེ་སྡོད།   འཆི་སྡོད་གསུམ་མོ།  ཞིབ་པར་རང་རང་སྐབས་སུ་ཤེས་པར་བྱའོ།  

        དང་པོ་ན་སྡོད་ནི།  སྙིང་སོགས་ནད་གང་ལ་ཞུགས་པའི་གནས་ཀྱི་རྩ་འཕར་བཞིན་དུ་མི་འཕར་བར་སྐབས་སྐབས་སུ་སྡོད་པ་ཅན་ལ་བྱ་སྟེ།  དཔེར་ན།  གློ་བར་ནད་ཞུགས་ཚེ་གློ་རྩར་སྡོད་འབྱུང་བ་དང་།   གློ་ནད་གྲོལ་རྗེས་རྩ་སྡོད་ཀྱང་རང་བཞིན་དུ་སངས་པར་འགྱུར་བ་ལྟ་བུའོ།  

        གཉིས་པ་འཆི་སྡོད་ནི།  ནད་ཀྱིས་སྲོག་རྟེན་བཅོམ་ཟིན་ནས་འཆི་བར་འགྱུར་བའི་རྟགས་སུ་རྩ་འཕར་བཞིན་དུ་མི་འཕར་བར་གྲངས་དང་།   དུས་ངེས་པར་སྡོད་པ་ཅན་ལ་བྱ་སྟེ།  གཡུ་ཐོག་ཤོག་དྲིལ་ལས།   འཆི་སྡོད་གྲངས་ནི་ངེས་པ་ཅན་དུ་སྡོད།  བདུན་དང་བཅུ་གསུམ་ཉེར་གཅིག་སྟེང་དག་ཏུ།  ལན་གསུམ་བར་སྡོད་ངེས་པར་འཆི་བ་ཡིན།  ཞེས་གསུངས་པའོ། །

        གསུམ་པ་འདྲེ་སྡོད་ནི། འབྱུང་པོའི་གདོན་གྱི་གནོད་པ་ལས་བྱུང་བའི་རྩའི་གནས་དང་འཕར་གྲངས་མང་ཉུང་ལ་ངེས་པ་མེད་པར་སྐབས་སྐབས་སུ་སྡོད་ཅིང་།  རྩའི་འཕར་ཚུལ་ཡང་མི་སྙོམས་པ་དྲག་དལ་སྣ་ཚོགས་བྱེད་པ་དང་སྔ་ཕྱིར་འགྱུར་ལྡོག་སྣ་ཚོགས་བྱེད་པ་ཅན་ལ་བྱ་སྟེ།   རྩའི་སྟོང་ཐུན་ཉིན་བྱེད་སྣང་བ་ལས།   འདྲེ་སྡོད་འཕར་གྲངས་ངེས་མེད་སྐབས་སུ་སྡོད།  རྩ་རྒྱུད་མི་སྙོམས་འགྱུར་ལྡོག་སྣ་ཚོགས་འབྱུང་།  འདི་རིགས་སྣ་ལ་གདོང་བཅོས་བྱེད་པའི་ཚེ།  རྩ་ཡི་སྡོད་ཀྱང་རང་བཞིན་སངས་པར་འགྱུར།  ཞེས་དང་།   དྲང་སྲོང་ཞལ་ལུང་ལས།  འདྲེ་སྡོད་ནི།  གནས་དང་གྲངས་ལ་ངེས་པ་མེད་པར་སྡོད་པ་དང་།    རྩ་འཕར་ཚུལ་སོགས་ལའང་དྲག་དལ་སྣ་ཚོགས་བྱེད་པ་ཅན་ནོ།  ཞེས་གསུངས་སོ།