རྒྱལ་མོ་ཚ་བ་རོང་གི་ལོ་རྒྱུས་སྐོར་གྱི་དཔེ་ཆ་ཞིག་པར་དུ་བསྐྲུན་འདུག

རྩོམ་པ་པོ།     ཡིག་བསྒྱུར།       དུས་ཚོད།   2018-11-25   རྩོམ་ཁུངས།    གངས་ལྗོངས་ཉི་གཞོན།

       ཉེ་ཆར། སི་ཁྲོན་མི་རིགས་སློབ་ཆེན་གྱི་དགེ་རྒན་རིག་འཛིན་བསྟན་སྲུང་དང་ཡུན་ནན་མི་རིགས་སློབ་ཆེན་གྱི་དགེ་རྒན་དགེ་འདུན་ཨ་ཚོགས་གཉིས་ཀྱིས་བརྩམས་པའི《རྒྱལ་རོང་གི་ལོ་རྒྱུས་ཤེལ་དཀར་མེ་ལོང》ཞེས་པ་ད་ལོ་ཀྲུང་གོའི་བོད་རིག་པ་དཔེ་སྐྲུན་ཁང་གིས་པར་སྐྲུན་བྱས་ཏེ་རྒྱ་ཆེ་བའི་ཀློག་པ་པོ་རྣམས་ལ་སྤྱན་འབུལ་ཞུས་ཡོད། དེ་ཡང་སྨད་མདོ་ཁམས་སྒང་དྲུག་གི་ཡ་གྱལ་མི་ཉག་རབ་སྒང་གི་ཁོངས་གཏོགས་ཤར་རྒྱལ་མོ་ཚ་བ་རོང་གི་ཡུལ་ཁམས་འདིའི་ལོ་རྒྱུས་རིག་གནས་ཐད། རྐྱེན་སྣ་ཚོགས་ཀྱི་དབང་གིས་བོད་ཀྱི་ཡུལ་ལུང་གཞན་གྱི་མི་རྣམས་མ་ཟད། ཡུལ་འདིའི་ཕྱི་རབས་པ་རྣམས་ལའང་གསལ་ཁ་ཆེན་པོ་མེད་པར། གཞན་གྱི་ཟེར་སྒྲོས་མ་དག་པ་མང་པོའི་རྗེས་སུ་ཞུགས་པའམ་ལྟ་ཚུལ་ཡང་དག་མ་ཡིན་པ་དེ་རིགས་ཁྱབ་བརྡལ་དུ་འགྲོ་བཞིན་ཡོད་པར་དམིགས་ནས། ད་ལམ་རིག་འཛིན་བསྟན་སྲུང་དང་དགེ་འདུན་ཨ་ཚོགས་རྣམ་གཉིས་ཀྱིས་མ་བསྐུལ་དང་བླངས་སྒོས་རྒྱ་བོད་ཀྱི་ལོ་རྒྱུས་ཡིག་ཆ་རྙིང་པ་ཁུངས་ཐུབ་རྣམས་ལ་གཞི་བྱས་ཤིང་གུང་བསྒྲིགས། ས་གནས་དངོས་ལ་ཞིབ་དཔྱོད་དུ་ཐེངས་མང་ཕེབས་ཏེ། རྒྱལ་རོང་གི་ས་གནས་མི་སྣ་དང་ཡུལ་མི་རྒན་གྲས་དག་ལ་སྐུ་བཅར་ངོ་འདྲི་ཞུས་པ་དང་། ལོ་རྒྱུས་རྒྱུ་ཆ་འཚོལ་བསྡུ་སོགས་བརྒྱུད་དེ་དེབ་འདི་ལེགས་འགྲུབ་བྱུང་།

        དེབ་འདིར་རྒྱལ་རོང་རྒྱལ་ཁག་བཅོ་བརྒྱད་ཀྱི་སྔོན་གྱི་བྱུང་བ་དང་ད་ལྟའི་གནས་བབ་སོགས་བོད་ཡིག་ཏུ་སྔར་མེད་པ་ཁ་གསལ་ཞིང་དོན་འདུས་པའི་སྒོ་ནས་བྲིས་ཡོད་པ་སྟེ། རྒྱལ་རོང་གི་མིའི་རིགས་རུས་དང་རྒྱལ་པོ་རྣམས་ཀྱི་རྒྱལ་རབས་ལོ་རྒྱུས། སྐད་དང་ཡི་གེ། སྲིད་འབྱོར་རིག་གསུམ། ཆོས་ལུགས་དང་དགོན་སྡེ། ཡུལ་སྲོལ་གོམས་གཤིས། ས་དབྱིབས་ཆགས་ཚུལ། མི་སྣ་གྲགས་ཅན། མཁར་རྫོང་། དམངས་ཁྲོད་རིག་གནས་སོགས་གསལ་བར་བཀོད་ཡོད་པར་མ་ཟད། དེ་སྔའི་རྒྱལ་པོ་སོ་སོའི་མངའ་ཁོངས་ཀྱི་དེང་གི་གནས་ཚུལ་ཏེ་རྫོང་དང་སྲིད་འཛིན་ས་ཁུལ། ས་མིང་། གྲོང་རྡལ། ཡུལ་ཤོག་གྲོང་སྡེ་དང་དུད་གྲངས་མི་གྲངས་སོགས་ཀྱང་གསལ་བར་བཀོད་ཡོད་པས། ཤར་རྒྱལ་མོ་ཚ་བ་རོང་གི་ལོ་རྒྱུས་ཡག་པོ་ཞིག་དང་། ཡུལ་འདིའི་ལོ་རྒྱུས་ལ་རྒྱུས་ལོན་རྟོག་ཞིབ་མཁན་དང་མི་རབས་རྗེས་མ་དག་ལ་དཔྱད་གཞིར་རིན་ཐང་ཆེན་པོ་ལྡན་ནོ།།