༄༅། །ཞེ་སའི་ཁྱད་ཆོས་སམ་ནུས་པ།

རྩོམ་པ་པོ།     ཡིག་བསྒྱུར།       དུས་ཚོད།   2018-10-17   རྩོམ་ཁུངས།    མཆོད་མེའི་དྲ་བ།

        ཞེ་སའི་ནུས་པའམ་ཁྱད་ཆོས་གཙོ་བོ་ནི་མི་སྒེར་རམ་མི་རིགས་ཤིག་གི་གཞན་ལ་གུས་ལུགས་ཀྱི་རྣམ་འགྱུར་མཚོན་པའི་རང་བཞིན་ལྡན་ཞིང་། ཡ་རབས་ཁེངས་སྐྱུང་གི་སྤྱོད་བཟང་མཚོན་པ།  མཛའ་ཞིང་བརྩེ་བའི་རང་བཞིན། ཚིག་མཛེས་པར་བྱེད་པའི་རྒྱན་གྱི་རང་བཞིན།དེ་བཞིན་ཞེ་ས་ལ་རིམ་པའི་རང་བཞིན་དང་ཡོངས་ཁྱབ་ཀྱི་རང་བཞིན། མི་རིགས་ཀྱི་རང་བཞིན། སྙན་འཇེབས་ལྡན་པའི་རང་བཞིན་དང་གཏན་ཆགས་ཀྱི་རང་བཞིན་སོགས་ཁྱད་ཆོས་སམ་ནུས་པ་དུ་མ་ཡོད་པའོ། །

        མདོར་ན་གོང་དུ་སྨྲས་པ་བཞིན་ཞེ་ས་ནི་རང་ཅག་གངས་རིའི་འདབས་སུ་འཚོ་བའི་ཁ་བ་རི་པའི་བུ་རྒྱུད་ཀྱི་སྨྲ་བརྗོད་ཀྱི་ངག་ལས་འཁྲུངས་པའི་གུས་ལུགས་མཚོན་པའི་ཁྱད་འཕགས་ཀྱི་ཡོན་ཏན་བླ་ན་མེད་པ་ཞིག་ཡིན་པས། དེས་མི་རིགས་ཤིག་གི་བསམ་པའི་དཔལ་ཡོན་དང་བསམ་བློའི་འདུ་ཤེས། ཁྱད་འཕགས་ཀུན་སྤྱོད་དང་ཡང་ན་མི་རིགས་ཤིག་གི་སྣང་བརྙན་ཕྲན་བུ་ཚུར་སྣང་བྱེད་ཐུབ་པས།རང་ཅག་ཕ་སྤྲེལ་མ་སྲིན་གྱི་རྒྱུད་ལས་མཆེད་ཅིང་། གངས་ཆབ་སྔོན་མོ་བཏུང་ནས་ལག་ཆགས་པའི་གངས་ཕྲུག་ཚོས་རྒྱུན་ལྡན་སྤྱི་ཚོགས་འཚོ་བའི་ཁྲོད་རང་མི་རིགས་ཀྱི་ཕུལ་བྱུང་ཞེ་ས་དེ་མི་ཉམས་གོང་སྤེལ་དང་འཛིན་སྐྱོང་བདག་འཛིན་ལ་འཇུག་ནས། སྔོན་བྱོན་མེས་པོའི་རྔུལ་ཆུ་དང་ཁྲག་རྒྱུན་ལས་བལྟམས་པའི་སྲོལ་རྒྱུན་བཟང་པོ་དག་གངས་ཅན་ཨ་སྔོན་གྱི་ལྷ་ལམ་ཡངས་མོའི་ངོས་སུ་བཀྲག་མདངས་ཀྱི་གཟི་བྱིན་ཕྱོགས་བཅུར་འཕྲོ་ཐུབ་རྒྱུར་བརྩོན་བརྒྱ་འབད་སྟོང་གནང་རྒྱུའི་འདུན་པ་ལྟོགས་པ་བཟས་འདོད་དང་སྐོམ་པ་ཆུ་འདོད་བཞིན་བཅངས་བཞིན་ཡོད་དོ། །

        ཐེངས་འདིར་གླེང་བའི་བོད་ཀྱི་ཞེ་སའི་སྐོར་ལ་ཅུང་ཟད་གླེང་བ་ཞེས་པའི་བརྗོད་བྱའི་ནང་དོན་རེ་ཞིག་རྫོགས་པར་བྱས་སོ། །