དབུ་ཤོག >> བོད་ཀྱི་ལོ་རྒྱུས།
སྒོ་ཁར་ཨ་ཙ་ར་གླང་ཁྲིད་ཀྱི་རི་མོ་འབྲི་སྲོལ།
རྩོམ་པ་པོ། དུས་ཚོད། 2018-10-10 རྩོམ་ཁུངས།

        བྲམ་ཟེ་གླང་ཁྲིད་དམ་ཨ་ཙ་ར་གླང་ཁྲིད་ཁང་པའི་ནང་ངོས་སུ་བལྟས་པ་དེ་ནི་རྒྱ་གར་གྱི་རིགས་རུས་ཤིག་ཡིན་པའི་བྲམ་ཟེས་གླང་པོ་ཆེ་རྒྱན་དུ་མས་བརྒྱན་པ་ཞིག་གི་སྟེང་།ནོར་བུ་བཀལ་ཏེ་འཁྲིད་པའི་རི་མོ་འདིས་ཁྱིམ་དུ་ནོར་གཡང་འཕེལ་ནས་འདོད་རྒུའི་ལོངས་སྤྱོད་མེ་ལྟར་འབར་བའི་ཆེད་ཡིན། བྲིས་ཆ་འདི་ལྷ་མོའི་འཁྲབ་གཞུང་ཆེན་པོ་བརྒྱད་ཀྱི་ནང་ཚན་ཆོས་རྒྱལ་དྲི་མེད་ཀུན་ལྡན་གྱི་རྣམ་ཐར་ལས། ཡུལ་མཐའ་འཁོབ་བྱེ་མ་ཤིང་དྲུང་གི་བྲམ་ཟེས་རྒྱལ་པོ་དྲི་མེད་ཀུན་ལྡན་ལ་ནོར་བུ་དགོས་འདོད་དཔུང་འཇོམ་སྦྱིན་པ་ཞུས་ཏེ་གླང་པོ་ཆེར་བཀལ་ནས་རང་ཡུལ་དུ་ཆས་པའི་འདྲ་རིས་རེད་སྙམ། དེ་ཡང་རྣམ་ཐར་ལས། ༼ལེགས་ལྡན་བྲམ་ཟེ་ཆེན་པོ་ད་བཞེངས་ཤིག གཞོན་ནུ་སྟོབས་རྩལ་ལྡན་པའི་གླང་ཆེན་ལ། དཔུང་འཇོམ་འདོད་རྒུའི་གཏེར་ཆེན་མགྱོགས་པར་ཀོལ༽ཞེས་པ་ནས་མཚོན་ནོ།།

        བོད་ཀྱི་གནམ་ལོ་གསར་དུ་བཞད་སྐབས་ཐབ་ཚང་གི་ལྡེབས་སུ་ནོར་བུས་བྱུར་བུར་གཏམས་ཤིང་། དེའི་སྟེང་དུ་མེ་རིས་ཡོད་པའི་ནོར་བུ་མེ་འབར་དང་གཡུང་དྲུང་ནང་བསྐོར། གྲོ་སོ་ཕྱེ་མར་སོགས་ཀྱི་རི་མོ་འབྲི་སྲོལ་ཡོད་པས་དེའི་རི་མོ་རྣམས་ལས་དཔལ་དང་འབྱོར་པ་རྒྱས་པ་དང་། མཐུན་རྐྱེན་གྱི་ལེགས་ཚོགས་མཐའ་དག་ནམ་ཡང་མི་འགྱུར་བར་གཡུང་དྲུང་ལྟར་བརྟན་པ་བཅས་མཚོན་གྱི་ཡོད། གྲོ་སོ་ཕྱེ་མར་བྲིས་པ་དེ་ནི་ས་ཕྱོགས་གང་དུ་ཕྱིན་ཀྱང་ཁ་གྲོ་པོ་ཡོང་པ་སྟེ། བོད་རིགས་ཀྱི་གོམས་སྲོལ་དུ་གྲོ་ནི་དོན་གང་བྱས་ཀྱང་སྟོང་ལོག་ཏུ་མ་གྱུར་བར་དེ་བསྒྲུབས་པའི་རྟེན་འབྲེལ་ཡོད་པའི་རྫས་ཤིག་ཏུ་བརྩི་བ་རེད།དཔེར་ན་གྲོ་སོ་ཕྱེ་མར་ཞེས་འབོའི་གཞོགས་གཅིག་གྲོས་བསྐངས་པ་དང་ལོ་གསར་ཚེས་གཅིག་གི་སྔ་དྲོ་གྲོ་ཐུག་བཏུང་བ་སོགས་བྱེད་ཀྱི་ཡོད།

        གོང་གསལ་རི་མོ་དེ་དག་སྡོད་ཁང་ནང་དུ་བྲིས་ཚེ་བལྟས་པ་ཙམ་གྱིས་བོད་ཀྱི་རི་མོའི་སྒྱུ་རྩལ་དང་མི་རིགས་འདིའི་ཐུན་མོང་མ་ཡིན་པའི་ཁྱད་ཆོས་མངོན་གྱི་ཡོད། ད་དུང་རི་མོ་སོ་སོའི་ནང་དོན་དང་རྣམ་པ་མི་འདྲ་བའི་ཐོག་ནས་རྟགས་དང་རྟེན་འབྲེལ་རེ་མཚོན་པར་བྱས་ཡོད་པ་འདིས་ཁུངས་དང་རྒྱུ་མཚན་ངེས་ཅན་ཞིག་དྲངས་པའི་ཐོག་ནས། བོད་རིགས་ནི་སྔ་རབས་ནས་ཤེས་རིག་རྣམ་པར་བཀྲ་བའི་མི་རིགས་ཤིག་ཡིན་པ་གླེང་མེད་དུ་མངོན་པ་བཅས་སོ།།