དབུ་ཤོག >> སློབ་གསོའི་རིགས་གཞུང་།
སྐད་གསང་མཐོན་པོས་ཀློག་འདོན་བྱེད་པའི་དགེ་མཚན་བཅུ།
རྩོམ་པ་པོ། ཀྲུང་གོའི་བོད་ཀྱི་གསར་འགྱུར་དྲ་བ། དུས་ཚོད། 2018-08-24 རྩོམ་ཁུངས། སེམས་ཀྱི་ཉི་ཟླའི་བོད་ཡིག་དྲ་བ།

ཀློག་འདོན་ནི་མི་རེ་རེར་དབང་བ་སྟེ། མི་ལོ་བརྒྱད་བརྒྱའི་སྔོན་གྱི་མཁས་དབང་ཀྲུའུ་ཞི་ཡིས“ཡི་གེ་ཀློག་པ་ཡིན་ཕྱིན། ཡིག་འབྲུ་རེ་རེ་སྐད་གསང་མཐོན་པོའི་ཀློག་དགོས”ཞེས་བརྗོད་པ་ལྟར་རོ།།

 

      ཀློག་འདོན་ནི་སློབ་སྦྱོང་བྱེད་སྟངས་ཤིག་ཡིན་པར་མ་ཟད། བརྩེ་དུང་དང་འདུ་ཤེས་བརྒྱུད་འཛིན་བྱེད་ཐབས་ཤིག་ཀྱང་ཡིན། སྐད་གསང་མཐོན་པོའི་ཀློག་འདོན་བྱས་ན་སྐད་ཚོར་སྐྱེད་སྲིང་བྱེད་ཐུབ་པར་མ་ཟད། བག་ཆགས་ཇེ་ཟབ་ཏུ་འགྲོ་བ་དང་། གོ་སྟོབས་འཕེལ་ནས་རང་རློམ་སྐྱེས་ཤིང་། གྲུབ་འབྲས་ལ་རོལ་མྱོང་གིས་དགའ་བ་བསྐྱེད་ཐུབ།

 

༡ ཀླད་གཡས་གསར་འབྱེད་བྱེད་པར་ཕན།

 

      སྐད་གསང་མཐོན་པོའི་ཀློག་འདོན་བྱེད་པ་ནི་དོན་དངོས་སུ་ཀློག་འདོན་མཁན་རང་ཉིད་ཀྱི་སྐད་གདངས་ལ་རོལ་མྱོང་བྱེད་པ་ཡིན། དེ་ལྟར་ཡུན་རིང་བྱིན་ཚེ། བྱིས་པའི་དངོས་རྟོག་རྗེས་དཔག་གི་ནུས་པ་གསོ་པར་ཕན།

 

༢ བྱིས་པའི་གཤིས་ཀ་བསྒྱུར་བཅོས་བྱེད་པར་ཕན།

 

གཤིས་ཀ་ཁོག་འཛིན་ཅན(内向)གྱི་བྱིས་པ་མང་ཆེ་བས་མི་མང་འདུས་སར་རང་ཉིད་ཀྱི་སྐད་འབྱིན་འདོད་མེད་པའམ་ཡང་ན་སྐད་ཧ་ཅང་དམའ། གལ་ཏེ་བྱིས་པར་སྐད་གསང་མཐོན་པའི་སློབ་ཚན་དང་དཔེ་དེབ་གཞན་དག་གི་ནང་དོན་ཀློག་པ་རྒྱུན་འཁྱོངས་བྱས་ཚེ། བྱིས་པའི་རང་རློམ་མམ་ཡིད་ཆེས་བསྐྱེད་ཐུབ་པར་མ་ཟད། བྱིས་པ་གཏམ་གླེང་བྱེད་པར་དགའ་བར་བསྒྱུར་སླ་ལ། བྱིས་པའི་གཤིས་ཀའང་དེ་དང་བསྟུན་ནས་འགྱུར་སྲིད།

 

 

༣ བྱིས་པས་ཤགས་འགྱེད་ཀྱི་རིན་ཐང་རྟོགས་པར་ཕན།

 

      སྐད་གསང་མཐོན་པོས་སྒྲ་སྣ་ཚོགས་འབྱིན་པར་བྱེད་པ་དང་རང་ཉིད་ཀྱི་བསམ་ཚུལ་བརྗོད་དུ་འཇུག་པ་ནི་བྱིས་པ་མ་འོངས་ལས་དོན་ལ་ཞུགས་པར་བསྐུལ་བའི་བྱང་ཚད་ཇེ་ཡག་དང་སྤུས་ཚད་མཐོར་འདེགས་སུ་གཏོང་ཐབས་ཅིག་གོ

 

༤ རང་མཐོང་ཆུང་བའི་འདུ་ཤེས་བསྒྱུར་བར་ཕན།

 

      སྦྱང་ཞན་སློབ་མ་མང་ཆེ་བས་རང་ཉིད་ལ་མཐོང་ཆུང་དང་རང་ཉིད་ཀྱི་ནུས་པར་ཡིད་ཆེས་མི་བྱེད་ལ། དེའི་མངོན་རྟགས་གཙོ་བོ་ནི་ཁོ་ཚོས་སྐད་གསང་མཐོན་པོས་སློབ་ཚན་ཀློག་འདོན་བྱེད་མི་ནུས་པའམ་རེ་བ་ལྟར་ཀློག་འདོན་བྱེད་མི་ཐུབ་པར་མ་ཟད། ཀློག་འདོན་སྐབས་ཡི་གེ་དང་ཐ་སྙད་ཆད་ལྷག་འབྱུང་བ། ཡང་ན་དྲི་བར་ལན་འདེབས་སྐབས་བསམ་ཚུལ་ཇི་བཞིན་བརྗོད་མི་ནུས་པའམ་ཚིག་སྔ་ཕྱི་འབྲེལ་མི་ཆག་པ་རེད། སྐད་གསང་མཐོན་པོས་ཀློག་འདོན་བྱེད་ཚུལ་སྦྱང་བ་བྱེད་འགོ་བརྩམས་པ་ན། སྦྱང་ཞན་སློབ་མ་མང་ཆེ་བར་ཀློག་འདོན་གྱི་བརྒྱུད་རིམ་ཁྲོད་བསམ་གཞིགས་ཀྱི་ནུས་པ་ངེས་ཅན་གྲུབ་ཐུབ།

 

༥ སྐད་གསང་མཐོན་པོས་ཀློག་འདོན་བྱེད་དུས་ཀླད་པའི་དབང་རྩ་ངར་ལངས་པའི་རྣམ་པར་གནས།

 

      སྐད་གསང་མཐོན་པོས་ཀློག་འདོན་བྱེད་དུས་བྱིས་པའི་དབང་རྩ་ངར་ལངས་པའི་རྣམ་པར་གནས་པས། སློབ་ཚན་དང་རྩོམ་ཡིག་གི་ནང་དོན་གཏིང་ཟབ་ཏུ་གོ་བ་ལན་པར་ཕན།

 

 

༦ བྱིས་པའི་དྲན་ཤེས་འཕེལ་བར་ཕན།

 

       སྐད་གསང་མཐོན་པོས་སློབ་ཚན་ཀློག་འདོན་བྱེད་དུས་བློ་རྩེ་གཅིག་སྒྲིམ་བྱེད་དགོས། བྱིས་པའི་སེམས་རྣལ་དུ་ཕབ་ནས་དོན་དག་ཅིག་སྒྲུབ་པའི་ཕན་འབྲས་ནི་དུས་རྒྱུན་ལས་ལྡབ་འགའི་མང་བས། བྱིས་པར་སྐད་གསང་མཐོན་པོའི་ཀློག་འདོན་བྱེད་དུ་བཅུག་ན་ཀླད་ཆེན་ནི་སྟོང་བའི(排空)རྣམ་པར་གནས་པས། ཀློག་འདོན་གྱི་ནང་དོན་སེམས་སུ་འཇགས་པར་ཕན་པ་སྟེ། མ་གཞི་སྐར་མ་སུམ་ཅུའི་ནང་ཡིད་ལ་འཛིན་ཐུབ་པའི་རིགས་རྣམས་སྐད་གསང་མཐོན་པོས་ཀློག་འདོན་བྱས་ན་སྐར་མ་བཅུའི་ནང་ཡིད་ལ་འཛིན་ཐུབ།

 

 

 

༧ སྐད་ཚོར་གྲུབ་པར་ཕན།

 

      སྐད་གསང་མཐོན་པོས་རྩོམ་ཡིག་ཀློག་པ་ནི་སྐད་ཚོར་གྲུབ་པའི་ཐབས་ལམ་ཉག་གཅིག་ཡིན། གལ་ཏེ་སྐད་གསང་མཐོན་པོས་རྩོམ་ཡིག་ཀློག་འདོན་མ་བྱས་ཚེ། སྐད་ཚོར་རྣལ་མ་འབྱུང་མི་སྲིད་ཅེས་བརྗོད་ཆོག

 

 

༨ རྩོམ་གྱི་མཛེས་པ་བསྐྱར་དུ་མྱོང་ཐུབ།

 

      རྩོམ་ཡིག་རེ་རེར་མངོན་མེད་དོན་མཚོན་གྱི་བྲོ་བ་དང་མཛེས་ཉམས་ཐུན་མོང་མ་ཡིན་པ་མཆིས་པར་མ་ཟད། རྩོམ་པ་པོའི་ཐོལ་ཤེས་ཀྱི་མཛེས་པ་སུམ་ཡོད། སྐད་གསང་མཐོན་པོར་བཀླག་ན་མཛེས་པ་དེ་རིགས་བསྐྱར་དུ་མྱོང་ཐུབ་ལ། རྩོམ་ཡིག་གི་ནང་དོན་གྱི་མཛེས་སྡུག་སེམས་ཀྱིས་ཚོར་ཐུབ།

 

 

༩ སྦྱང་འབྲས་མཐོར་འདེགས་སུ་གཏོང་བར་ཕན།

 

       སྐད་གསང་མཐོན་པོའི་བཀླག་ན་ཡིད་ལ་འཛིན་དགོས་པའི་བསླབ་ཁག་ལ་ཕན་པ་མངོན་གསལ་མཆིས། ཁྱིམ་བདག་རྣམས་ཀྱིས་རིང་ཐུང་མཚུངས་པའི་རྩོམ་ཡིག་གཉིས་གདམས་ཏེ། སྐད་དམའ་མོས་ཁོག་འདོན་དང་སྐད་གསང་མཐོན་པོས་གྱེར་འདོན་ཏེ་ཀློག་ཐབས་གཉིས་ལས་ཐབས་གང་ཞིག་ལ་ཕན་འབྲས་ལྡན་པ་ཚོད་ལྟ་བྱས་ཆོག

 

 

༡༠ རྩོམ་འབྲིའི་ནུས་པ་མཐོར་འདེགས་སུ་གཏོང་བར་ཕན།

 

       སྐད་གསང་མཐོན་པོས་གཞན་གྱི་རྩོམ་ཡིག་ཀློག་པ་ནི་སློབ་སྦྱོང་གི་བརྒྱུད་རིམ་ཞིག་དང་། སྐད་གསང་མཐོན་པོས་རང་ཉིད་ཀྱི་རྩོམ་ཡིག་ཀློག་འདོན་བྱེད་པ་ནི་དག་བཅོས་ལེགས་པར་བྱེད་པའི་བརྒྱུད་རིམ་ཞིག ངར་ཤུགས་ཆེན་པོའི་ཀློག་འདོན་དང་བློ་སྐྱོར་གྱིས་ཀློག་འདོན་གྱི་སྤྲོ་སྣང་ཆེར་བཏེགས་ཏེ། བརྩམས་ཆོས་གྲགས་ཅན་གྱི་སྡེབ་སྦྱོར་གྱི་མཛེས་པ་དང་། དབྱངས་འགྲོས་ཀྱི་མཛེས་པ། རྩོམ་ཉམས་ཀྱི་མཛེས་པ་བཅས་ཀློག་འདོན་ཁྲོད་ད་གཟོད་ཡང་དག་པར་རོལ་མྱོང་བྱ་ཐུབ་ལ། རྩོམ་ཡིག་གི་འགོ་དང་འཕེལ་རིམ། དཀྱོགས་མཚམས། མཇུག་བཅས་རོལ་མྱོང་མཐའ་འཁྱོལ་བྱ་ཐུབ། འདི་ལྟར་དུས་ཡུན་རིང་བོར་ཀློག་འདོན་རྒྱུན་འཁྱོངས་བྱས་ན། དཔྱོད་ཚོར་གྱི་ཐད་ནས་དང་ཤེས་ཚོར་གྱི་ཐད་ནས། ཕྱོགས་ཡོངས་ཀྱི་ཐད་ནས་བརྩམས་ཆོས་གྲགས་ཅན་གྱི་སྙིང་བཅུད་ལ་ངོས་འཛིན་དང་ཉམས་ཞིབ་བྱེད་ཐུབ་པར་མ་ཟད། རང་འགུལ་སྒོས་འཇུ་ལེན་བྱེད་ཐུབ། དུས་ཡུན་རིང་བོར་ཀློག་འདོན་རྒྱུན་འཁྱོངས་བྱས་ན། མིག་གིས་རིག་དུས་ཁ་འགུལ་ཤེས་པ་དང་། ཁ་འགུལ་བ་དང་ཆབས་ཅིག་རྣ་བས་ཉན་ཤེས་པ། རྣ་བར་གོ་མ་ཐག་ཏུ་སེམས་ནས་བསམ་ཤེས་པའི་དཔེ་ཀློག་གི་གོམས་སྲོལ་ཡག་པོ་ཞིག་གསོ་སྐྱོང་བྱ་ཐུབ།

 

      སྐད་ཡིག་སློབ་གསོའི་མཁས་དབང་དང་རྒན་རབས་པ་ཡེ་ཧྲིན་ཐའོ་ཡིས“སྙན་ངག་ཀློག་དུས། རྩད་ཞིབ་ཀྱི་ཡོང་འབབ་ལ་དཔྱོད་སྟོབས་ཀྱི་གོ་བ་ལེན་དགོས་པར་མ་ཟད། བྱམས་བརྩེ་ལྡན་པའི་ཉམས་ཞིབ་བྱ་དགོས། དེ་ལྟར་བྱས་ཚེ་ཤེས་མེད་ཚོར་མེད་ངང་རྩོམ་གྱི་ནང་དོན་དང་སྤྱི་ཁོག་སྒྲིག་གཞི་སོགས་ཀློག་པ་པོ་རང་ཉིད་ཀྱི་ཤེས་བྱར་འགྱུར་སྲིད་དེ། འདི་ནི་འབྱུང་དཀོན་པའི་སེམས་ཁམས་ཤིག་གོ །”ཞེས་བསྟན་པ་བཞིན་ཚན་རིག་དང་མཐུན་པར་ཀློག་འདོན་བྱས་ན་སྐད་ཚོར་ལེགས་པར་གྲུབ་ཐུབ་པར་མ་ཟད། བློ་སྐྱོར་ནི་སྐད་ཡིག་རྒྱུ་ཆ་ནང་འགྱུར་གྱི་ཐབས་ལམ་ལེགས་ཤོས་ཏེ། ཀློག་འདོན་གྱིས་གྲུབ་པའི་སྐད་ཚོར་གསོག་འཇོག་དང་དྭངས་སྙིགས་འབྱེད་ཐུབ། ཚན་རིག་དང་མཐུན་པར་བཀླག་པའི་མཇུག་འབྲས་ནི་སློབ་གྲོགས་རྣམས་ཀྱིས་ངག་ཐོག་ནས་རྩོམ་དང་ལེགས་བཤད་ཤར་མ་ཐོན་ཐུབ་ལ། འདི་ལྟའི་གསོག་འཇོག་ལས་ཐོབ་པའི་ཐ་སྙད་དང་སྣ་མང་ཕུན་སུམ་ཚོགས་པའི་སྐད་ཆའི་བརྗོད་སྟངས་ཀྱིས་འོ་སྐོལ་གྱི་རྩོམ་ཡིག་འབྲི་སྦྱོང་ལ་ལད་འབྲི་དང་གཞི་འཛིན་གྱི་ནུས་པ་ལྡན་པར་བྱས་ཏེ། རྩོམ་འབྲིའི་ནུས་པ་མཐོར་འདེགས་སུ་གཏོང་བར་ཕན་པ་ཆེན་པོ་ལྡན།