དབུ་ཤོག >> དམངས་ཁྲོད་རྩོམ་རིག
དགོས་པ་ཡོད་པའི་དར་བཤད་ཐུང་ཐུང་ཞིག
རྩོམ་པ་པོ། ཁམས་པའི་དྲ་བ། དུས་ཚོད། 2018-08-21 རྩོམ་ཁུངས། སེམས་ཀྱི་ཉི་ཟླའི་བོད་ཡིག་དྲ་བ།

ཨེ་མ་ཧོ། དུས་དེ་རིང་གནམ་ལ་མི་འགྱུར་སྐར་མ་བཟང་། ས་ལ་མི་འགྱུར་དུས་ཚོད་བདེ། བར་ལ་མི་འགྱུར་བསྐལ་བ་བཟང་། གཟའ་དང་སྐར་མ་འཕྲོད་སྦྱོར་ཕུན་སུམ་ཚོགས་པའི་ཉི་མར། དུས་ཚོད་ལ་མགོ་ལོ་ཡག  སྐར་མ་ལ་འཕྲོད་ཡ་བཟང་། ལོ་སྐོར་བཅུ་གཉིས་འཛོམས། གཟའ་གསུམ་ལས་ཀྱི་རྟེན་འབྲེལ་ཡག སྐར་མའི་འོང་འགྲོས་ཐོག་ལ་སྟོན་མོ་སྐར་ཐོག་ཚོགས། སྐར་མ་བདེན་ཐོག་བྱས་པའི་ཉི་མར། གནམ་ལ་བཀྲ་ཤིས་ཉི་ཟླ་གཉིས། ཕྱོགས་སྐར་མ་མང་པོའི་ཚོགས་ཀྱིས་སྐོར་བ། ས་ལ་བཀྲ་ཤིས་འབྱུང་བ་ལྔ། ས་ཆུ་མེ་རླུང་ཚོགས་ཀྱིས་བསྐོར་བ་ལགས།


ད་ངས་དར་འདི་ཡི་དར་བཤད་ཅིག་བྱེད་ན། དར་དཀར་པོ་དམར་པོ་སེར་པོ་གསུམ། སྔོན་པོ་ལྗང་ཁུ་དར་སྣ་ལྔ། དར་དམར་པོ་མཆོག་དེ་གླིང་གེ་སར་རྒྱལ་པོའི་དམར་དར་ཡིན། ས་དེ་ལ་བཙན་ཕྱུག་དར་རྒྱུ་འཛོམས། དར་སེར་པོ་མཆོག་དེ་གོང་དང་བླ་མའི་ཆོས་དར་ཡིན། ཆོས་དང་སངས་རྒྱས་བསྟན་པ་དར་བའི་རྟེན་འབྲེལ་ཡིན།དར་དཀར་པོ་གར་འོང་གང་འོང་ཟེར། དར་དཀར་པོ་མར་རིའི་རྒྱ་ནས་འོང་།  རྒྱ་མོ་གསུམ་གྱིས་འཁལ་བའི་དར། རྒྱ་བཟའ་གཡང་འབྱུང་སྒྲོལ་མས་འཐག་པའི་དར། བཀྲ་ཤིས་སྟོན་མོ་ཉིན་མོ་འདི་ལ་འབུལ་བའི་དར་མཆོག་ཡིན་ལགས།    ཡཱ། གསེར་སེར་པོ་མེད་ན་མི་ལོན་ནོ།། ཁ་མཁས་པ་མེད་ན་མི་འགྲུབ་བོ།། དཀར་མོ་དངུལ་དང་དགུ་བསྐོར་རྒྱུགས། སྔོན་མོ་གཡུ་དང་བཅུ་བསྐོར་རྒྱུགས། སེར་པོ་གསེར་དང་མཉམ་བཀྱག་བྱས།


    ཡཱ། དར་འདི་ལ་ཡོན་ཏན་མང་པོ་ཡོད། དར་མགོ་ལ་གསེར་སྐུད་ཆ་གསུམ་ཡོད་པ་དེ། སངས་རྒྱས་སྟོང་སྐུ་ཆགས་པའི་ཆགས་ཚུལ་ཡིན། དར་སྐེད་ལ་གཡུ་འབྲུག་དགུ་བསྐོར་ཡོད་པ་དེ། བོད་མིའུ་གདོང་དྲུག་ཆགས་པའི་ཆགས་ཚུལ་ཡིན། དར་མཇུག་ན་རྒྱ་ནག་ལྕགས་རི་ཡོད་པ་དེ། རྒྱ་ནག་ཞིང་ཆེན་བཅོ་བརྒྱད་ཆགས་པའི་ཆགས་ཚུལ་ཡིན། དར་མཐའ་ན་ཚ་ལོ་ལྷུག་ལྷུག་ཡོད་པ་དེ། ས་དང་སྲིད་པ་ཆགས་པའི་ཆགས་ཚུལ་ཡིན། དར་དཀར་པོ་དྲི་མེད་ཚ་ལོ་ཅན། འདོམ་གྱིས་འཇལ་ན་འདོམ་གང་ཡོད། ཁྲུ་ཡིས་འཇལ་ན་ཁྲུ་གང་ཡོད། རྩི་ཤིང་ནགས་ཚལ་སྐྱེས་སྟོབས་ཡིན།


     དར་ཡར་གཡུགས་ཕར་གཡུགས་མར་གཡུགས་གསུམ། དར་ཡར་གཡུགས་ཡར་ལ་གཡུགས་རྒྱུ་དེ། སྟོད་རྒྱ་གར་ཆོས་གཡང་ལེན་ས་རེད། ཆོས་གཡང་ཆོས་དང་བཅས་ལེན་ཤོག དར་ཕར་གཡུགས་ཕར་ལ་གཡུགས་རྒྱུ་དེ། བོད་སྒམ་པོའི་ནོར་གཡང་ལེན་ས་རེད། ནོར་གཡང་ནོར་དང་བཅས་ལེན་ཤོག དར་མར་གཡུགས་མར་ལ་གཡུགས་རྒྱུ་དེ། རྒྱ་ནག་པོའི་ཁྲིམས་གཡང་ལེན་ས་རེད། ཁྲིམས་གཡང་ཁྲིམས་དང་བཅས་ལེན་ཤོག     ཡཱ། ད་བུ་ཆུང་ང་ཁ་བདེ་ཡང་། དུས་ཀྱིས་མ་འདང་བས་འདི་ན་མཚམས་བཞག  དར་བཤད་ཚིག་གསུམ་ཞུས་པ་དེས་ཚང་མ་ལ་བཀྲ་ཤིས་བདེ་ལེགས་སྩོལ་བའི་སྨོན་ལམ་ཤོག