དབུ་ཤོག >> གསོ་རིག་གཞུང་ལུགས།
གསོ་རིག་རྒྱུད་བཞིའི་མན་ངག་རྒྱུད་ཀྱི་རྒས་པ་གསོ་བ།
རྩོམ་པ་པོ། མ་གསལ། དུས་ཚོད། 2018-08-16 རྩོམ་ཁུངས། མཚོ་སྔོན་པོ་དྲ་བ།

        དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།རྒས་པ་གསོ་བའི་སྐབས་ལ་ཇི་ལྟར་བསླབ་པར་བགྱི།།འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང༌།དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།།ཀྱེ་དྲང་སྲོང་ཆེན་པོ་ཉོན་ཅིག ཚེ་ཟད་རྒས་པའི་ནད་ལས་བསྲིང་བ་ཡི། །བཅུད་ལེན་གྱི་ནི་ཆོ་ག་བཤད་པར་བྱ། །

        འདི་ལ་ཕན་ཡོན་གནས་རྟེན་བྱ་ཐབས་བཞི། །

        1.ཕན་ཡོན་ཚེ་རིང་ན་ཚོད་དར་ལ་འཇོག །ལུས་མདངས་སྟོབས་སྐྱེ་དབང་པོ་དྲན་པ་གསལ།།བློ་རྣོ་སྐད་མདངས་ལྡན་ཞིང་རོ་ཙར་བྱེད། །

        2.དེ་གནས་ས་གཙང་དབེན་ཞིང་ཉམས་དགའ་ལ། །ཆུ་ཤིང་འཛོམ་ཞིང་བར་ཆད་མེད་པར་སྒྲུབ། །

        3.རྟེན་ནི་ཧ་ཅང་རྒས་པ་མ་ཡིན་པས། ། མེ་ཉི་ཆགས་སྤྱོད་ལུས་སེམས་དྲག་ལས་དང༌། །རུལ་སྐྱུར་རྗེན་ངད་ཚྭ་སོགས་སྤངས་བྱས་ལ།། ཚེས་གྲངས་བཟང་ལ་ལྷ་མཆོད་ཁྲུས་བྱས་འཇུག །

        4. བྱ་བའི་ཐབས་ལ་གཙོར་སྒྲུབ་ཞོར་སྤྱད་གཉིས། 

        4.1གཙོ་བོར་སྒྲུབ་པ་སྣུམ་བཅོས་དུགས་བྱས་ལ། ། ཨ་རུ་སྐྱུ་རུ་རྒྱམ་ཚྭ་པི་པི་ལིང༌། །ཤུ་དག་བཅའ་སྒ་ཡུང་བ་བྱི་ཏང་ག ། བུ་རམ་བ་ཆུར་སྦྱར་བའི་ཁྲུས་ཀྱིས་སྦྱང༌། །མ་སྦྱངས་བཅུད་ལེན་རོ་ཙ་སྦྱོར་བྱེད་པ། །དྲི་བཅས་ཚོས་ལྟར་བྱས་པ་དོན་མེད་འགྱུར། ། ལྷ་མིན་ཁྲག་དེ་བཅུད་ལེན་མཆོག་ཡིན་པས། །ཤུན་པ་ཕྲལ་ལ་ཞག་གཅིག་ཆང་ནང་སྦང༌། ། ཁུ་བཙགས་དྭངས་མ་ནང་པར་རན་ཙམ་བསྟེན། །རྗེས་ལ་འོ་མ་ཞུན་མར་སྐམ་ས་ཡི། ། ཤ་ཁུ་ནད་དང་གང་འཕྲོད་བསྐོལ་ལ་བླུད། །ཡང་ན་སྒོག་སྐྱ་ཞུན་མར་སྦྱར་ལྡེ་གུ། ནས་སྣོད་བདུན་གསུམ་བཞག་པའི་ཞག་གྲངས་བསྟེན།། རླུང་ཤས་ཅན་གྱི་ཚེ་འཕེལ་རིང་འཇོག་ཡིན། ། བྲག་ཞུན་མདོག་ནག་ས་མེད་བ་གཅིན་བྲོ། །སྣུམ་ཞིང་ཁ་བསྐ་ལྕི་བ་ལྕགས་གྱུར་མཆོག ། གསེར་དངུལ་ཟངས་ལྕགས་སྦྱར་ཏེ་འོ་མས་དབུལ།།ཡང་ན་ནད་དང་གང་འཕྲོད་སྨན་ཆ་མཉམ། ། ལྕགས་ཀྱི་སྣོད་དུ་བཅུག་ལ་ཚད་ལྡན་བཟའ། །འདི་ལ་མོན་སྣེ་རྒྱ་སྲན་རྟག་ཏུ་སྤང༌། ། ས་སྟེང་བྲག་ཞུན་མ་བཅོམ་ནད་ཡོད་མིན། །ཁྱད་པར་ཚ་ཤས་ཅན་གྱི་ཚེ་འཕེལ་མཆོག ། ཙི་ཏྲ་ཀ་དང་སྦྲང་རྩི་མར་སྦྱར་བ། ། ཟླ་བ་གཅིག་ཏུ་འཕྲོད་པའི་ཟས་དང་བསྟེན། ། ཚེ་རིང་ལུས་རྒྱས་མེ་དྲོད་འབར་བར་འགྱུར། །བད་ཀན་གྲང་ནད་ཅན་གྱི་ཚེ་གནས་སོ། ། དེ་དང་བ་ཆུར་སྦྱར་བསྟེན་མཛེ་ནད་འཇོམས། ། ཨ་རུ་བར་སྐྱུར་འབྲས་བུའི་སྨན་མར་གྱིས། ། དབང་གསལ་སྟོབས་སྐྱེ་འདུས་པའི་ནད་སེལ་ཏེ། ། ན་ཚོད་དར་ལ་འཇོག་པའི་དམ་པ་ཡིན། ། རྩི་བཞི་དྭངས་མ་ལྔ་ཡི་བཅུད་བླངས་པ། །ས་ཡི་དྭངས་མ་བྲག་ཞུན་ཤ་ཡི་གསོས། །རྡོ་ཡི་དྭངས་མ་ཅོང་ཞི་རུས་པའི་གསོས། །ཤིང་གི་དྭངས་མ་བུ་རམ་སྟོབས་ཀྱི་གསོས། །མེ་ཏོག་དྭངས་མ་སྦྲང་རྩི་མདངས་ཀྱི་གསོས། །རྩི་ཡི་དྭངས་མ་མར་དཀར་བཅུད་ཀྱི་གསོས། །ཤུག་འབྲུ་བ་ལུ་མཚེ་དང་མཁན་པ་བཞི། །དགུན་མི་སྐམས་པ་ཚེ་ཡི་གསོས་སུ་འགྱུར། །འདི་དགུའི་བཅུད་ལོངས་སྲོག་གཅོད་ནད་དགུ་གྲོལ། །རྒས་པའི་རྟགས་ནུབ་བཅུ་དྲུག་ལྟ་བུའི་ལུས།།སེང་གེའི་རྩལ་ལ་གླང་པོ་ལྟ་བུའི་སྟོབས། །རྨ་བྱའི་མདངས་ལྡན་མགྱོགས་པ་ཅང་ཤེས་རྟ། །ཚེ་སྲོག་ཉི་ཟླ་གཉིས་དང་མཉམ་པར་འགྱུར། །

        དེ་ཡི་སྦྱོར་ཐབས་ཆེན་པོ་ཆུང་ངུ་གཉིས། །

        དང་པོ་ཅོང་ཞི་བྲེ་གང་ཞོ་གཅིག་ཆུར། །བསྡུས་པའི་ཁུ་བ་བྲེ་གང་རྩིགས་མ་བཏོན། །བདུད་རྩི་བཞི་དང་བྲག་ཞུན་བྲེ་ཕྱེད་ཕྱེད། །གུད་གུད་བསྡུས་པའི་ཁུ་བ་ཁྱོར་བ་རེ། །འོ་མ་མར་སྲང་སུམ་ཅུ་ཆུ་བཅད་ལ། །བུ་རམ་སྦྲང་བྲེ་དོ་སྦྱར་ཐོད་བཟང་བླུག །

        བཻ་རོ་ཙ་ན་ཨོཾ།བཛྲ་ས་ཏྭ་ཧཱུཾ། རཏྣ་སམྦྷྰ་བ།ཨ་མི་ཏ་བྷ་ཧྲཱི། ཀརྨ་བཛྲ་ཨཱ། 

རིགས་ལྔ་ཡབ་ཡུམ་བྱང་སེམས་འཕྲོ་འདུ་བྱ། ། ཟླ་བ་ཡར་ངོའི་ཚེས་གཅིག་ནང་པར་བཟའ། ། དྲོ་གོང་རྒྱུན་བསྟེན་རྔུལ་མ་བྱུང་ཙམ་བཅག།

        ཆུང་བ་ཅོང་ཞི་ཕུལ་གང་སྤང་མེར་བསྲེགས། །ཆུ་ནང་བཏོན་ཏེ་འོ་མ་བྲེ་གང་དང༌། །མར་སྲང་གསུམ་བཅོས་ལུག་ཞོ་ཙམ་གྱུར་ལ། །བྲག་ཞུན་བཞི་ནམ་བདུད་རྩི་བཞི་ཁྱོར་རེ། །སྦྲང་ཕུལ་སུམ་ཆ་བུར་སྲང་གསུམ་དང་སྦྱར། །དར་ཙམ་བཙོས་ཏེ་སྣོད་བཟང་བཅངས་ལ་བསྟེན། །ཅོང་ཞི་ལྕགས་རྡོ་ཆ་མཉམ་མངར་གསུམ་སྦྱར། །ཐོད་པར་བླུག་ལ་རང་ཉིད་ཡི་དམ་བསྒོམ། །ཁཾ༌ལས་སྣོད་དེ་རིན་ཆེན་གཞལ་ཡས་ཁང༌། །ནང་དུ་ཨཱཿལས་བཅོམ་ལྡན་ཚེ་དཔག་མེད། །

        ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་ཤུདྔྷ་ཨཱ་ཡུརྔྷ་ར་ཎི་པུཥྜིཾ་ཀུ་རུ་ཡེ་སྭཱཧཱ། །

        སྤྲོ་བསྡུས་ཕྱོགས་བཅུའི་ཚེ་བཀུག་བུམ་པར་བསྟིམ། །བསྙེན་པ་ཁྲི་བསྐྱལ་འཆི་མེད་བདུད་རྩིའི་ཚེར།།རིལ་བུ་བདུན་ལྔ་གསུམ་ལ་སྔགས་བཏབ་བསྟེན།། ནད་གདོན་སྡིག་སྒྲིབ་དག་སྟེ་ཚེ་འཕེལ་བསམ། །

        ར་མོ་ཤ་ཡི་རྩ་བ་སོས་སྟོན་བརྐོས། ། གཏུབས་ལ་ས་བཤལ་ཁུ་བ་ཐིམ་པར་བཙོ། ། གྲིབ་སྐམས་དྲུས་ཕྱེ་སུམ་ཆ་བསྲེས་པ་ཡི། །དང་པོ་ཚ་བ་ཟན་ཆང་ཟན་དྲོན་བྱ། ། འདྲིས་གོམས་ཕྱེ་ཕྲི་རམ་ཤག་ཆིག་ཚུགས་བཟའ།།ཆུ་སེར་སེལ་ཞིང་མཆོག་ཏུ་ཚེ་དབང་འཐོབ། །

        མེ་ཏོག་སྣ་ཚོགས་བསིལ་དྲོད་ཆ་མཉམ་ལ། ། མངར་གསུམ་སྦྱར་ཏེ་དྲོ་གོང་རྒྱུན་བསྟེན་ན། །ཁྱད་པར་མདངས་ལྡན་འདུ་སྙོམས་རྒས་པ་སེལ། །

        མུ་ཟི་གསེར་འདྲ་ས་མེད་བཏུལ་བྱས་ལ། ། ཨ་རུ་ར་དང་ཆ་མཉམ་མངར་གསུམ་སྦྱར། ། སྲན་མ་སེ་བ་ནམ་ཞོར་བསྐྱེད་ལ་བཟའ། །ཁྲག་ཏུ་འཁྲུ་ན་མན་ངག་སྨན་གཅིག་(སྟེ་དང་པོ་དྲི་མ་ཁྲག་ཅན་གཅིག་འོང་དེ་གྲིབ་སྐམས་བྱས་པ་དང་བསྲེས་ལ་བཏང་བ་)གཅེས། ། དྲོད་སྐྱེད་ཆུ་སེར་ནད་དང་མཛེ་ནད་སེལ། །

        ཅོང་ཞི་ས་དུག་བཏོན་ཏེ་འཕྲོད་སྨན་སྦྱར། །མངར་བའི་རྟ་བསྐྱོན་ཐུར་མགོ་རེ་རེ་བསྟེན།། ཡང་ན་དྲུས་ཕྱེ་པི་པི་ལིང་སྦྱར་ལ། །ཚ་བ་ཟན་ཆང་ཟན་དྲོན་བསྟེན་པར་བྱ། །གཅོང་ནད་ཀུན་ཞི་སྟོབས་ཆེ་ཚེ་འཕེལ་མཆོག།མར་ནག་ཤིང་ཏོག་ཤ་མོ་བསྲུང་བ་གཅེས། །

        དྲི་ཆེན་བཟང་དྲུག་ཨ་རུ་མངར་གསུམ་སྦྱར། ། རིལ་བུར་བསྟེན་བྱས་ཡང་ན་དུག་བཏོན་ལ། ། གྲིབ་སྐམས་དྲུས་ཕྱེ་སྤེལ་ལ་ཟན་ཆང་བསྟེན། །གདོན་སེལ་ཚེ་རིང་མཁའ་འགྲོས་བྱིན་གྱིས་རློབ།།

        སོ་མ་ར་ཛ་ཏིལ་ནག་མཛེ་རྒྱས་འཇོམས། །བྱི་ཏང་ག་དང་གོ་བྱེ་བཅའ་སྒ་གསུམ། ། སྦྲང་མར་སྦྱར་ཟོས་རྒས་པའི་ནད་ལས་གྲོལ། །

        དེ་དག་ཟླ་གསུམ་ཟླ་དྲུག་ལོ་གཅིག་བསྟེན། ། བཅུད་ཀྱིས་ལེན་གྱི་འབྲས་བུ་འགྲུབ་པར་འགྱུར། །

        4.2གཡོག་འཁོར་མི་ལྡན་ཞར་ལ་སྤྱད་པས་ཀྱང༌། ། གོང་གི་འབྲས་བུ་ཅི་རིགས་ཐོབ་པར་འགྱུར། །འདི་བར་ནད་གཞན་སྐྱེས་ན་བར་གཅོད་དེ། ། ནད་གསོ་དེ་རྗེས་སྔར་གྱི་བཅུད་ལེན་བསྒྲུབ།།ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒས་པ་གསོ་བ་བཅུད་ལེན་གྱི་ལེའུ་སྟེ་དགུ་བཅུ་པའོ།