རང་རྒྱལ་གྱིས2020ལོའི་བར་དུ་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་དངོས་སུ་འཛུགས་རྒྱུ་གསལ་འབེབས་བྱས་པ།

རྩོམ་པ་པོ།    མི་གསལ།  ཡིག་བསྒྱུར།       དུས་ཚོད།   2018-01-24   རྩོམ་ཁུངས།    ཀྲུང་གོའི་བོད་ཀྱི་དྲ་བ།

        ཟླ1པོའི་ཚེས17ཉིན།རྒྱལ་ཁབ་འཕེལ་རྒྱས་བཅོས་སྒྱུར་ཨུ་ཡོན་ལྷན་ཁང་གི་དྲ་ཚུགས་ལས་ཚེས17ཉིན《གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་སྤྱིའི་འཆར་འགོད》སྤྱི་བསྒྲགས་བྱས་ཏེ2020ལོའི་བར་དུ་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་དངོས་སུ་འཛུགས་རྒྱུ་གསལ་འབེབས་བྱས།

        གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་སྒྲིག་གཞིའི་ཚོད་ལྟའི་ས་ཚུགས་ནི་རྒྱལ་ཡོངས་ཀྱི་ཆེས་ཐོག་མའི་རྒྱལ་ཁབ་སྤྱི་གླིང་སྒྲིག་གཞིའི་ཚོད་ལྟའི་ས་ཚུགས་ཡིན།      འཆར་འགོད་ལས་གསལ་བོར་བསྟན་པ་ལྟར་ན།2020ལོའི་བར་དུ་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་དངོས་སུ་བཙུགས་ཏེ་རྒྱལ་ཁབ་ཀྱི་སྤྱི་གླིང་སྒྲིག་གཞི་ཁྱོན་ཡོངས་ནས་འཛུགས་རྒྱུ་རེད།ལྗང་མདོག་འཕེལ་རྒྱས་བྱེད་ཐབས་གཙོར་བཟུང་སྟེ་མཚོ་བོད་མཐོ་སྒང་སྐྱེ་ཁམས་སྲུང་སྐྱོབ་སླར་གསོ་དཔེ་སྟོན་ཁུལ་དང་མཉམ་སྐྲུན་མཉམ་རོལ།མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་སྔོན་ཐོན་ཁུལ།མཚོ་བོད་མཐོ་སྒང་རང་བྱུང་ཆེན་མོ་སྲུང་སྐྱོབ་འགྲེམས་སྟོན་དང་སྐྱེ་ཁམས་རིག་གནས་རྒྱུན་འཛིན་ཁུལ་བཅས་གཞི་རྩའི་ཆ་ནས་འཛུགས་སྐྲུན་ལེགས་འགྲུབ་བྱ་རྒྱུ་རེད།    

        འཆར་འགོད་ལས་བསྟན་དོན།དུས་དཀྱིལ་དམིགས་འབེན་ནི2025ཡིན་ལ་སྲུང་སྐྱོབ་དང་དོ་དམ་སྒྲིག་གཞིའི་མ་ལག་མུ་མཐུད་དུ་འཐུས་ཚང་དང་ལྗང་མདོག་འཕེལ་རྒྱས་ཀྱི་བྱེད་སྟངས་ཁྱོན་ཡོངས་ནས་ཆགས་སུ་བཅུག་ནས།   རི་ཆུ་ནགས་གསུམ་དང་ཞིང་ས། མཚེའུ།  རྩྭ་སའི་སྐྱེ་ཁམས་མ་ལག་ཅུང་ལེགས་སྒོ་ནས་འཁོར་རྒྱུགས་བྱེད་དུ་བཅུག་ཏེ་ཐུན་མིན་ཁྱད་ལྡན་གྱི་རྒྱལ་ཁབ་སྤྱི་གླིང་ཞབས་ཞུ་དང་དོ་དམ།ཚན་ཞིབ་མ་ལག་གྲུབ་ཏུ་བཅུག་ནས་སྐྱེ་ཁམས་རིག་གནས་དར་རྒྱས་གོང་སྤེལ་དུ་གཏོང་དགོས་ཟེར།དུས་ཡུན་རིང་བའི་དམིགས་འབེན་ནི2035ཡིན།སྐབས་གསར་བའི་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་དེ་སྐྱེ་ཁམས་སྲུང་སྐྱོབ་ཀྱི་མི་དཔེ་དང་སྒྲིག་གཞིའི་མ་ལག་གསར་སྐྲུན་གྱི་མིག་དཔེ།རང་རྒྱལ་གྱི་རྒྱལ་ཁབ་སྤྱི་གླིང་གི་མིག་དཔེ་རུ་འགྱུར་དུ་བཅུག་ནས་དེང་རབས་ཅན་རྒྱལ་ཁབ་སྤྱི་གླིང་འཛུགས་སྐྲུན་ལེགས་འགྲུབ་བྱེད་དགོས་ཟེར།  

གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་བཙུགས་ན་སྒྲིག་གཞིའི་མ་ལག་གསར་སྐྲུན་བྱེད་པར་ཕན་ལ།སྐྱེ་ཁམས་སྲུང་སྐྱོབ་ཆེས་གཟབ་ནན་གྱིས་ལག་བསྟར་དང་རྒྱལ་ཁབ་ཀྱི་སྐྱེ་ཁམས་བདེ་འཇགས་འགོག་ཡོལ་སྲ་བརྟན་དུ་གཏོང་བར་ཕན་པ།ས་གནས་དེ་གའི་འབྲོག་པ་མང་ཚོགས་ཀྱི་ཁྱོན་ཡོངས་འཕེལ་རྒྱས་དང་ཐོན་ཁོངས་ཁོར་ཡུག་ཐེག་ནུས་པའི་འབྲེལ་བ་ཐག་གཅོད་ལེགས་པོ་བྱེད་པ་དང་མི་དང་རང་བྱུང་ཁམས་འཆམ་མཐུན་མཉམ་གནས་འཕེལ་རྒྱས་ཀྱི་རྣམ་པ་གསར་བ་གྲུབ་པར་ཕན་པ་རེད་ཟེར།  

        གཙང་གསུམ་འབྱུང་ཡུལ་ས་ཁུལ་ནི་མཚོ་བོད་མཐོ་སྒང་གི་དཀྱིལ་དབུས་སུ་ཡོད་ལ་རྨ་འབྲི་རྫ་གསུམ་གྱི་མགོ་ཁུངས་ཡིན་པས་རང་རྒྱལ་གྱི་སྐྱེ་ཁམས་བདེ་འཇགས་འགོག་ཡོལ་གལ་ཆེན་ཞིག་ཡིན།གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་སྒྲིག་གཞིའི་ཚོད་ལྟའི་ས་ཁུལ་གྱི་སྤྱིའི་རྒྱ་ཁྱོན་ལ་སྤྱི་ལེ་བརྒྱ་དཔང་གྲུ་བཞི་མ་ཁྲི12.31ཡོད།   འབྲི་སྟོད་དང་ཆུ་དམར་ལེབ།  རྨ་སྟོད།རྫ་སྟོད་རྫོང་བཅས་རྫོང་བཞི་དང་ཨ་ཆེན་གངས་རྒྱབ་རང་བྱུང་སྲུང་སྐྱོབ་ཁུལ་གྱི་དོ་དམ་མངའ་ཁོངས་སུ་ཡོད་ལ།བསྡོམས་པས་ཞང་དང་གྲོང་རྡལ12དང་སྲིད་འཛིན་སྡེ་བ53ཡོད།    །