གོམ་སྟབས་མགྱོགས་ཤིང་བརྟན་པོར་འགྲོ་བའི་དགེ་མཚན།

 གོམ་སྟབས་ཅུང་མགྱོགས་ཤིང་བརྟན་པོར་འགྲོ་དུས་ངེས་པར་དུ་ཤེས་དགོས་པའི་གནད་དོན་འགའ།

    གོམ་སྟབས་ཅུང་མགྱོགས་ཤིང་བརྟན་པོར་སོང་ན་བཟང་ཆ་མང་བ་ཚང་མས་ཤེས་ཡོད་མོད།ཡིན་ནའང་གོམ་སྟབས་ཅུང་མགྱོགས་ཤིང་བརྟན་པོར་འགྲོ་བའི་ཤུགས་ཚད་དང་མང་ཉུང་སོགས་གནད་དོན་ལ་རྒྱུས་ལོན་གསལ་བོ་བྱུང་མེད།ཀྲུང་ཧྭ་ནད་འགོག་གསོ་རིག་ལྷན་ཚོགས་ཀྱི་ཚོགས་གཙོ་གཞོན་པ།བདེ་ཐང་སྒྲོག་སྤེལ་ཡན་ལག་ཚོགས་པའི་ཀྲུའུ་རིན་ཨུ་ཡོན་ཁོང་ལེན་ཀྲི་ཡིས་གོམ་སྟབས་ཅུང་མགྱོགས་ཤིང་བརྟན་པོར་འགྲོ་བར་གཤམ་གྱི་གཞི་རྩའི་གནད་དོན་འགའ་ཤེས་དགོས་པ་བསྟན་ཡོད་དེ།

    གོམ་སྟབས་ཅུང་མགྱོགས་ཤིང་བརྟན་པོར་འགྲོ་བ་དེ་འཆམ་འཆམ་དུ་འགྲོ་བ་དང་གཏན་ནས་མི་མཚུངས་པར།དེ་ནི་འཆམ་འཆམ་དུ་འགྲོ་བ་དང་འགྲོ་རྩལ་འགྲན་སྡུར་བར་གྱི་འགུལ་སྐྱོད་བྱེད་ཐབས་ཅུང་དྲག་པོ་ཞིག་ཡིན།འགྲོ་དུས་དབུགས་ཅུང་ཟད་ཧད་པ་དང་སྙིང་གི་ལྡིང་ཚད་ཇེ་མགྱོགས་སུ་སོང་ནའང་ད་དུང་འགྲོ་རོགས་དང་ཁ་བརྡ་བྱས་ནས་བསམ་བློ་བརྗེ་རེས་བྱེད་ཐུབ་པའི་སྐབས་སུ།ནུས་ཚད་ཟད་གྲོན་དུ་འགྲོ་ཚད་མངོན་གསལ་སྒོས་ཇེ་མཐོར་གྱུར་ཡོད།དེ་བས་རང་ཉིད་ཀྱི་བདེ་ཐང་གི་ཆེད་དུ་ཐེངས་རེར་གོམ་སྟབས་ཅུང་མགྱོགས་ཤིང་བརྟན་པོས་དུས་ཚོད་སྐར་ཆ་སུམ་ཅུ་ནས་དུས་ཚོད་གཅིག་གི་རིང་ལ་སོང་ན་བཟང་བ་དང་།ཆེས་ཉུང་ནའང་ཐེངས་རེར་སྐར་མ་བཅུ་དང་ཉིན་རེར་སྐར་མ་སུམ་ཅུའི་ཡན་ལ་འགྲོ་དགོས།

    དུས་ཡུན་རིང་པོར་འགུལ་སྐྱོད་བྱེད་ཚད་ཚད་ལས་བརྒལ་ན་ཉེན་ཁ་ཆེ་བས།རྒྱུན་པར་རྐང་ཐང་དུ་འགྲོ་བ་དེས་ལུས་སྦྱོང་གི་ཚབ་བྱེད་པའི་མི་དར་མ་རྣམས་ཉིན་རེར་གོམ་པ་སྟོང་བརྒྱད་ནས་གོམ་པ་ཁྲི་གཅིག་དང་སྟོང་གསུམ་ལ་འགྲོ་བ་དང་།དེའི་ཁྲོད་གོམ་སྟངས་ཅུང་མགྱོགས་ཤིང་བརྟན་པོའི་སྒོ་ནས་གོམ་པ་སྟོང་ལྔ་ནས་སྟོང་བརྒྱད་ཙམ་ལ་སོང་ན་ཆོགདུས་རྒྱུན་གྱི་འཚོ་བའི་ཁྲོད་ང་ཚོ་གོམ་པ་སྟོང་གསུམ་ནས་སྟོང་ལྔ་ཙམ་སོང་ན་འོས་ཤིང་འཚམས་པ་ཡིན།གོམ་སྟབས་མགྱོགས་ཤིང་བརྟན་པོའི་སྒོ་ནས་འགྲོ་བ་ཚད་ལས་བརྒལ་ན་རྐང་བའི་རུས་ཚིགས་ལ་དལ་བའི་རང་བཞིན་གྱི་གནོད་པ་ཐེབས་སྲིད་པས།འགུལ་སྐྱོད་བྱེད་ཚད་ཐལ་དྲགས་མི་རུང་བ་དང་སྦྱོང་བརྡར་བྱེད་ཐབས་སྣ་གཅིག་བཀོལ་ན་མི་འཚམས།

གོམ་སྟབས་ཅུང་མགྱོགས་ཤིང་བརྟན་པོར་མ་སོང་བའི་སྔོན་གྱི་སྐར་མ་ལྔ་ནས་བཅུའི་ནང་དུ་རུས་ཚིགས་འགུལ་སྐྱོད་བྱེད་པ་དང་།ཤ་གྲིམ་འཐེན་སྐུམ་བྱེད་པ་བཅས་བྱས་ནས་ལུས་པོ་ཅུང་ངར་དུ་འཇུག་དགོས་ལ།གོམ་མཚམས་བཞག་རྗེས་ཡང་བསྐྱར་དུས་ཚོད་སྐར་མ་ལྔ་ནས་བཅུའི་ནང་དུ་ལུས་ཕུང་གི་ཤ་གྲིམ་རྣམས་སྙོམ་སྒྲིག་བྱེད་པའི་ལྷོད་གཡེང་གི་སྦྱོང་བརྡར་བྱེད་དགོས།

    སྦྱོང་བརྡར་དེ་བྱེད་སྐབས་ལྭ་བར་ཡང་མཉམ་འཇོག་བྱེད་དགོས་ཏེ།སྦྱོང་བརྡར་ལ་འཚམ་པའི་ལྭ་བ་དང་ལྷམ་བདེ་མོ་གྱོན་དགོས།ཚྭ་གདུག་ཆེ་བའི་ཁོར་ཡུག་ཏུ་དུས་ཡུན་རིང་བོར་གོམ་སྟབས་ཅུང་མགྱོགས་ཤིང་བརྟན་པོའི་སྒོ་ནས་འགྲོ་མི་རུང་།ནམ་ཟླ་མི་ལེགས་པའི་དུས་སུ་རབ་ཡིན་ན་སྒོ་ཕྱིར་མི་འགྲོ་བར་ཁང་བའི་ནང་དུ་སྦྱོང་བརྡར་བྱས་ན་ལེགས།

    བཟའ་བཏུང་གི་ཕྱོགས་ནས་ཀྱང་རྒྱགས་དྲགས་པ་ཞིག་བསྟེན་མི་རུང་། འགུལ་སྐྱོད་བྱས་རྗེས་བཟའ་བཏུང་ལ་ཚོད་འཛིན་བྱེད་དགོས་པ་དང་ལྷག་པར་དུ་སྣུམ་ཞགས་ཆེ་བའི་བཟའ་བཏུང་མང་པོ་བསྟེན་མི་རུང་།གོམ་སྟབས་ཅུང་མགྱོགས་ཤིང་བརྟན་པོས་འགྲོ་དུས་ཧ་ལམ་དུས་ཚོད་སྐར་མ་བཅོ་ལྔ་ནས་ཉི་ཤུའི་མཚམས་སུ་ཆུ་ཅུང་ཟད་རེ་འཐུང་དགོས་པ་དང་།གལ་ཏེ་དུས་ཚོད་གཅིག་ཙམ་ལ་འགྲོ་བ་དང་རྔུལ་ཆུ་བཞུར་ཚད་མང་ན་སྦྱོང་བརྡར་བྱེད་སྐབས་དང་སྦྱོང་བརྡར་བྱས་རྗེས་ཆུ་དེ་ལས་ཀྱང་མང་པོ་འཐུང་དགོས།

    ཁྲག་ཤེད་མཐོ་བ་དང་གཅིན་སྙིའི་ནད་པས་སྦྱོང་བརྡར་དེ་བྱེད་སྐབས་མཉམ་འཇོག་བྱེད་དགོས།

དལ་བའི་རང་བཞིན་གྱི་ནད་རིགས་བྱུང་ཡོད་པའི་ནད་པས་ལུས་སྦྱོང་བྱེད་རྒྱུ་ནི་ཤིན་ཏུ་གལ་ཆེ་མོད།ཡིན་ནའང་ལུས་སྦྱོང་བྱེད་སྐབས་མཉམ་འཇོག་གང་ལེགས་བྱེད་དགོས།ཁོང་ལེན་ཀྲི་ཡིས་བཤད་རྒྱུར།ཁྲག་ཤེད་མཐོ་བ་དང་།གཅིན་སྙིའི་ནད་བྱུང་ཡོད་པའི་ནད་པས་སྦྱོང་བརྡར་དེ་བྱེད་སྐབས་མི་རང་ཉིད་ཀྱི་ལུས་ཕུང་གི་གནས་ཚུལ་དང་བསྟུན་དགོས་པ་དང་།སྨན་པའི་ངག་བཀོད་ལ་ཉན་ནས་ལུས་སྦྱོང་བྱེད་པར་གྲ་སྒྲིག་དང་འགོག་སྲུང་གང་ལེགས་བྱེད་དགོས་པར་མ་ཟད།འགྲོ་རོགས་དང་མཉམ་དུ་འགྲོ་བ་ལས་མི་མེད་སར་རང་གཅིག་པུས་ལུས་སྦྱོང་བྱེད་མི་རུང་།གཤམ་དུ་དེའི་སྐོར་གྱི་མཉམ་འཇོག་བྱེད་དགོས་པའི་གནད་དོན་འགའ་ངོ་སྤྲོད་ཅིག་བྱེད།

གཅིན་སྙི་ནད་པས་རང་གི་རྐང་བར་སྲུང་སྐྱོབ་བྱེད་དགོས།ཟས་ཐུན་རེ་རེའི་རྗེས་ཀྱི་དུས་ཚོད་ཕྱེད་ཀའི་ནང་སྐར་མ་ཉི་ཤུ་ནས་བཞི་བཅུ་ཙམ་ལ་འོས་འཚམས་ཀྱིས་འགུལ་སྐྱོད་བྱས་ན་ཁྲག་མངར་ལ་ཚོད་འཛིན་བྱེད་ཐུབ།སྤྱིར་གཅིན་སྙིའི་ནད་པའི་ཕྱིའི་དབང་རྩར་ནད་འགྱུར་བྱུང་ཡོད་ལ་ན་ཟུག་ཆེན་པོ་མེད།དེ་བས་གཅིན་སྙི་ནད་པ་རྐང་རྗེན་དུ་མ་སོང་ན་བཟང་།གོམ་སྟབས་ཅུང་མགྱོགས་ཤིང་བརྟན་པོར་མ་སོང་བའི་སྔོན་དང་འགྲོ་སྐབས་དང་སོང་རྗེས་བཅས་སུ།མངར་ཆ་འདུས་པའི་སྐོམ་ཆུའི་རིགས་འཐུང་ན་ཁྲག་གི་མངར་ཆ་ཇེ་མཐོར་འགྲོ་སྲིད་པས་སྐོམ་ཆུ་དེའི་རིགས་འཐུང་མི་རུང་།གོམ་སྟབས་ཅུང་མགྱོགས་ཤིང་བརྟན་པོར་སོང་རྗེས།རྐང་བར་རྨས་སྐྱོན་ཕོག་ཡོད་མེད་ལ་ཞིབ་ཏུ་བལྟ་དགོས།ལྷག་པར་དུ་རྐང་མཛུབ་ཀྱི་བར་དང་རྐང་མཐིལ་དང་ཕྱི་རྟིང་བཅས་སུ་རྨས་སྐྱོན་བྱུང་ཡོད་མེད་ལ་བལྟ་དགོས། གལ་ཏེ་རྨས་སྐྱོན་ཅུང་བྱུང་ཡོད་ཚེ་དུས་ཐོག་ཏུ་སྨན་ཁང་ལ་འགྲོ་དགོས།གཅིན་སྙིའི་ནད་བྱུང་ཡོད་པའི་ནད་པས་འགུལ་སྐྱོད་བྱེད་ཚད་ལ་ཚོད་འཛིན་དགོས།གལ་ཏེ་གོམ་སྟབས་ཅུང་མགྱོགས་ཤིང་བརྟན་པོར་འགྲོ་ཚད་མང་ན་རུས་ཚིགས་སྐྲངས་པ་སོགས་ཀྱི་ནད་རྟགས་འབྱུང་སླ།དེ་ལྟར་བྱས་ན་ཁྲག་གི་མངར་ཆར་ཚོད་འཛིན་པར་དཀའ་ལས་ཆེན་པོ་འབྱུང་སྲིད།

   རུས་ཚིགས་ཀྱི་ནད་བྱུང་ཡོད་པའི་ནད་པས་ཀྱང་འགུལ་སྐྱོད་བྱེད་ཚད་ལ་ཚོད་འཛིན་དགོས།སྨན་པའི་ངག་བཀོད་ལ་ཉན་པ་དང་མི་རང་ཉིད་ཀྱི་གནས་ཚུལ་དངོས་ལ་གཞིགས་ནས་ཚད་མཐུན་གྱི་འགུལ་སྐྱོད་འཆར་གཞི་འགོད་དགོས།རུས་ཚིགས་ཀྱི་ནད་བྱུང་ཡོད་པའི་ནད་པས་གོམ་སྟབས་ཅུང་མགྱོགས་ཤིང་བརྟན་པོར་འགྲོ་དུས།པུས་མོ་དང་སྲེ་ལོང་ལ་སྲུང་སྐྱོབ་བྱེད་དགོས།འགུལ་སྐྱོད་བྱེད་ཚད་དང་དུས་ཚོད་ལ་དོ་སྣང་བྱས་ནས།གནས་ཚུལ་ལྟར་ལག་རྟེན་སོགས་གཞོགས་འདེགས་ཀྱི་ལག་ཆར་བརྟེན་ནས་གོམ་སྟབས་ཅུང་མགྱོགས་ཤིང་བརྟན་པོར་འགྲོ་དགོས།གལ་ཏེ་ལུས་ཤུགས་ཟད་པ་དང་ངལ་དུབ་ཆེ་དྲགས་པ།རྐང་བ་སྐྲངས་ནས་འགྲོ་འདུག་ལ་སྟབས་མི་བདེ་བའི་སྐབས་སུ་ལུས་སྦྱོང་བྱེད་མཚམས་འཇོག་དགོས།

    ལུས་ཚོ་བའི་མིས་རུས་ཚིགས་ལ་སྲུང་སྐྱོབ་བྱས་ནས་འགུལ་སྐྱོད་བྱེད་ཚད་དེ་འདྲ་ཐལ་དྲགས་མི་རུང་།གོམ་སྟབས་ཅུང་མགྱོགས་ཤིང་བརྟན་པོར་འགྲོ་དུས་ལག་གཉིས་གཡུགས་ནས་རྩིབས་རུས་གཅུས་འཁོར་བྱས་ནས་སོང་ན་སྐེད་པ་དང་གསུས་པར་སྦྱོང་བརྡར་ཐོབ་ཐུབ།ལུས་ཚོ་དྲགས་པའི་མིས་གོམས་སྟབས་ཅུང་མགྱོགས་ཤིང་བརྟན་པོར་འགྲོ་དུས་ལག་རྟེན་ལ་ཁེན་ནས་འོས་འཚམ་སྒོས་སོང་ན་པུས་ཚིགས་ལ་སྲུང་སྐྱོབ་བྱེད་ཐུབ།

    ཁྲག་ཤེད་མཐོ་བའི་མིས་རང་ཉིད་ཀྱི་ལུས་ཕུང་གི་གནས་ཚུལ་ལྟར་འགྲོ་དགོས།ཁྲག་ཤེད་མཐོ་བའི་མིས་གོམ་སྟབས་ཅུང་མགྱོགས་ཤིང་བརྟན་པོར་འགྲོ་ཚད་དེ་རིམ་གྱིས་ཇེ་མང་དུ་བཏང་ནས་ཁྲག་ཤེད་མར་འབབ་ཏུ་འཇུག་དགོས།གོམ་སྟབས་ཅུང་མགྱོགས་ཤིང་བརྟན་པོར་མ་སོང་བའི་སྔོན་དུ་ལུས་ཕུང་བརྐྱངས་བསྐུམ་སོགས་བྱས་ནས་ལུས་པོ་ཅུང་ངར་དུ་འཇུག་དགོས།གོམ་སྟབས་ཅུང་མགྱོགས་ཤིང་བརྟན་པོར་འགྲོ་དུས་སྙིང་མི་བདེ་བ་དང་དབུགས་འཚངས་བ་སོགས་ཀྱི་གནས་ཚུལ་ལ་མཉམ་འཇོག་བྱེད་དགོས།གལ་ཏེ་གོང་གི་སྣང་ཚུལ་དེ་དག་བྱུང་ཚེ་མྱུར་དུ་འགྲོ་མཚམས་འཇོག་དགོས་པར་མ་ཟད།དེ་དང་མཐུན་པའི་བྱེད་ཐབས་སྤྱོད་དགོས།གོམ་སྟབས་ཅུང་མགྱོགས་ཤིང་བརྟན་པོར་འགྲོ་དུས་མགོ་བོ་མི་སྒུར་བ་དང་དབུགས་ཁོག་ཏུ་མི་འཇུག་པ།ལུས་ཤུགས་ཆེན་པོ་མི་བཀོལ་བ་བཅས་བྱེད་དགོས་ཤིང་འགྲོ་མཚམས་རིམ་གྱིས་འཇོག་པ་ལས་གློ་བུར་དུ་འཇོག་མི་རུང་།འགྲོ་མཚམས་བཞག་རྗེས། མགོ་ཡུ་འཁོར་བ་དང་སྙིང་མི་བདེ་བ། དབུགས་འཚང་བ།ཡི་ག་ཇེ་ཞན་དུ་འགྲོ་བ་དང་ཐང་ཆད་དྲགས་པ་སོགས་བྱུང་ན།འགུལ་སྐྱོད་བྱེད་ཚད་ཐལ་དྲགས་པ་ཡིན་པས། རྗེས་མར་འགྲོ་ཚད་ལེགས་སྒྲིག་བྱེད་དགོས།