མཚོ་སྔོན་བོད་ཀྱི་ཡིག་རྙིང་ཞིབ་འཇུག་ཚོགས་པ་དབུ་བརྙེས་པའི་ཚོགས་འདུ་སྐུ་འབུམ་བྱམས་པ་གླིང་དུ་བསྡུས་པ།

རྩོམ་པ་པོ།   བདེ་ཆེན་འཚོ།  ཡིག་བསྒྱུར།       དུས་ཚོད།   2013-03-28   རྩོམ་ཁུངས།    མཚོ་སྔོན་པོ་དྲ་བ།

        ཟླ3པའི་ཚེས2ཉིན། མཚོ་སྔོན་ཞིང་ཆེན་བོད་ཀྱི་ཡིག་རྙིང་ཞིབ་འཇུག་ཚོགས་པ་དབུ་བརྙེས་པའི་ཚོགས་འདུའམ་བོད་ཀྱི་ཡིག་རྙིང་ཞིབ་འཇུག་གླེང་སྟེགས་སྐབས་དང་པོ་དེ་སྐུ་འབུམ་བྱམས་པ་གླིང་གི་འགྲམ་གྱི་ཀྲུང་གོའི་མིའི་རིགས་རིག་པ་དང་མི་རིགས་རིག་པའི་ཞིབ་འཇུག་ཚོགས་པ་མཚོ་སྔོན་བོད་རིག་པའི་ཞིབ་འཇུག་རྟེན་གཞི(མཚོ་སྔོན་བོད་ཀྱི་རིག་གནས་ཁང)རུ་བསྡུས་པ་རེད། ཞིང་ཆེན་དང་ཁུལ། རྫོང་བཅས་ཀྱི་དཔེ་རྙིང་གི་ལས་ཀ་གཉེར་བའི་ཁོངས་གཏོགས་དང་། སློབ་ཆེན་དང་སྤྱི་ཚོགས་ཚན་རིག་ཞིབ་འཇུག་ལས་ཁུངས་ཀྱི་དཔེ་རྙིང་ཞིབ་འཇུག་སྡེ་ཁག  དཔེ་རྙིང་བསྡུ་ཉར་བྱེད་པའི་དགོན་སྡེ་གཙོ་བོ། དེ་མིན་སྤྱི་ཚོགས་ལས་རིགས་ཁག་གི་མི་སྣ་སོགས་ཚོགས་འདུར་ཞུགས་པ་རེད། 
      ཚོགས་འདུའི་སྟེང《མཚོ་སྔོན་ཞིང་ཆེན་བོད་ཀྱི་ཡིག་རྙིང་ཞིབ་འཇུག་ཚོགས་པའི་སྒྲིག་ཡིག》ལ་ཆོག་མཆན་ཐོབ་པ་དང་། མཚོ་སྔོན་ཞིང་ཆེན་བོད་ཀྱི་ཡིག་རྙིང་ཞིབ་འཇུག་ཚོགས་པའི་སྐབས་དང་པོའི་ལས་འཛིན་ལྷན་ཚོགས་བདམས་ཐོན་བྱུང་། ཚོགས་ཐོག་ཏུ་རྒྱལ་ཡོངས་གྲངས་ཉུང་མི་རིགས་ཀྱི་ཡིག་རྙིང་ལེགས་སྒྲིག་ཞིབ་འཇུག་ཁང་དང་མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་འགོ་ཁྲིད་ཀྱིས་ཤིས་ཚིག་ཕུལ་ཞིང་རེ་བ་བཏོན་པ་རེད།

རྒྱལ་ཡོངས་གྲངས་ཉུང་མི་རིགས་ཀྱི་ཡིག་རྙིང་ལེགས་སྒྲིག་ཞིབ་འཇུག་ཁང་གི་ཀྲུའུ་རིན་ལི་ཏུང་ཧྲིན་ལགས་ཀྱིས་བཤད་རྒྱུར། མཚོ་སྔོན་ཞིང་ཆེན་བོད་ཀྱི་ཡིག་རྙིང་ཞིབ་འཇུག་ཚོགས་པ་དབུ་བརྙེས་པའི་ཚོགས་འདུ་རྒྱལ་ཁའི་ངང་བསྡུས་པ་འདི་གྲངས་ཉུང་མི་རིགས་ཀྱི་ཕུལ་དུ་བྱུང་བའི་སྲོལ་རྒྱུན་རིག་གནས་དར་སྤེལ་དང་། མི་རིགས་རིག་གནས་ཀྱི་གོང་སྤེལ་ལ་སྐུལ་འདེད་བྱེད་པར་ཁ་ཚ་དགོས་གཏུག་ཏུ་གྱུར་འདུག་ཅིང་། མཚོ་སྔོན་ཞིང་ཆེན་གྱི་མི་རིགས་ཡིག་རྙིང་བྱ་གཞག་ཁྲོད་ཀྱི་དགའ་འོས་པའི་དོན་བཟང་ཞིག་ཀྱང་རེད་ཅེས་བརྗོད་པ་རེད། 
      འདས་ཟིན་པའི་བགྲང་བྱ20ཡི་རིང་ལ་མཚོ་སྔོན་ཞིང་ཆེན་གྱིས་ཀྲུང་དབྱང་དང་རིམ་པ་སོ་སོའི་སྲིད་གཞུང་གི་རྒྱབ་སྐྱོར་འོག་བོད་ཀྱི་ཡིག་རྙིང་མྱུར་སྐྱོབ་དང་སྲུང་སྐྱོབ། འཚོལ་བསྡུ། ལེགས་སྒྲིག  དཔེ་སྐྲུན་བྱེད་པར་བརྩོན་པ་ཆེན་པོ་བསྐྱེད་ཅིང་། ཡིག་རྙིང་གི་བྱ་གཞག་གོང་སྤེལ་དང་སྲུང་སྐྱོབ་བྱེད་པར་གྲུབ་འབྲས་ཀྱང་མི་དམན་པ་བླངས་པ་རེད། མཚོ་སྔོན་ཞིང་ཆེན་བོད་ཀྱི་ཡིག་རྙིང་ཞིབ་འཇུག་ཚོགས་པ་བཙུགས་པ་འདིས་མཚོ་སྔོན་གྱི་ཡིག་རྙིང་བྱ་གཞག་གི་གོང་སྤེལ་ལ་ནུས་པ་གལ་ཆེན་ཐོན་པ་དང་། བོད་རིག་པའི་ཞིབ་འཇུག་ལ་ལོ་རྒྱུས་ཡིག་ཆ་ཕུན་སུམ་ཚོགས་པ་འདོན་སྤྲོད་བྱེད་ཐུབ་པའི་ཁར། མི་རིགས་རིག་གནས་དར་སྤེལ་ལ་དགེ་མཚན་བླ་ན་ལྷག་པ་འདོན་སྤེལ་བྱེད་ཐུབ་པ་རེད།

ཕྱི་དྲོར་བསྡུས་པའི་བོད་ཀྱི་ཡིག་རྙིང་གླེང་སྟེགས་སྟེང་མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་བདེ་མཆོག་ལགས་དང་། བོད་ལྗོངས་སྤྱི་ཚོགས་ཚན་རིག་ཞིབ་འཇུག་གླིང་གི་ལོ་རྒྱུས་རིག་པ་སྨྲ་བ་སྐལ་བཟང་ཡེ་ཤེས་ལགས། ནུབ་བྱང་མི་རིགས་སློབ་ཆེན་གྱི་འབུམ་རམས་པའི་མཛུབ་སྟོན་དགེ་རྒན་ཆེན་མོ་བཀྲ་ཤིས་ཚེ་རིང་ལགས་སོགས་ཀྱིས་བོད་ཡིག་དཔེ་རྙིང་ཁྲོད་ཆག་སྐྱོན་བྱུང་བའི་ཤོག་བུར་བསྐྱར་གསོ་བྱེད་པའི་ལག་རྩལ་དང་། རྒྱའི་བསྟན་བཅོས་ཁྲོད་ཀྱི་བོད་ཀྱི་ལོ་རྒྱུས། བོད་ཀྱི་ཡིག་རྙིང་དཔེ་སྐྲུན་བྱེད་པའི་གནས་བབ། དུས་རབས་བར་མའི་ཡིག་རྙིང་བྲིས་མའི་སྔོག་འདོན། བོད་ཀྱི་ཡིག་རྙིང་མྱུར་སྐྱོབ་བྱེད་པའི་བྱེད་ཐབས་སོགས་ཀྱི་གནད་དོན་ལ་རྩད་སྡུར་རྒྱ་ཆེན་པོ་བྱས་ནས་གནད་དུ་འཐིངས་པའི་ལྟ་བ་བརྗོད་པ་རེད།

         ཚོགས་འདུའི་སྐབས་སུ་ཞིབ་འཇུག་ཚོགས་པ་བཙུགས་པ་ལ་རྟེན་འབྲེལ་ཞུ་བར་བོད་ཡིག་ཡིག་གཟུགས་འགྲེམ་སྟོན་བྱས་པ་སྟེ། བོད་ཀྱི་ཡིག་མཁན་རྡོ་སྦིས་གྲགས་པ་རྒྱ་མཚོ་ལགས་དང་མཚོ་སྔོན་ཞིང་ཆེན་ཡིག་མཁན་མཐུན་ཚོགས་ཀྱི་ཁོངས་མི་བདེ་མཆོག་རྒྱལ་ལགས་གཉིས་ཀྱི་བརྩམས་ཆོས་གཙོར་བྱས་པའི་ཡིག་གཟུགས་བརྩམས་ཆོས70ལྷག་འགྲེམ་སྟོན་བྱས་པ་རེད།