གྲོ་སོ་ཕྱེ་མར།

རྩོམ་པ་པོ།     ཡིག་བསྒྱུར།       དུས་ཚོད།   2019-02-06   རྩོམ་ཁུངས།    ཁམས་པའི་དྲ་བ།

        ཕྱེ་མར་འདི་བོད་རིགས་ཀྱི་གོམས་སྲོལ་དུ་ཇི་ལྟར་འབྱུང་བའི་ལོ་རྒྱུས་ཀྱང་བོན་གྱི་ལྷ་གསོལ་དང་།  ཕྱྭ་གཡང་འགུགས་པ་སོགས་ལ་སྤྱོད་པའི་ཆོ་གའི་མཐུན་རྐྱེན་ཞིག་ཡིན་པར་གསུངས་ལ།   དེ་ཡང་བོད་རྒྱལ་སྲོང་བཙན་སྒམ་པོའི་དུས་ཙམ་ནས་སྤྱོད་སྲོལ་ཡོད་པས་དེའི་གོང་སྔ་མོ་ཞིག་ལ་དར་ཡོད་པར་མངོན་ཞིང་།  སྐབས་དེ་ཤེད་དུ་ད་ལྟ་ལྟ་བུའི་རྒྱས་སྤྲོས་ཡོད་པ་མ་ངེས་ཀྱང་ད་ལྟ་ཞིང་འབྲོག་ཁུལ་དུ་སྡེར་མའི་ནང་དཀར་གསུམ་མངར་གསུམ་བཏབ་པའི་ཕྱེ་མར་གྱི་སྟེང་དུ་མར་རྡོག་ལྷེབ་ཙམ་འཛུགས་སྲོལ་ཡོད་པ་ལྟ་བུ་མིན་ནམ་སྙམ་ལ།  ད་ལྟའི་རྒྱས་སྤྲོས་ཀྱི་སྲོལ་ནི་རིམ་བཞིན་དར་བ་ཞིག་ཡིན་ནམ་སྙམ།  ཕྱེ་མར་ནི་བོད་རིགས་ཀྱི་ལོ་གསར་གྱི་མཚོན་པའི་བཀྲ་ཤིས་པའི་རྟེན་འབྲེལ་གྱི་བྱ་བའི་རིགས་ལ་སྤྱོད་པའི་བྱེད་སྒོའི་ཆ་རྐྱེན་མེད་དུ་མི་རུང་བ་ཞིག་ཀྱང་ཡིན།  དཔེར་ན་ཁྲི་འདོན་དང་།  ཁང་གསོལ།  གཉེན་སྒྲིག   བང་གསོལ།   སྐྱེས་སྐར་སོགས་རྟེན་འབྲེལ་གྱི་བྱེད་སྒོ་གང་སར་གྲོ་སོ་ཕྱེ་མར་བེད་སྤྱོད་བྱེད་ཅིང་།  གནའ་སྔ་མོ་མི་ཚོས་ལོ་གསར་དང་།  རྟེན་འབྲེལ་དགའ་སྟོན་ཁག་ལ་གྲོ་ནས་ཀྱི་སྙེ་མའི་འཆུན་པོ་འབུལ་སྲོལ་ཡོད་པ་དེ་ཕྱིས་རིམ་གྱིས་འཕེལ་རྒྱས་སུ་བཏང་སྟེ།  བསྟན་འཛིན་ཁལ་རུ་ཞེས་པའི་འབོ།  (རྒྱ་མ་ཉི་ཤུ་རྩ་བརྒྱད་ཀྱི་འབོ་)གཉིས་སོ་སོར་ཡ་གཅིག་གྲོ་དང་།  ཡ་གཅིག་རྩམ་པས་བཀང་སྟེ་གྲོའི་སྟེང་ཚྭ་རྡོག་དང་།  རྩམ་པའི་སྟེང་མར་ལེབ་ལྔའམ་གསུམ་འཇོག་ཅིང་།  མི་རེ་རེས་བཏེགས་ནས་རྟེན་འབྲེལ་ཞུ་བའི་སྲོལ་ནས་རིམ་བཞིན་འབོ་ཉིས་སྦྲེལ་བཟོས་པར་ཚོན་རིས་བཀྲ་ཤིས་རྟགས་བརྒྱད་དམ།  བཀྲ་ཤིས་རྫས་བརྒྱད།  ནོར་བུ་ཆ་བདུན།   རྟགས་བརྒྱད་བུམ་གཟུགས།  སེང་གེ་གཉིས་ཀྱི་ནོར་གཞོང་སྟེགས་པ།  རི་མོ་བསྡུས་པར་ཡང་།  ནོར་བུ་མེ་འབར་དང་།  ནོར་བུ་དགའ་འཁྱིལ་སོགས་རྟེན་འབྲེལ་གྱི་ཚོན་རིས་ཀྱིས་རྣམ་པར་མཛེས་པར་བྱས་ཤིང་།  འབོའི་ནང་གཡས་ངོས་གྲོ་ཡོས་བྱུར་ཁེངས་དང་།  གཡོན་ངོས་ཕྱེ་མར་བྱུར་ཁེངས་སུ་བླུགས་པའི་སྟེང་།  ཤིང་གི་བྱང་བུར་མར་ཚོན་གྱི་མཐུན་པ་སྤུན་བཞི་འམ།  མི་མཐུན་གཡུལ་རྒྱལ།  ཚེ་རིང་དྲུག་སྐོར།  རྟགས་བརྒྱད་བུམ་གཟུགས།  བསྡུས་པར་མེ་ཏོག་དང་།   ཉི་ཟླ་མེ་རིས་སོགས་ཀྱི་བརྒྱན་པ་དབུས་སུ་བཙུག་པའི་མཐའ་སྐོར་གྲོ་ཡོས་དང་།  ཕྱེ་མར་གྱི་ཐོག་ཏུ་བཙུག་པའི་གྲོ་སྙེ་ཚོན་སྣ་དང་ལོ་གསར་མེ་ཏོག་གི་མཛེས་པར་བརྒྱན་ཅིང་།  གྲོ་སོ་ཕྱེ་མར་འདི་ལོ་གསར་དང་།  རྟེན་འབྲེལ་གྱི་བཀྲ་ཤིས་དགའ་སྟོན་ནམ་ཡིན་ལ་དགོས་ཤིང་།ལོ་གསར་ལ་མཚོན་ན་གསར་དུ་བཞད་པའི། ལོ་འདིའི་ནང་བགེགས་མེད་བདེ་སྐྱིད་ལྡན་ཞིང་རང་གཞན་འཕྲལ་ཡུན་བདེ་བའི་སྨོན་འདུན་བཟང་པོ་བྱ་ཞེས་ལོ་གསར་གྱི་གཏམ་དཔྱིད་ཀྱི་ཕོ་ཉའི་དབྱངས་ཞེས་པར་གསུངས་པ་ལྟར་རོ།།

        ཕྱེ་མར་དང་།  ཆང་ཕུད་འབུལ་སྐབས།  ལོ་གསར་ཡིན་ན་འབུལ་མིས།  བཀྲ་ཤིས་བདེ་ལེགས་ཞེས་འབུལ་བ་དང་།  ལེན་མིས་བཀྲ་ཤིས་བདེ་ལེགས་ཕུན་སུམ་ཚོགས།  ཨེ་མ་བག་གྲོ་སྐུ་ཁམས་བཟང་།  གཏན་དུ་བདེ་བ་ཐོབ་པར་ཤོག   གོང་ནས་གོང་དུ་འཕེལ་བར་ཤོག་ཞེས་པ་དང་།  ལོ་གསར་མིན་པའི་རྟེན་འབྲེལ་བྱེད་སྐབས་ཕྱེ་མར་འབུལ་ལེན་གཉིས་ཀས་བཀྲ་ཤིས་བདེ་ལེགས་ཞེས་ཟེར་བ་ལས་དེ་མིན་རྣམས་ཟེར་སྲོལ་མི་འདུག  ལོ་གསར་དང་ལུག་མགོའི་དཔེ་ཞེས་པ་ནི།  སྡེར་ཁ་དང་མཉམ་དུ་ལུག་མགོ་མར་ཚོན་གྱི་བརྒྱན་ཏེ་སྒྲིག་དགོས་པ་དང་།  ཁ་ལག་ལའང་ལུག་མགོ་ངེས་པར་དུ་ཟ་བའི་སྲོལ་ཆགས།   གྲོ་སོ་ཕྱེ་མར་སྒྲིག་གཤོམ་བྱེད་སྐབས་ཀྱང་འབོ་ཡ་གཅིག་ནང་འབྲུ་རིགས་ཀྱི་ནང་ནས་གཏན་འཁེལ་གྱིས་གྲོའམ་གྲོ་ཡོས་ཁོ་ན་བཀང་དགོས་པ་ཡང་ཁ་གྲོ་འམ་ཞལ་གྲོ་ཞེས་བརྗོད་ཅིང་།  སྔོན་དུས་བླ་མ་དང་།  དཔོན་རིགས་ཆེ་ཁག་ཁྲི་འདོན་མཛད་སྒོ་བྱེད་སྐབས་སྡོད་གདན་གོས་ཁའི་སྟེང་གྲོའི་གཡུང་དྲུང་འབྲི་སྲོལ་ཡོད་པ་དེ་ནི་མི་འགྱུར་བརྟན་པའི་མཚོན་དོན་ཡིན་པར་བཤད་ལ།  དགོན་སྡེ་ཁག་ནང་གསང་སྔགས་ཀྱི་ཆོ་ག་བྱེད་སྐབས་སྤྱིར་བཏང་མཆོད་འབྲུ་ནས་ཁོ་ན་བེད་སྤྱོད་ཅིང་།  རབ་གནས་ཀྱི་ཆོ་ག་དང་།  བཀྲ་ཤིས་བརྗོད་སྐབས་འཐོར་བྱེད་ཀྱི་མཆོད་འབྲུ་ཡང་ཁ་ཆེ་ཤ་ཁམ་དང་།  གུར་ཀུམ་གྱི་ཚོས་བརྒྱབ་པའི་གྲོ་ཁོ་ན་བྱེད་པ་ནི་གྲོ་འདི་རྟེན་འབྲེལ་དུ་བརྩི་བས་སོ།།

        ཕྱེ་མར་འབུལ་བའི་མཚོན་དོན་ནི།  བོད་རིགས་ཀྱི་ས་ཁུལ་དུ་ཞིང་འབྲོག་གཉིས་ཀྱི་ཐོན་སྐྱེད་བྱེད་སྒོ་གཙོ་བོར་འཛིན་ཅིང་།  ཞིང་པའི་ཐོན་སྐྱེད་ཀྱི་གཙོ་བོའམ་མཆོག་དེ་འབྲུ་རིགས་ཡིན་པ་དང་།  བོད་རིགས་ཀྱི་ཟས་རིགས་ཀྱི་གཙོ་བོ་རྩམ་པར་བརྟེན་ཅིང་།  དེ་བཞིན་འབྲོག་པའི་ཐོན་སྐྱེད་ཀྱི་གཙོ་བོ་དཀར་ཕྱུར་ཡིན་ཞིང་དེའི་སྙིང་པོ་མར་ལགས་པས་ཞིང་འབྲོག་གི་ཐོན་ཁུངས་ཀྱི་གཙོ་བོ་རྩམ་པ་དང་མར་ཡིན་པ་དེ་བོད་རིགས་ལ་མེད་དུ་མི་རུང་བའི་ཟས་རིགས་འཚོ་བའི་དགོས་མཁོའི་ནང་ཨང་དང་པོར་གནས་པའི་རྒྱུ་མཚན་ཡོད་པ་བཅས་ཀྱི་རྟེན་འབྲེལ་གྱི་ཐོག་མར་ཁ་ལ་ཕྱེ་མར་ཟ་དགོས་པ་དང་།  འབྲུ་རིགས་ནས་ལས་བཙོས་པའི་ཆང་ཕུད་སྟོར་བྱེད་པ་ནི་བོད་རིགས་ཀྱི་ཐུན་མོང་མ་ཡིན་པའི་ཁྱད་ཆོས་རིང་མོ་ཉིད་ནས་གོམས་སྲོལ་དུ་གྱུར་པ་ལགས་སོ།།   །།